ສກຈຮ ຈຳປາສັກ ປະກອບສ່ວນສຳຄັນຊ່ວຍເຫຼືອນໍ້າຖ້ວມ

   ເປັນອີກພາກສ່ວນໜຶ່ງທີ່ສໍາຄັນໃນການຊ່ວຍເຫຼືອໄພນໍ້າຖ້ວມຄັ້ງຮ້າຍແຮງໃນຮອບ 40 ກວ່າປີທີ່ແຂວງພາກໃຕ້ຂອງສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ໄດ້ມອບ 100 ລ້ານກີບ ໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມຄັ້ງນີ້.

 ທ່ານ ໜູເຄືອບ ສິດທິເດດ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ (ສກຈຮ) ໄດ້ໃຫ້ສໍາພາດຕໍ່ນັກຂ່າວໜັງສືພິມເສດຖະກິດ-ສັງຄົມເມື່ອບໍ່ດົນມານີ້ໃຫ້ຮູ້ວ່າ: ຄືດັ່ງທີ່ຮູ້ນໍາກັນແລ້ວວ່າໃນຕົ້ນເດືອນກັນຍາຜ່ານມາບັນດາແຂວງພາກໃຕ້ຂອງ ສປປລາວ ຄື: ຈໍາປາສັກ, ເຊກອງ, ສາລະວັນ ແລະ ອັດຕາປື ແລະບັນດາແຂວງພາກກາງ, ໄດ້ຮັບຜົນກະທົບຈາກໄພພິບັດນໍ້າຖ້ວມຢ່າງຮ້າຍແຮງແລະສ້າງຄວາມເສຍຫາຍຢ່າງໃຫຍ່ຫຼວງພໍສົມຄວນ.

ດັ່ງນັ້ນເພື່ອແບ່ງເບົາຄວາມທຸກໂສກຂອງປະຊາຊົນ, ຊຶ່ງທາງສະພາບໍລິຫານຂອງ ສກຈຮ ໄດ້ອະນຸມັດງົບປະມານຈໍານວນ 100 ລ້ານກີບເພື່ອມອບຊ່ວຍເຫຼືອປະຊາຊົນ, ຊຶ່ງອີງໃສ່ຄວາມຮຸນແຮງ ແລະຄວາມເສຍຫາຍຫຼາຍຄື: ແຂວງຈໍາປາສັກມອບຈໍານວນ 40 ລ້ານກີບ, ສາລະວັນ 35 ລ້ານກີບ, ອັດຕະປື 15 ລ້ານກີບ ແລະແຂວງເຊກອງຈໍານວນ 10 ລ້ານກີບ, ຊຶ່ງໄດ້ມອບຜ່ານຄະນະກໍາມະການຕ້ານໄພພິບັດນໍ້າຖ້ວມຂອງແຕ່ລະແຂວງ ແລະຕໍ່ເຫດການດັ່ງກ່າວພວກເຮົາມີຄວາມເສຍໃຈຫຼາຍຕໍ່ກັບບັນຫາທີ່ເກີດຂຶ້ນ ແລະຂໍເປັນກໍາລັງໃຈໃຫ້ກັບພໍ່ແມ່ປະຊາຊົນຜ່ານຜ່າອຸປະສັກດັ່ງກ່າວໄປດ້ວຍກັນ.

ສໍາລັບສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຕະຫຼອດໄລຍະຜ່ານມາຫຼາຍປີແມ່ນໄດ້ປະກອບສ່ວນຢ່າງສໍາຄັນເຂົ້າໃນການຊ່ວຍເຫຼືອສັງຄົມບໍ່ວ່າທາງດ້ານການສຶກສາ, ສາທາລະນະສຸກ, ດ້ານການເງິນ ແລະການຊ່ວຍເຫຼືອອື່ນໆທີ່ສະແດງເຖິງຄວາມເອົາໃຈໃສ່ໃນການປະກອບສ່ວນຊ່ວຍເຫຼືອສັງຄົມ.

----------------

ຂຽນໂດຍ: ໂພທິຣາຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์