ຊຳເໜືອ ມີ 253 ໂຄງການລົງທຶນ

  ໃນແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2015 –2019) ຂອງເມືອງຊຳເໜືອແຂວງຫົວພັນທີ່ໄດ້ຮັບຮອງໃນກອງປະຊຸມໃຫຍ່ຄັ້ງທີ 11 ຜ່ານມາໄດ້ມີການຮັບຮອງເອົາ 11 ແຜນງານ 256 ໂຄງການມີມູນຄ່າ 504,31 ຕື້ກີບ ຜ່ານການຈັດຕັ້ງປະຕິບັດຕົວຈິງບັນດາໂຄງການລົງທຶນຂອງລັດ,ທຶນຊ່ວຍເຫຼືອລ້າເພື່ອການພັດທະນາ ODA, ການລົງທຶນພາກເອກະຊົນທັງພາຍໃນ ແລະຕ່າງປະເທດສາມາດປະຕິບັດໄດ້ຕົວຈິງທັງໝົດ 253 ໂຄງການມີມູນຄ່າ 3 ພັນ 400 ຕື້ກວ່າກີບ.

  ໃນນີ້ການລົງທຶນຂອງລັດມີ 149 ໂຄງການ, ມູນຄ່າ 3,3 ຕື້ກີບ ມີມູນຄ່າໄດ້ປະຕິບັດຕົວຈິງ 2,7 ຕື້ກີບ ເທົ່າກັບ 81,09% ຂອງມູນຄ່າການລົງທຶນທັງໝົດ, ມູນຄ່າຊໍາລະແລ້ວ 577,75 ຕື້ກີບ ເທົ່າກັບ 17,29% ຂອງມູນຄ່າການລົງທຶນ ແລະໄດ້ຈັດຕັ້ງປະຕິບັດສຳເລັດແລ້ວ 132 ໂຄງການ, ພວມສືບຕໍ່ຈັດຕັ້ງປະຕິບັດ 17 ໂຄງການ; ການຊ່ວຍເຫຼືອລ້າ ແລະ ທຶນກູ້ຢືມ ODA ໄດ້ຮັບການຈັດຕັ້ງປະຕິບັດທັງໝົດ 98 ໂຄງການມູນຄ່າ 51,67 ຕື້ກີບ ເທົ່າກັບ 1,52% ຂອງການລົງທຶນທັງໝົດຈັດຕັ້ງປະຕິບັດໄດ້ 83,67% ໃນນັ້ນມີທຶນສົມທົບປະຊາຊົນ 935, 77 ລ້ານກີບ.

 ສ່ວນການລົງທຶນຂອງເອກະຊົນພາຍໃນ ແລະຕ່າງປະເທດມີຫົວໜ່ວຍທຸລະກິດເຂົ້າມາລົງທຶນທັງໝົດ 19 ໂຄງການ, ມີມູນຄ່າ 16,94ລ້ານໂດລາ ໃນນີ້ເປັນການລົງທຶນຂອງນັກລົງທຶນຕ່າງປະເທດ 5 ໂຄງການ, ມູນຄ່າ 10,96 ລ້ານໂດລາ ແລະເປັນການລົງທຶນຂອງນັກທຸລະກິດພາຍໃນ 14 ໂຄງການມູນຄ່າ 5,98 ຕື້ກີບ.

  ບັນດາໂຄງການທີ່ໄດ້ຈັດຕັ້ງປະຕິບັດໃນໄລຍະ 5 ປີຜ່ານມາຂອງເມືອງຊຳເໜືອໄດ້ເປັນການກະຕຸກຊຸກຍູ້ໃຫ້ແກ່ການພັດທະນາເສດຖະກິດ-ສັງຄົມຢູ່ພາຍໃນເມືອງຊຳເໜືອຄ່ອຍໆໄດ້ຮັບການພັດທະນາຂຶ້ນເປັນກ້າວໆ ເຮັດໃຫ້ເມືອງຊຳເໜືອມີໂສມໜ້າໃໝ່ທີ່ດີຂຶ້ນກວ່າເກົ່າ.

------------

ຂຽນໂດຍ: ງຸດ ວິໄລຄຳ

ພາບ ແລະຂ່າວຈາກ: ນສພເສດຖະກິດ-ສັງຄົມ

แชร์