ອົງການພັດທະນາສາກົນອາເມລິກາ ຫຼື USAID ເຂົ້າເບິ່ງຜົນເສຍຫາຍຕົວຈິງຈາກໄພນ້ຳຖ້ວມຢູ່ເມືອງໂຂງ

  ຕອນບ່າຍວັນທີ 22 ກັນຍາ 2019 ທ່ານ ຄຳສຸກ ຈັນທະວົງ ຮອງເຈົ້າເມືອງໆໂຂງພ້ອມຄະນະກຳມະການປ້ອງກັນ, ຄວບຄຸມ ແລະຟື້ນຟູໄພພິບັດຂັ້ນເມືອງໄດ້ຕ້ອນຮັບການລົງມາເຮັດວຽກຂອງທ່ານ Mrjonathan BAKER ຕາງໜ້າອົງການພັດທະນາສາກົນອາເມລິກາ USAID ປະຈຳລາວ ແລະພາກສ່ວນທີ່ກ່ຽວຂ້ອງແຂວງຈຳປາສັກ ທີ່ໄດ້ເດີນທາງມາເຮັດວຽກຢ່າງຮີບດ່ວນເພື່ອເບິ່ງຜົນເສຍຫາຍຈາກໄພນໍ້າຖ້ວມພ້ອມທັງເກັບກຳຂໍ້ມູນຕົວຈິ່ງເພື່ອວາງແຜນໃຫ້ການຊ່ວຍເຫຼືອໃນຕໍ່ໜ້າ.

​ ໂອກາດນີ້ ທ່ານ ຄຳສຸກ ຈັນທະວົງ ໄດ້ລາຍງານໂດຍສະເຂບຕໍ່ກັບຜົນເສຍຫາຍຈາກໄພນໍ້າຖ້ວມຄັ້ງນີ້ວ່າ: ການລວບລວມຂໍ້ມູນລ່າສຸດມາຮອດວັນທີ 18 ກັນຍານີ້ກ່ຽວ ກັບຜົນເສຍຫາຍທົ່ວເມືອງມີຈຳນວນບ້ານທັງໝົດ 114 ບ້ານ, ໃນຈຳນວນນີ້ມີບ້ານນໍ້າໄຫຼເຂົ້າຖ້ວມ 101 ບ້ານ ຫຼືເທົ່າກັບ 88,59% ຂອງຈຳນວນບ້ານໃນທົ່ວເມືອງ, ມີ 3.725 ຄອບຄົວ, ມີຈຳນວນປະຊາຊົນໄດ້ຮັບຜົນກະທົບ 20.161 ຄົນ, ຍິງ 10.251 ຄົນ, ບ້ານທີ່ຖືກຍົກຍ້າຍປະຊາຊົນອອກຈາກນໍ້າຖ້ວມມີຈຳນວນ

6 ບ້ານ (ບ້ານທ່າໂພເໜືອ, ບຸ່ນນ້ອຍ, ຫ້ວຍໄຮ, ນາລານ, ລົມພັດ ແລະ ບ້ານດອນສັນ), ມີ 483 ຄອບຄົວ, ມີຈຳນວນຄົນ 2.511 ຄົນ, ຍິງ 1.340 ຄົນ (ໃນຈຳນີ້ຍ້າຍໄປຢູ່ຈຸດ ພັກເຊົາຊົ່ວຄາວມີ 17 ຄອບຄົວ, ມີ 103 ຄົນ, ຍິງ 46 ຄົນ); ມີເນື້ອທີ່ການຜະລິດເຂົ້ານາປີຖືກນໍ້າຖ້ວມ 3.403 ກວ່າເຮັກຕາ (ໃນນີ້ເນື້ອທີ່ນາເສຍຫາຍຕົວຈິງ 1.911 ກວ່າເຮັກຕາ), ມີເນື້ອທີ່ສວນປູກພືດສຳຮອງເສຍຫາຍເກືອບ 90 ເຮັກຕາ, ມີເສັ້ນທາງໄດ້ຮັບຄວາມເສຍຫາຍເປ່ເພ 15 ເສັ້ນ, ຍາວ 63 ກິໂລແມັດ, ມີຂົວເປເພ່ນຳໃຊ້ບໍ່ໄດ້ 1 ແຫ່ງ, ນໍ້າບາດານນຳໃຊ້ບໍ່ໄດ້ 25 ໜ່ວຍ, ໜອງປາຖືກນ້ຳຖ້ວມ 51 ໜອງ, ປາເສຍຫາຍ 8 ລ້ານກວ່າໂຕ, ມີສັດໃຫຍ່ປະເພດງົວຕາຍ 3 ໂຕ, ສັດປີກ 150 ໂຕ ແລະ ບໍ່ມີຄົນເສຍຊີວິດ ຫຼືເຮືອນຊານເປ່ເພແຕ່ຢ່າງໃດ.

​  ຮອງເຈົ້າເມືອງໆໂຂງໃຫ້ຮູ້ຕື່ມວ່າ: ຄວາມຕ້ອງການໃນປັດຈຸບັນອັນຮີບດ່ວນແມ່ນແນວພັນເຂົ້າຈຳນວນ 100 ກວ່າໂຕນເພື່ອເຮັດນາຕ່າວ ແລະນາແຊງ, ແນວພັນພືດຊະນິດຕ່າງໆຫຼາຍກວ່າ 2 ໂຕນ, ສະເພາະເຂົ້າສານເພື່ອບໍລິໂພກພາຍໃນ 3 ເດືອນຕໍ່ໜ້າມີຄວາມຕ້ອງການ 1.100 ກວ່າໂຕນ; ຂ່າວແຈ້ງຕື່ມວ່າ: ໃນວັນດຽວກັນ ການນຳຂອງເມືອງໂຂງກໍ່ໄດ້ນຳພາຜູ້ຕາງໜ້າອົງການພັດທະນາສາກົນອາເມລິກາ USAID ປະຈຳລາວລົງເບິ່ງຈຸດທີ່ໄດ້ຮັບຜົນກະທົບຈາກໄພນໍ້າຖ້ວມຕົວຈິ່ງຕື່ມອີກທີ່ບ້ານທ່າໂພເໜືອ.

------------------

​ຂ່າວໂດຍ: ພຸດທະສິນ ວົງວິໄລທອງ

ສະຖານີວິທະຍຸ-ໂທລະພາບເມືອງໂຂງ

แชร์