ສືກສາຕ່ອງໂສ້ມູນຄ່າເພີ່ມການຜະລິດເຂົ້າ ແລະກ້ວຍສົ່ງໄປຈີນ

  ວັນທີ 20 ກັນຍາ 2019, ສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ, ໄດ້ຈັດກອງປະຊຸມວິຊາການເພື່ອປະກອບຄຳຄິດຄຳເຫັນໃສ່ບົດຄົ້ນຄວ້າພາຍ ໃຕ້ຫົວຂໍ້ ຕ່ອງໂສ້ ມູນຄ່າເພີ່ມການຄ້າສິນຄ້າກະສິກຳ ລະຫວ່າງ ລາວ ແລະຈີນ ກໍລະນີສຶກສາເຂົ້າ ແລະກ້ວຍ, ເຂົ້າຮ່ວມເປັນປະທານຂອງ ທ່ານ ວຽງສະຫວ່າງ ທິບພະວົງ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະການຄ້າ, ພ້ອມນັ້ນຍັງມີພະແນກທີ່ກ່ຽວຂ້ອງ ແລະພາກທຸລະກິດຈາກຂົງເຂດທີ່ກ່ຽວຂ້ອງເຂົ້າຮ່ວມ.

  ທ່ານ ວຽງສະຫວ່າງ ທິບພະວົງ ກ່າວວ່າ: ກອງປະຊຸມໃນ ຄັ້ງນີ້ແມ່ນເພື່ອລະດົມແນວຄວາມຄິດປະກອບໃສ່ກໍລະນີສຶກສາກ່ຽວກັບຕ່ອງໂສ້ມູນຄ່າເພີ່ມສິນຄ້າກະສິກຳ, ຊຶ່ງໄດ້ເລີ່ມສຶກສາມາແຕ່ຕົ້ນປີໂດຍສະເພາະຕ່ອງໂສ້ມູນຄ່າເພີ່ມຂອງເຂົ້າ ແລະກ້ວຍ, ໂຄງການນີ້ໄດ້ຮັບທຶນສະໜັບສະໜູນຈາກລັດຖະບານຈີນເພື່ອສຶກສາຢູ່ 6 ປະເທດ ໃນການສົ່ງສິນຄ້າໄປປະເທດຈີນ, ສະ ເພາະລາວ ແມ່ນໄດ້ຍົກເອົາ 2 ພືດຄື: ເຂົ້າແລະກ້ວຍ ມາເປັນກໍລະນີສຶກສາ ສະເພາະ, ດັ່ງນັ້ນໃນກອງປະຊຸມເທື່ອ ນີ້ເປັນກອງປະຊຸມວິຊາການໂດຍຜູ້ເຂົ້າຮ່ວມສາມາດແລກປ່ຽນຄຳຄິດຄຳເຫັນຮ່ວມກັນເພື່ອເຮັດໃຫ້ບົດສຶກສາມີຄວາມສົມບູນຍິ່ງຂຶ້ນ ແລະສາມາດນຳເຂົ້າໃນການສ້າງແຜນ, ນະໂຍ ບາຍຂອງກະຊວງອຸດສາຫະກຳ ແລະການຄ້າກໍຄືຂອງລັດຖະບານໃນອະນາຄົດ.

  ທ່ານ ສົມເດດ ໂພທິສານ ທີມງານນັກຄົ້ນຄວ້າຂອງສະຖາບັນເສດຖະກິດອຸດສາຫະກຳ ແລະການຄ້າ ໃຫ້ຮູ້ວ່າ: ການພັດທະນາດ້ານກະສິກຳແມ່ນເປັນຂະແໜງໜຶ່ງທີ່ສຳຄັນທີ່ສຸດຕໍ່ເສດຖະກິດ ຂອງລາວເຮົາ, ຊຶ່ງຄາດວ່າຮອດປີ 2025 ຂະແໜງດັ່ງກ່າວຈະປະກອບສ່ວນຫຼາຍກວ່າ 19% ຂອງເສດຖະກິດແຫ່ງຊາດ, ປະຈຸບັນການສົ່ງອອກສິນຄ້າກະສິກຳ ຕົ້ນຕໍແມ່ນ ເຂົ້າ, ກ້ວຍ, ສາລີ, ກາເຟ, ມັນຕົ້ນ, ອ້ອຍ ແລະອື່ນໆ, ໂດຍເຂົ້າ ແລະກ້ວຍ ແມ່ນຖືກຮອງຮັບຈາກກະ ຊວງກະສິກຳ ແລະປ່າໄມ້ ໃຫ້ເປັນ 2 ໃນ 6 ສິນຄ້າທີ່ມີທ່າແຮງໃນການສົ່ງ ອອກ ແລະການສົ່ງອອກພືດສອງຊະນິດຂອງລາວໃນປີຜ່ານໆມາແມ່ນໄດ້ຮັບການອຳນວຍຄວາມສະດວກຈາກສັນຍາການຄ້າລະຫວ່າງສອງຝ່າຍ, ດັ່ງນັ້ນການສຶກສາໃນເທື່ອນີ້ແມ່ນເພື່ອສຶກສາຕ່ອງໂສ້ການຜະລິດ, ການດຳເນີນທຸລະກິດ ແລະການສົ່ງອອກ, ພ້ອມທັງສະເໜີນະໂຍບາຍທີ່ເປັນໄປໄດ້ສຳລັບຜູ້ ສ້າງນະໂຍບາຍກ່ຽວກັບຂັ້ນຕອນການ ຜະລິດ ແລະການສົ່ງອອກ ເພື່ອເພີ່ມຄວາມ ສາມາດໃນການແຂ່ງຂັນ ແລະຮັບປະກັນ ການແຈກຢາຍລາຍໄດ້ທີ່ເໝາະສົມໃນຕ່ອງໂສ້ມູນຄ່າ, ສະນັ້ນການສຶກສາຊຸດນີ້ແມ່ນໄດ້ກຳນົດເອົາ 6 ແຂວງຄື: ເຂົ້າແມ່ນແຂວງຄຳມ່ວນ ແລະຈຳປາສັກ, ສ່ວນກ້ວຍແມ່ນ ແຂວງບໍ່ແກ້ວ, ຫຼວງນ້ຳທາ, ອຸດົມໄຊ ແລະຫຼວງພະບາງ.

  ໂດຍໃນບົດຄົນຄວ້າ ຍັງໄດ້ຍົກໃຫ້ ເຫັນຕົວເລກມູນຄ່າການສົ່ງອອກຂອງ ລາວ ແຕ່ປີ 2013-2017 ເຫັນວ່າ ປີ 2013 ມູນຄ່າການສົ່ງອອກສິນຄ້າກະ ສິກຳມີທັງໝົດ 312,15 ລ້ານໂດລາ ແລະໃນປີ 2017 ເພີ່ມເປັນ 640 ລ້ານໂດ ລາ, ສະເພາະການສົ່ງອອກໄປຈີນໃນປີ 2013 ມີ 92,46 ລ້ານໂດລາ ຮອດປີ 2017 ເພີ່ມເປັນ 278,56 ລ້ານໂດລາ, ຊຶ່ງສາມາດເວົ້າໄດ້ວ່າຮອດປີ 2017 ຕະຫຼາດຈີນກວມເອົາເກືອບ 50% ຂອງ ການສົ່ງອອກໃນລາວ, ຊຶ່ງຈີນເປັນຕະ ຫຼາດໃຫຍ່, ສຳຄັນຫຼາຍ ແລະມີທ່າແຮງ ໃນການສົ່ງອອກອີກຫຼາຍໃນອະນາຄົດ, ສະເພາະການສົ່ງອອກເຂົ້າຂອງລາວໄປສູ່ ຕະຫຼາດຈີນແມ່ນໄດ້ເລີ່ມມາແຕ່ປີ 2015 ແລະຕົກມາຮອດປີ 2018 ລາວຖືຈັດ ອັນດັບທີ 5 ໃນບັນດາປະເທດທີ່ສົ່ງ ອອກໄປ ສປ ຈີນ ຫຼາຍທີ່ສຸດ ແລະຍັງສາ ມາດຍາດສ່ວນແບ່ງຕະຫຼາດໄດ້ 2,4%, ແຕ່ວ່າການສົ່ງອອກເຂົ້າໄປຈີນຂອງ ລາວ ກໍຍັງປະເຊີນກັບສິ່ງທ້າທາຍຫຼາຍ ຢ່າງເປັນຕົ້ນແມ່ນລະດັບຄຸນນະພາບ ທຽບເທົ່າກັບມາດຕະຖານສາກົນ, ສ່ວນກ້ວຍແມ່ນເລີ່ມແຕ່ປີ 2010 ໂດຍ ການລົງທຶນຂອງນັກທຸລະກິດຈີນດ້ວຍ ຮູບແບບ 1+4, ຊຶ່ງຈະເຫັນໄດ້ວ່າໃນປີ 2013 ລາວ ສົ່ງອອກກ້ວຍໄປຈີນເກືອບ 60 ລ້ານໂດລາ ແລະເພີ່ມຂຶ້ນສູງສຸດໃນປີ 2016 ສົ່ງອອກ1,83 ຮ້ອຍລ້ານໂດລາ, ແຕ່ປີ 2018 ຫຼຸດລົງມາເຫຼືອ 64 ລ້ານ ໂດລາດ ເນື່ອງດ້ວຍຫຼາຍປັດໄຈ ໂດຍ ສະເພາະການຂະຫຍາຍຕົວຂອງການຜະລິດ ແລະສົ່ງອອກກ້ວຍໄດ້ສ້າງບັນ ຫາທີ່ບໍ່ສາມາດແກ້ໄດ້ ຕົ້ນຕໍ ການສ້າງ ໃຫ້ມີສານເຄມີຕົກຄ້າງຈາກການໃສ່ປຸ໋ຍ ແລະຢາປາບສັດຕູພືດ.

--------------------

ໜັງສືພິມເສດຖະກິດ-ສັງຄົມ

แชร์