5 ປີ ດ່ານພາສີສາກົນທ່າແຂກເກັບລາຍຮັບໄດ້ 800 ຕື້ກວ່າກີບ

   ກອງປະຊຸມໃຫຍ່ຄັ້ງທີ II ຂອງໜ່ວຍພັກດ່ານພາສີສາກົນທ່າແຂກໄດ້ຈັດຂຶ້ນໃນວັນທີ 18 ກັນຍາ 2019 ທີ່ຫ້ອງປະຊຸມພະແນກການເງິນແຂວງໂດຍການເປັນປະ ທານຂອງທ່ານ ສົມຫວັງ ສົມຈິນດາ ເລຂາໜ່ວຍພັກດ່ານ ພາສີສາກົນທ່າແຂກ, ເຂົ້າຮ່ວມ ຂອງທ່ານ ບຸນເລັ່ງກຸນອາວົງ ຫົວໜ້າພະແນກການເງິນແຂວງ, ມີຕາງໜ້າຄະນະຈັດຕັ້ງແຂວງ, ໂຄສະນາອົບຮົມ, ກວດກາພັກ, ບັນດາເລຂາໜ່ວຍພັກອ້ອມຂ້າງຕະຫຼອດຮອດສະມາຊິກພັກພາຍໃນໜ່ວຍດັ່ງກ່າວເຂົ້າຮ່ວມ.

  ທ່ານ ສົມຫວັງ ສົມຈິນດາ ກ່າວວ່າ: ປະຈຸບັນດ່ານພາສີສາກົນມີພະນັກງານທັງໝົດ 39 ຄົນ, ຍິງ 10 ຄົນ ແລະມີພະນັກງານ ຊ່ວຍວຽກ 9 ຄົນ, ມີສະມາຊິກ ພັກທັງໝົດ 35 ສະຫາຍ, ຍິງ 8 ສະຫາຍ, ສຳຮອງ 2 ສະຫາຍ, ໂດຍໄດ້ຖືສຳຄັນຕໍ່ 5 ຫຼັກການ ແລະ 3 ທິດນຳໃນການກໍ່ສ້າງແລະຂະຫຍາຍພັກຖືເອົາຄຸນນະ ພາບເປັນກົກເຊິ່ງໄດ້ທົດສອບໃນ ຂະບວນວຽກງານຕົວຈິງ, ສໍາລັບວຽກງານຂະຫຍາຍພັກໃນໄລຍະ 5 ປີຜ່ານມາແມ່ນໄດ້ສົ່ງມະຫາຊົນເຂົ້າຮຽນສະໜັບສະໜູນ, ຮຽນກົດລະບຽບພັກ ແລະ ເຂົ້າເປັນສະມາຊິກພັກສຳຮອງ 13 ສະຫາຍ, ຍິງ 1 ສະຫາຍ, ສະມາຊິກພັກສຳຮອງເລື່ອນຂຶ້ນເປັນສົມບູນ 11 ສະຫາຍ, ຍິງ 1 ສະຫາຍ.

  ຊຶ່ງດ້ານວຽກງານວິຊາສະເພາະແມ່ນໄດ້ເອົາໃຈໃສ່ປຸກລະດົມກຳລັງແຮງຂອງພະນັກງານ-ສະມາຊິກພັກສຸມສະຕິປັນຍາ, ຄວາມຮູ້ຄວາມສາມາດ ແລະປະສົບການໃນການປະຕິບັດໜ້າທີ່ວິຊາສະເພາະເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່, ເອົາໃຈໃສ່ຊີ້ນຳໆພາສະມາຊິກພັກ, ພະນັກງານ-ລັດຖະກອນໃນແຕ່ລະໜ່ວຍງານຊອກຄົ້ນເກັບລາຍຮັບຕາມແຜນທີ່ໄດ້ກຳນົດໄວ້ ແລະເອົາໃຈໃສ່ໃນຂອບການບໍລິການເພື່ອຄວາມສະດວກ ແລະວ່ອງໄວບົນຟື້ນຖານລະບຽບກົດ ໝາຍ ແລະ ນິຕິກຳທີ່ກຳນົດໄວ້, ຜ່ານການຈັດຕັ້ງປະຕິບັດວຽກງານໃນໄລຍະ 5 ປີສາມາດເກັບລາຍຮັບໄດ້ທັງໝົດ 885,15 ຕື້ກີບ, ທຽບໃສ່ກອງປະຊຸມໃຫຍ່ສະໄໝຜ່ານມາສາມາດປະຕິບັດໄດ້ຕາມແຜນການ.

ກອງປະຊຸມຄັ້ງນີ້ຍັງໄດ້ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ມີຜູ້ສະໝັກທັງໝົດ 5 ທ່ານ, ເລືອກເອົາ 3 ທ່ານ, ໂດຍເຫັນດີເປັນເອກະສັນກັນເລືອກເອົາທ່ານ ສົມຫວັງ ສົມຈິນດາ ເປັນເລຂາ ໜ່ວຍພັກ, ທ່ານ ວັດຖາວົງ ຈະເລີນສັກ ເປັນຮອງເລຂາທັງເປັນປະທານກວດກາ ແລະ ທ່ານ ສິດທິ ເພັງທະລັງສີ ເປັນຄະນະກໍາມະການ.

  ໃນຕອນທ້າຍກອງປະຊຸມ ທ່ານ ບຸນເລັງ ກຸນອາວົງ ກໍ່ໄດ້ກ່າວມີຄຳເຫັນໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນຫຼາຍດ້ານທີ່ໜ່ວຍພັກດ່ານພາສີສາກົນທ່າແຂກຍາດມາໄດ້ໃນໄລຍະຜ່ານມາ ແລະຮຽກຮ້ອງໃຫ້ຄະນະພັກຊຸດໃໝ່ເອົາໃຈໃສ່ສືບຕໍ່ປະຕິບັດໜ້າທີ່ວຽກງານຕາມການມອບໝາຍຂອງຂັ້ນເທິງຢ່າງເຂັ້ມງວດໂດຍສະເພາະແມ່ນເອົາໃຈໃສ່ສືບຕໍ່ສຶກສາອົບຮົມວຽກງານການເມືອງ-ແນວຄິດຕິດພັນກັບການເຄື່ອນໄຫວວຽກງານວິຊາສະເພາະຂອງຕົນໃຫ້ໄດ້ຮັບຜົນສຳເລັດຕາມລະດັບຄາດໝາຍ.

-------------------

ໜັງສືພິມເສດຖະກິດ-ສັງຄົມ

แชร์