ເປີດຫ້ອງຄົ້ນຄວ້າ ເພື່ອເລັ່ງການພັດທະນາກັບເຄືອຂ່າຍທົ່ວໂລກ

  ໃນວັນທີ 19 ກັນຍາຜ່ານມາທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ, ກະຊວງແຜນການ ແລະ ການລົງທຶນ ແລະ ກະຊວງການຕ່າງປະເທດຮ່ວມກັບອົງການສະຫະປະຊາຊາດເພື່ອການພັດທະນາ (UNDP) ໄດ້ຈັດພິທີເປີດຫ້ອງຄົ້ນຄວ້າເພື່ອເລັ່ງການພັດທະນາກັບເຄືອຂ່າຍທົ່ວໂລກໂດຍມີທ່ານ ນາງ ເພັດສະໝອນ ສອນ ຮອງຫົວໜ້າສູນສະຖິຕິກະຊວງແຜນການ ແລະການລົງທຶນ, ທ່ານນາງ ຣິຄາດ້າ ຣິເກີ້ ຜູ້ຕາງໜ້າອົງການ UNDP ປະຈຳ ສປປ ລາວ, ທ່ານ ນາງ ມະນີເພັດ ເພັງສະຫວັດດີ ຫົວໜ້າດ້ານການສຳຫຼວດຂອງຫ້ອງຄົ້ນຄວ້າເພື່ອເລັ່ງການພັດທະນາຂອງ UNDP ໃນ ສປປ ລາວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ນາງ ຣິຄາດ້າ ຣິເກີ້ ກ່າວວ່າ: ຫ້ອງຄົ້ນຄວ້າເພື່ອເລັ່ງການພັດທະນາ ຈະຮັບປະກັນວ່າການເຮັດວຽກຕ້ອງມີ ຄວາມຈະແຈ້ງ, ມີສ່ວນຮ່ວມ ແລະມີການປະກອບສ່ວນຈາກທຸກຝ່າຍ UNDP ຮູ້ແຈ້ງວ່າການເຮັດວຽກແບບເກົ່າຍັງບໍ່ໄດ້ມີການຕອບສະໜອງແບບທັນດ່ວນທີ່ອີງໃສ່ຄວາມກ່ຽວຂ້ອງກັນໂດຍອີງໃສ່ປັດໄຈທາງດ້ານສັງຄົມ, ສິ່ງແວດລ້ອມ ແລະ ເສດຖະກິດ, ຜ່ານການເຮັດວຽກຂອງຫ້ອງຄົ້ນຄວ້ານີ້ພວກເຮົາຈະແກ້ໄຂບັນຫາທີ່ຮີບດ່ວນທີ່ສົ່ງຜົນກະທົບຕໍ່ປະຊາຊົນ ແລະ ການພັດທະນາຂອງເສດຖະກິດໂດຍຈະເຮັດວຽກເພື່ອການເຊື່ອມໂຍງທາງອອກໃນການແກ້ໄຂບັນຫາທີ່ມີຢູ່ແລ້ວໃຫ້ເກີດປະໂຫຍດເພີ່ມອີກ, ສໍາລັບຫ້ອງຄົ້ນຄວ້າ ແລະ ເຄືອຂ່າຍດັ່ງກ່າວປະ ກອບມີ 60 ຫ້ອງຄົ້ນຄວ້າທີ່ເຮັດວຽກໃນ 78 ປະເທດ.

  ທ່ານ ນາງ ມະນີເພັດ ເພັງສະຫວັດດີ ກ່າວວ່າ: ຫ້ອງຄົ້ນຄວ້ານີ້ເປັນຄວາມຄິດລິເລີ່ມໃໝ່ຈະຊ່ວຍໃຫ້ພວກເຮົາເຮັດວຽກກັບຄູ່ຮ່ວມງານທີ່ແຕກຕ່າງເພື່ອແກ້ໄຂບັນຫາການພັດທະນາ, ເພື່ອພັດທະນາຕົ້ນແບບສຳລັບການທົດລອງ ແລະເພື່ອແບ່ງປັນປະສົບການຂອງພວກເຮົາຜ່ານເຄືອຂ່າຍການຮຽນຮູ້ທັງນີ້ກໍເພື່ອທີ່ຈະເຂົ້າໃຈສາເຫດຕົ້ນ ຕໍຂອງບັນຫາມັນສຳຄັນຫຼາຍທີ່ເຮົາຕ້ອງເຂົ້າໃຈລະບົບນິເວດ ແລະທຳມະຊາດຂອງຄວາມທ້າທາຍໃນປະຈຸບັນ.

---------------

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์