ເອັສທີ ປະກອບສ່ວນຊ່ວຍເຫຼືອສັງຄົມເກືອບ 5 ຕື້ກີບ

  ທະນາຄານເອັສທີ ຈຳກັດ ເປັນທະນາຄານທຸລະກິດເອກະຊົນຊຶ່ງໄດ້ຮັບການສ້າງຕັ້ງມາເປັນເວລາ 10 ປີ ແລະມີຈຸດປະສົງໃຫ້ການບໍລິການທາງດ້ານການເງິນແກ່ສັງຄົມຢ່າງເຕັມຮູບແບບ ແລະການບໍລິການຮັບເງິນຝາກປະເພດຕ່າງໆ ໃນນັ້ນມີເງິນຝາກກະແສລາຍວັນ, ເງິນຝາກປະຢັດ, ເງິນຝາກມີກໍານົດ ແລະ ທັງສະໜອງສິນເຊື່ອດ້ວຍຮູບແບບໃຫ້ກູ້ຢືມເງິນໄລຍະສັ້ນ, ກາງ ແລະໄລຍະຍາວ, ການຄໍ້າປະກັນ, ການຊໍາລະສະສາງພາຍໃນ ແລະ ຕ່າງປະເທດ, ຊື້-ຂາຍ ເງິນຕາຕ່າງປະເທດ ແລະດໍາເນີນທຸລະກິດດ້ານການເງິນອື່ນໆຕາມກົດໝາຍທີ່ກໍານົດ ແລະໄດ້ປະກອບສ່ວນອັນສໍາຄັນເຂົ້າໃນການຈັດຕັ້ງປະຕິບັດແຜນນະໂຍບາຍທາງດ້ານເສດຖະກິດ-ເງິນຕາຂອງລັດຖະບານໃນແຕ່ລະໄລຍະ.

  ທ່ານ ບົວສອນ ບຸນເຮືອງຮຸ່ງ ຮອງຜູ້ອໍານວຍການທະນາຄານເອັສທີ ຈໍາກັດ ໄດ້ແຈ້ງໃຫ້ຜູ້ສື່ຂ່າວວ່າ: ນັບແຕ່ມື້ສ້າງຕັ້ງມາເຖິງປະຈຸບັນ, ທະນາຄານຂອງພວກເຮົາໄດ້ເຕີບໃຫຍ່ຂະຫຍາຍຕົວເປັນກ້າວໆ ຊຶ່ງໄດ້ຮັບການຮ່ວມມື ແລະໃຫ້ການສະໜັບສະໜູນ ແລະຄວາມໄວ້ວາງໃຈຈາກພະນັກງານ, ທະຫານ, ຕໍາຫຼວດ ແລະປະຊາ ຊົນຕະຫຼອດເຖິງພໍ່ຄ້າຊາວຂາຍ, ນັກທຸລະກິດ-ນັກລົງທຶນທັງພາຍໃນ ແລະຕ່າງປະເທດເຮັດໃຫ້ທະນາຄານເອັສທີ ຈໍາກັດ ມີຄວາມໝັ້ນຄົງ, ມີສະພາບຄ່ອງສາມາດສະໜອງເງິນສົດໃຫ້ບັນດາລູກຄ້າ, ນັກທຸລະກິດໄດ້ພຽງພໍສົມຄວນ, ປະຈຸບັນມີ 6 ສາຂາ, 36 ໜ່ວຍບໍລິການ, ມີຕູ້ເອທີເອັມ 52 ຕູ້; ພ້ອມດຽວກັນນັ້ນ,ຍັງມີການກໍ່ສ້າງປັບປຸງ ແລະພັດທະນາຜະລິດຕະພັນກໍ່ຄືບຸກຄະລາກອນໃຫ້ເຕີບໃຫຍ່ທາງດ້ານປະລິມານ ແລະຄຸນນະພາບຕອບສະໜອງກັບການເຊື່ອມໂຍງທຸລະກໍາການເງິນໃນໄລຍະໃໝ່ຂອງລັດຖະບານ.

  ດ້ານການຊ່ວຍເຫຼືອສັງຄົມໃນຜ່ານມາ; ທ່ານຮອງຜູ້ອໍານວຍການທະນາຄານເອັສທີ ຈໍາກັດ ໃຫ້ຮູ້ວ່າ: ໂດຍປະຕິບັດຕາມທິດຊີ້ນໍາຂອງ ທ່ານ ສີທັດ ໄຊສຸລິວົງ ປະ ທານສະພາບໍລິຫານທະນາຄານເອັສທີ ຈຳກັດ ທີ່ຖືເອົາການຊ່ວຍເຫຼືອສັງຄົມເປັນວຽກງານໜຶ່ງທີ່ສໍາຄັນເປັນນະໂຍບາຍເພື່ອປະກອບສ່ວນສົ່ງເສີມ ແລະແກ້ໄຂຄວາມຫຍຸ້ງຍາກຂາດເຂີນໃນສັງຄົມຊຶ່ງຜ່ານມາໄດ້ຊ່ວຍເຫຼືອສັງຄົມມູນຄ່າເກືອບ 5 ຕື້ກີບໃນນີ້ໄດ້ປະກອບສ່ວນຊ່ວຍເຫຼືອປະຊາຊົນຢູ່ບາງທ້ອງຖິ່ນຢູ່ແຂວງຜົ້ງສາລີ, ຊຽງຂວາງ ແລະ ແຂວງສະຫວັນນະເຂດ 1,05 ຕື້ກີບ ຊຶ່ງເງິນຈໍານວນດັ່ງກ່າວໄດ້ຖືກນໍາໃຊ້ໃນການກໍ່ສ້າງຫ້ອງນໍ້າ-ນໍ້າບາດານ, ຊ່ວຍເຫຼືອຜູ້ປະສົບໄພນໍ້າຖ້ວມ, ຊ່ວຍ ເຫຼືອຫຼຸດຜ່ອນຄວາມທຸກຍາກ, ນອກນີ້ຍັງປະກອບສ່ວນມອບເງິນຊ່ວຍເຫຼືອຜູ້ປະສົບໄພຢູ່ປະເທດຍີ່ປຸ່ນ, ສະໜັບສະໜູນສ້າງຕັ້ງສີລາຈາລຶກນັກຮົບປະຕິວັດ, ຊຸກຍູ້ ກອງປະຊຸມໃຫຍ່ຄັ້ງX ຂອງພັກ ແລະຊ່ວຍຊຸກຍູ້ສັງຄົມອື່ນໆອີກ.

  ນັບແຕ່ທ້າຍເດືອນກໍລະກົດ 2018 ມາເຖິງປະຈຸບັນທະນາຄານເອັສທີ ຈໍາກັດ ກໍ່ໄດ້ປະກອບສ່ວນໃຫ້ການຊ່ວຍເຫຼືອຜູ້ປະສົບໄພນໍ້າຖ້ວມຈາກເຫດການເຂື່ອນເຊປຽນ-ເຊນໍ້ານ້ອຍ ເມືອງສະໜາມໄຊ ແຂວງອັດຕະປື ມີເຂົ້າສານ 200 ໂຕນມູນຄ່າ 1,12 ຕື້ກີບ, ມອບເງິນຊ່ວຍເຫຼືອ 219,2 ລ້ານກີບ, ມອບເຄື່ອງ ອຸປະໂພກ-ບໍລິໂພກ 50 ລ້ານກີບ, ຄອບຄົວຂອງ ທ່ານ ໄຊຍາ ໄຊສຸລິວົງ ຮອງປະທານສະພາບໍລິຫານທະນາຄານເອັສທີ ຈຳກັດ 8 ລ້ານກີບ, ຈາກກຸ່ມກ໋ອບ 88 ນະຄອນຫຼວງ 10,81 ລ້ານກີບ, ຊ່ວຍເຫຼືອໃຫ້ໂດຍກົງຢູ່ແຂວງຈໍາປາສັກ, ສາລະວັນ ແລະ ແຂວງອັດຕະປື 215 ລ້ານກີບ ພິເສດໃນວັນທີ 10 ກັນຍາ 2019, ທ່ານປະທານສະພາບໍລິຫານທະນາຄານເອັສທີ ຈຳກັດ ກໍ່ໄດ້ມອບເງິນຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມຢູ່ 2 ແຂວງພາກກາງ ແລະ 4 ແຂວງພາກໃຕ້ 2,5 ຕື້ກີບ ໂດຍຜ່ານລັດຖະບານຊຶ່ງແມ່ນທ່ານ ທອງລຸນ ສີສຸລິດ ນາຍົກລັດຖະມົນຕີ ເປັນ ຜູ້ຕາງໜ້າຮັບ.

  ຈາກຜົນງານໃນການດໍາເນີນທຸລະກໍາການເງິນທີ່ຄ່ອງຕົວບວກກັບການປະກອບສ່ວນຊ່ວຍເຫຼືອສັງຄົມໃນໄລຍະຜ່ານມາ, ພັກ ແລະລັດຖະບານຈຶ່ງໄດ້ຕົກລົງປະດັບຫຼຽນໄຊແຮງງານຊັ້ນ II 1 ໜ່ວຍ, ຫຼຽນໄຊແຮງງານ ຊັ້ນ III 1 ໜ່ວຍ, ຫຼຽນໄຊພິລະອາດຫານຊັ້ນ II ແລະຊັ້ນ III ແນວລະ 1 ໜ່ວຍ ແລະໃນວັນທີ 7 ກັນ ຍາ 2019 ນີ້, ທະນາຄານດັ່ງກ່າວກໍ່ໄດ້ຈັດຕັ້ງການຍ້ອງຍໍເນື່ອງໃນວັນສ້າງຕັ້ງທະນາຄານແຫ່ງສປປ ລາວ ຄົບຮອບ 50 ປີ ໂດຍແມ່ນ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໃຫ້ກຽດປະດັບຫຼຽນໄຊແຮງງານຊັ້ນ II ແລະຊັ້ນ III ແລະໃບຍ້ອງຍໍໃຫ້ກົມກອງ ແລະ ບຸກຄົນຈໍານວນໜຶ່ງຢ່າງສົມກຽດ.

-----------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์