ບົວລະພາ ແບ່ງປັນນໍ້າໃຈຊ່ວຍຜູ້ປະສົບໄພນໍ້າຖ້ວມ

  ອາທິດທີ່ຜ່ານມາຫ້ອງການບໍລິສັດ ບົວລະພາ ກະສິກຳ-ປ່າໄມ້ ຈຳກັດ ແລະຄະນະຜູ້ບໍລິຫານຕະຫຼອດຮອດພະນັກງານທຸກຄົນພາຍໃນບໍລິສັດໄດ້ແບ່ງປັນນໍ້າໃຈດ້ວຍການຮ່ວມບໍລິຈາກເຄື່ອງອຸປະໂພກ ແລະ ບໍລິໂພກຊ່ວຍຜູ້ປະສົບໄພນໍ້າຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວໂດຍຝາກຜ່ານບໍລິສັດ ຮຸ່ງອາລຸນບໍລິການຂົນສົ່ງທີ່ມີການຫຼຸດລາຄາບໍລິການຊ້ວງນີ້ 50% ສຳລັບຝາກເຄື່ອງຂອງຝາກຊ່ວຍນໍ້າຖ້ວມ.

ທ່ານນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການບໍລິສັດບົວລະພາກະສິກຳ-ປ່າໄມ້ ຈຳກັດ ກ່າວວ່າ:  ດ້ວຍຄວາມເປັນຫ່ວງເປັນໄຍຄວາມເດືອດຮ້ອນຂອງພໍ່ແມ່ປະ ຊາຊົນຢູ່ບັນດາແຂວງພາກໃຕ້ຂອງລາວທີ່ໄດ້ຮັບຜົນກະທົບຈາກໄພນໍ້າຖ້ວມຫ້ອງການບໍລິສັດ ຄະນະອຳນວຍການ ແລະພະນັກງານທັງໝົດຂອງບົວລະພາກະສິກຳ-ປ່າ ໄມ້ ຈຳກັດຈຶ່ງໄດ້ທ້ອນໂຮມຮ່ວມແບ່ງນໍ້າຈິດນໍ້າໄຈປະກອບສ່ວນເຄື່ອງອຸປະໂພກ ແລະ ບໍລິໂພກເປັນຕົ້ນແມ່ນອາຫານແຫ້ງ, ເຄື່ອງໃຊ້, ເຄື່ອງນຸ່ງຫົ່ມເພື່ອນຳໄປມອບຊ່ວຍເຫຼືອຜູ້ປະສົບໄພນໍ້າຖ້ວມຢູ່ບ້ານວາປີໃຕ້ເມືອງວາປີ ແຂວງສາລະວັນ, ບ້ານບັງຊາຍ ເມືອງປະທຸມພອນ ແຂວງຈຳປາສັກ ແລະເມືອງຊົນບູລີ ແຂວງສະຫວັນນະເຂດ ລວມທັງໝົດມູນຄ່າ 25 ລ້ານກວ່າກີບ.

ທ່ານນາງ ສຸໄພວັນ ທ່ຽງຈັນໄຊ ກ່າວຕື່ມວ່າ: ການຊ່ວຍເຫຼືອສັງຄົມແມ່ນວຽກງານໜຶ່ງທີ່ສຳຄັນໜຶ່ງຊຶ່ງບໍລິສັດໄດ້ດຳເນີນຢ່າງຕໍ່ເນື່ອງຕະຫຼອດມາ ແລະ ໃນຕໍ່ໜ້າຫາກພໍ່ແມ່ປະຊົນລາວທົ່ວປະເທດຍັງມີຄວາມຕ້ອງການຄວາມຊ່ວຍເຫຼືອຕື່ມທາງບໍລິສັດກໍຈະພະຍາມປະກອບສ່ວນຕາມທ່າແຮງ ແລະຄວາມສາມາດຕື່ມອີກ.

------------

ໜັງສືພິມເສດຖະກິດ-ສັງຄົມ

• 23/09/2019