ມຽນມາ ສົ່ງອອກເສື້ອຜ້າເຕີບໂຕຕາມເປົ້າໝາຍ

  ອົງການອຸດສາຫະກຳຄາດວ່າຂະແໜງການຜະລິດເສື້ອຜ້າຂອງມຽນມາເຕີບໂຕຕາມເປົ້າໝາຍ 10 ຕື້ໂດລາສະຫະລັດໃນແຜນການສົ່ງອອກ 10 ປີ.ຕາມຂ່າວຕ່າງປະເທດລາຍງານວ່າລັດຖະມົນຕີກະຊວງການຄ້າມຽນມາລະບຸວ່າປະລິມານການສົ່ງອອກໃນປີງົບປະມານ 2018-2019 ຈົນເຖິງເດືອນສິງຫາສູງເຖິງ 4,37 ຕື້ໂດລາເມື່ອທຽບກັບຕົວເລກ 3,2 ຕື້ໂດລາໃນໄລຍະເວລາດຽວກັນຂອງປີກ່ອນເປັນການຂະຫຍາຍຕົວທີ່ເຕີບໂຕຂອງການສົ່ງອອກເຖິງ 1,17 ຕື້ໂດລາ ຊຶ່ງການສົ່ງອອກເສື້ອຜ້າຂອງມຽນມາເຕີບໂຕຂຶ້ນໃນແຕ່ລະປີໂດຍສະເພາະນັບຕັ້ງແຕ່ປີ 2013 ທີ່ສະຫະພາບເອີຣົບໃຫ້ສິດທິພິເສດກັບມຽນມາ ໂດຍມຽນມາສາມາດສົ່ງອອກທຸກຢ່າງຍົກເວັ້ນອາວຸດໄປຍັງຕະຫຼາດອີຢູໄດ້ໂດຍບໍ່ຕ້ອງເສຍພາສີ,ເຮັດໃຫ້ຕົວເລກການສົ່ງອອກເຕີບໂຕແບບກ້າວກະໂດດຈາກ 800 ລ້ານໂດລາໃນປີງົບປະມານ 2015-2016 ມາເປັນ 4 ຕື້ໂດລາ ໃນປີ ງົບປະມານນີ້,ປະທານສະມາຄົມຜູ້ຜະລິດເສື້ອຜ້າຂອງມຽນມາລະບຸວ່າຈຳນວນໂຮງງານທີ່ເພີ່ມຂຶ້ນໃນປີທີ່ຜ່ານມາເຮັດໃຫ້ປະລິມານການສົ່ງອອກເພີ່ມຂຶ້ນໄປນໍາ ແລະຈະເຫັນການລົງທຶນເພີ່ມຂຶ້ນຕື່ມອີກໃນປີນີ້ ດັ່ງນັ້ນ ຕົວເລກສົ່ງອອກໜ້າຈະເຕີບໂຕໄດ້ອີກໃນປີໜ້າ ຊຶ່ງຈະເຮັດໃຫ້ເຮົາສາມາດບັນລຸໄດ້ຕາມເປົ້າໝາຍທີ່ຕັ້ງໄວ້ຄື 10 ຕື້ໂດລາ.

ຢ່າງໃດກໍຕາມເປົ້າໝາຍການສົ່ງອອກ ແລະການສ້າງວຽກເຮັດ 1 ລ້ານຄົນໃນຂະແໜງການຜະລິດເສື້ອຜ້າຖືກກຳນົດຂຶ້ນພາຍໃຕ້ແຜນຍຸດທະສາດປີ 2014-2024 ຂອງສະມາຄົມຜູ້ປະກອບການເສື້ອຜ້າຂອງ ມຽນມາ.

  ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์