ກອງກາຍະສິນ ສະແດງພິເສດລະດົມປັດໄຈ ຊ່ວຍຜູ້ປະສົບໄພນໍ້າຖ້ວມ

  ກອງກາຍະສິນແຫ່ງຊາດ,ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວໄດ້ສະແດງກາຍະສິນຮອບພິເສດເພື່ອການກຸສົນລະ ດົມປັດໄຈຊ່ວຍເຫຼືອຜູ້ປະສົບໄພນໍ້າຖ້ວມໃນບັນດາແຂວງພາກກາງ ແລະພາກໃຕ້ຂອງລາວຂຶ້ນທີ່ໂຮງກາຍະສິນແຫ່ງຊາດໃນຄໍ່າຄືນວັນ ທີ 18 ກັນຍາ 2019.

ການສະແດງຮອບພິເສດຄັ້ງນີ້ມີລາຍການຕະຫຼົກ,ລາຍການໝານ້ອຍທີ່ແສນຮູ້,ງູໂຕໃຫຍ່ໆ ແລະລີງນ້ອຍທີ່ໜ້າຮັກ,ພ້ອມນີ້ຍັງມີລາຍການທີ່ຕື່ນເຕັ້ນ ແລະຫວາດສຽວຫຼາຍຊຶ່ງເປັນລາຍການທີ່ນັກກາຍະສິນກະກຽມໄປແຂ່ງຂັນລະດັບນານາຊາດຢູ່ປະເທດ ສສ ຫວຽດນາມໃນກາງເດືອນຕຸລາ ນີ້,ພິເສດໄປກວ່ານັ້ນຍັງມີນັກກາຍະສິນ 2 ໜຸ່ມສາວຊື່ດັງທີ່ຄວ້າລາງວັນຮອງອັນດັບ 2 ຈາກລາຍການສະແດງຄວາມສາມາດ Thailand’s GotTalent ຢູ່ປະເທດໄທມາແລ້ວເມື່ອປີທີ່ຜ່ານມານັ້ນກໍຄືທີມມິດຕະພາບກັນເອງເຂົ້າຮ່ວມສະແດງນໍາອີກ.

ຈຸດປະສົງຂອງການສະແດງຄັ້ງນີ້ແມ່ນເປັນການຫາລາຍໄດ້ ເພື່ອສົມທົບຊ່ວຍເຫຼືອຜູ້ປະສົບໄພ ນໍ້າຖ້ວມໃນບັນດາແຂວງພາກກາງ ແລະພາກໃຕ້ຂອງປະເທດລາວ,ນອກຈາກການສະແດງແລ້ວຍັງໄດ້ແຕ່ງຕັ້ງຄະນະລົງຂໍບໍລິຈາກ ຕາມຈຸດຕ່າງໆ ໃນຂອບເຂດໂຮງ ກາຍະສິນ ແລະຕັ້ງຈຸດຮັບບໍລິຈາກໜ້າງານສະແດງອີກດ້ວຍ.

ສໍາລັບລາຍຮັບຂອງການສະແດງເທື່ອນີ້ແມ່ນມີທັງໝົດ 11,15 ລ້ານກີບໃນນັ້ນໄດ້ຈາກການຂາຍປີ້ເຂົ້າຊົມ 7,14 ລ້ານກີບ, ຮັບບໍ ລິຈາກ 2,95 ລ້ານກີບ,ຝາກລົດ 60 ພັນກີບ ແລະກະຊວງຖະແຫຼງ ຂ່າວ ແລະການສື່ສານ ສສ ຫວຽດນາມ ບໍລິຈາກ 1 ລ້ານກີບ ຊຶ່ງ ເງິນຈໍານວນດັ່ງກ່າວແມ່ນຈະນໍາໄປຊ່ວຍເຫຼືອຜູ້ໄດ້ຮັບຜົນກະທົບຈາກໄພນໍ້າຖ້ວມຢູ່ພາກກາງ ແລະ ພາກໃຕ້ຂອງລາວ ໂດຍກອງກາຍະສິນແຫ່ງຊາດຈະບໍ່ມີການຫັກຄ່າໃຊ້ຈ່າຍໃດໆທັງສິ້ນ.

-------------

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์