ເຊກອງ ໃຫ້ເມືອງທ່າແຕງຮີລຮ້ອນແກ້ໄຂຜົນເສຍຫາຍຈາກນໍ້າຖ້ວມ

  ໃນວັນທີ 13 ກັນຍາ 2019  ທ່ານ ຖາວອນ ພົມມະໄລລຸນ ຮອງ ເຈົ້າແຂວງເຊກອງ ປະທານຄະນະ ກຳມະການປ້ອງກັນ ແລະຄວບຄຸມໄພພິບັດຂັ້ນແຂວງເນັ້ນໃຫ້ອົງການປົກຄອງເມືອງທ່າແຕງກໍຄືຄະນະກຳມະການປ້ອງກັນ ແລະຄວບຄຸມໄພພິບັດຂັ້ນເມືອງເອົາໃຈໃສ່ຢ່າງຮີບດ່ວນໃນການແກ້ໄຂສຸກເສີນຜົນເສຍຫາຍຈາກເຫດການນໍ້າຖ້ວມເປັນຕົ້ນແມ່ນລະບົບພື້ນຖານໂຄງລ່າງ ແລະ ເນື້ອທີ່ການຜະລິດ ກະສິກຳເຫຼົ່ານີ້ເປັນຕົ້ນ.

 ທ່ານ ສົມເພັດ ເອີດລັດດາ ວ່າການເລຂາພັກເມືອງເຈົ້າເມືອງທ່າແຕງໄດ້ລາຍງານໃຫ້ຮູ້ວ່າ: ຕໍ່ສະພາບການນໍ້າຖວ້ມທີ່ເກີດຂຶ້ນໃນໄລຍະຜ່ານມາຄະນະກຳມະການປ້ອງ ກັນ ແລະຄວບຄຸມຂັ້ນເມືອງ ໄດ້ຮີບຮ້ອນລົງຕິດຕາມ, ກວດກາ ຮ່ວມກັບຄະນະກຳມະການຂັ້ນ ແຂວງຕາມຈຸດຕ່າງໆໃນທົ່ວເມືອງພ້ອມທັງລະດົມກຳລັງພົນ, ພາຫະ ນະກົນຈັກເຊັ່ນ: ລົດດາມ ແລະລົດ ຈົກເພື່ອຂຸດຄອງລະບາຍນໍ້າທີ່ມີ ການອຸດຕັນພ້ອມທັງລະດົມກຳລັງ   ພົນໂດຍນໍາລົດເຊອາທະຫານ ເມືອງລົງຊ່ວຍເຫຼືອປະຊາຊົນໃນ ເຂດທີ່ນໍ້າຖ້ວມໜັກກ່ວາຈຸດອື່ນໆ ພາຍໃນເມືອງໄດ້ໂດຍປອດໄພ; ຈາກຜົນການສຳຫຼວດ ແລະປະເມີນຜົນເສຍຫາຍພາຍຫຼັງນໍ້າບົກແຫ້ງມີທັງໝົດ 6,83 ຕື້ກີບ, ໃນ ນີ້ພື້ນຖານໂຄງລ່າງເສຍຫາຍ 5,14 ຕື້ກີບ ໂດຍສະເພາະເສັ້ນທາງ ຖືກເຊາະເຈື່ອນ, ຂາດບາງຈຸດ ຈຳນວນ 11 ເສັ້ນ, ຊົນລະປະທານ ຖືກເປ້ເພເຊາະເຈື່ອນ 4 ແຫ່ງມູນຄ່າເສຍຫາຍ 1,35 ຕື້ກີບ, ອາຄານ ແລະ ກຳແພງໂຮງຮຽນ 3  ແຫ່ງ ເສຍຫາຍ 23 ລ້ານກີບ ແລະ ເນື້ອທີ່ນາປະຊາຊົນ 16 ບ້ານ, ມີ 231 ຄອບຄົວ, ມີ 38,38 ເຮັກຕາ ຖືກເສຍຫາຍ 165 ລ້ານ 44 ພັນກີບ, ໜອງປາເສຍຫາຍ 113 ໜອງມີປາ 495,100 ໂຕມູນຄ່າ 928 ລ້ານກີບ, ສັດລ້ຽງຕາຍ 216 ໂຕມູນຄ່າ 256 ລ້ານກີບ ນອກຈາກນີ້ຍັງມີເນື້ອທີ່ພືດຜັກອື່ນໆ ຈຳນວນເສຍຫາຍ 42,3 ເຮັກຕາ ມູນຄ່າ 471 ລ້ານກີບ.

 ໃນຂະນະດຽວກັນນັ້ນທ່ານຮອງເຈົ້າແຂວງຍັງໄດ້ເນັ້ນໃຫ້ເອົາໃຈໃສ່ສືບຕໍ່ກວດກາເກັບກຳຂໍ້ມູນໃຫ້ລະອຽດແທດເໝາະຕົວຈິງໂດຍເລັ່ງດ່ວນແກ້ໄຂສຸກເສີນຊຶ່ງຜົນເສຍ ຫາຍທີ່ເກີດຂຶ້ນໃນຂະແໜງ ການໃດແມ່ນຂະແໜງການນັ້ນຮັບ ຜິດຊອບໄປພ້ອມກັນນີ້ກໍຕ້ອງກຳ ນົດຈຸດຄວາມສ່ຽງ ແລະກະກຽມຄວາມພ້ອມດ້ານການຊ່ວຍເຫຼືອປະເພດເຄື່ອງອຸປະໂພກ, ບໍລິໂພກ ແລະຢາປົວພະຍາດເຫຼົ່ານີ້ເປັນຕົ້ນເພື່ອຊ່ວຍເຫຼືອຜູ້ທີ່ຖືກຜົນກະທົບເສຍຫາຍໃນເບື້ອງຕົ້ນໃຫ້ຖ່ວງທັນກັບສະພາບການໂດຍໄວ.

-----------------

ຂຽນໂດຍ: ສະຫຍາມ ຈັນທະສອນ

แชร์