ກຳມະບານ ທຫລ ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ

  ດ້ວຍຄວາມເປັນຫ່ວງເປັນໄຍຕໍ່ກັບພີ່ນ້ອງທີ່ໄດ້ຮັບຄວາມເດືອດຮ້ອນຈາກນໍ້າຖ້ວມອັນເນື່ອງຈາກມີຝົນຕົກໜັກຕິດຕໍ່ກັນຫຼາຍວັນທີ່ມາຈາກພາຍຸພັດຜ່ານເຂົ້າລາວໃນລະຫວ່າງທ້າຍເດືອນສິງຫາ ຫາຕົ້ນເດືອນກັນຍາ 2019 ອັນສົ່ງຜົນກະທົບຢ່າງໜັກໜ່ວງຕໍ່ຊີວິດການເປັນຢູ່, ຊັບສິນຂອງພໍ່ແມ່ປະຊາຊົນຢູ່ 2 ແຂວງພາກກາງ ແລະ 4 ແຂວງພາກໃຕ້ຊຶ່ງໄດ້ສ້າງຄວາມເສຍຫາຍຕໍ່ຊັບສິນ,ເສຍຊີວິດ-ສູນຫາຍຈຳນວນໜຶ່ງ, ພື້ນທີ່ທຳມາຫາກິນຂອງປະຊາຊົນ, ອາຄານບ້ານເຮືອນ, ໂຮງໝໍ-ສຸກສາລາ, ໂຮງຮຽນ, ຊົນລະປະທານ, ຂົວ, ຖະໜົນ ຫົນທາງ, ແຫຼ່ງນໍ້າກິນ-ນໍ້າໃຊ້ ແລະອື່ນໆ ເປັນຈຳນວນຫຼວງຫຼາຍ.

   ໃນວັນທີ 13 ກັນຍາ ຜ່ານມາທີ່ສຳນັກງານສູນກາງສະຫະພັນກຳມະບານລາວ, ສະຫະພັນກຳມະບານທະນາຄານແຫ່ງ ສປປ ລາວ ( ທຫລ) ຊຶ່ງນໍາໂດຍ ທ່ານ ນາງ ຂັນແກ້ວ ຫຼ້າມະນີເງົາ ປະທານສະຫະພັນກຳມະບານ ທຫລ ພ້ອມຄະນະໄດ້ນໍາເອົາວັດຖຸປັດໄຈທີ່ລະດົມຈາກສະມາຊິກກໍາມະບານໃນທົ່ວຂະແໜງການທະນາ ຄານລວມເປັນເງິນສົດ 20 ລ້ານກີບ ໄປມອບເພື່ອປະກອບສ່ວນຊ່ວຍເຫຼືອຜູ້ປະສົບໄພນໍ້າຖ້ວມຢູ່ບັນດາແຂວງພາກກາງ ແລະພາກໃຕ້ມີແຂວງສະຫວັນນະເຂດ, ຄຳມ່ວນ, ຈຳປາສັກ, ສາລະວັນ, ອັດຕະປື ແລະເຊກອງເຮັດໃຫ້ຊີວິດການເປັນຢູ່ຂອງປະຊາຊົນກັບຄືນສູ່ສະພາບປົກກະຕິເປັນກ້າວໆ ແລະຮັບໂດຍທ່ານ ນາງ ອາລີວົງ ໜໍ່ບຸນທຳຮອງປະທານຄະບໍລິຫານງານສູນກາງສະຫະພັນກຳມະບານລາວໂດຍມີພະນັກງານກ່ຽວຂ້ອງທັງ 2 ຝ່າຍເຂົ້າຮ່ວມ.

--------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 19/09/2019