ໄຟຟ້າຈຳປາສັກເສຍຫາຍ 2 ຕື້ກວ່າກີບ ຈາກນໍ້າຖ້ວມ

 ຕົ້ນເດືອນກັນຍານີ້ເກີດບັນຫານໍ້າຖ້ວມຢູ່ແຂວງພາກກາງ ແລະໃຕ້ຢ່າງໜັກໜ່ວງສະເພາະແຂວງຈຳປາສັກ ລັດວິສາຫະກິດໄຟຟ້າລາວສາຂາແຂວງດັ່ງກ່າວ ເສຍ ຫາຍ 2 ຕື້ກວ່າກີບ ແລະປະຈຸບັນໄດ້ມີການເລັ່ງມືສ້ອມແປງເພື່ອໃຫ້ປະຊາຊົນສາມາດຊົມໃຊ້ໄຟຟ້າໄດ້ເປັນປົກກະຕິ.

 ທ່ານ ຄູນ ບົວແພງພັນ ຫົວໜ້າລັດວິສາຫະກິດໄຟຟ້າລາວສາຂາແຂວງຈໍາປາສັກ ໄດ້ລາຍງານໃຫ້ຮູ້ວ່າ: ຜົນກະທົບຈາກພາຍຸພັດຜ່ານສູ່ແຂວງພາກກາງ ແລະພາກໃຕ້ຂອງລາວເຮັດໃຫ້ສົ່ງຜົນກະທົບນໍ້າຖ້ວມຄັ້ງຮ້າຍແຮງສູ່ບັນດາແຂວງຕ່າງໆສໍາລັບແຂວງຈໍາປາສັກແມ່ນມີຄວາມເສຍຫາຍໜັກພໍສົມຄວນ, ທຸກຂະແໜງການໄດ້ຮັບຜົນກະທົບສໍາລັບລັດວິສາຫະກິດໄຟຟ້າລາວສາຂາແຂວງຈໍາປາສັກ ເອງກໍ່ໄດ້ຮັບຜົນກະທົບບໍ່ໜ້ອຍ ແລະເກີດມີຄວາມເສຍຫາຍຕໍ່ລະບົບຕາຂ່າຍ, ໝໍ້ແປງໄຟ, ໝໍ້ນັບໄຟ ແລະອື່ນໆ ໃນ 10 ຕົວເມືອງພາຍໃນແຂວງ ແລະສົ່ງຜົນກະທົບເຮັດໃຫ້ມີຄວາມເສຍຫາຍທັງໝົດ 2 ຕື້ກວ່າກີບ.

 ທ່ານຫົວໜ້າໃຫ້ຮູ້ຕື່ມວ່າ: ມາຮອດກາງເດືອນກັນຍາ 2019 ສາມາດສະໜອງໄຟຟ້າໃຫ້ແຕ່ລະຈຸດທີ່ໄດ້ຮັບຜົນເສຍຫາຍຄື: ນະຄອນປາກເຊເປີດນໍາໃຊ້ໄຟຟ້າເປັນປົກກະຕິແລ້ວ 100%, ແຕ່ຄຸ້ມບ້ານຍັງມີການສ້ອມແປງຢູ່ເນື່ອງຈາກເສັ້ນທາງຂາດຕ້ອງໄດ້ໃຊ້ເຮືອໃນການຂົນສົ່ງອຸປະກອນເພື່ອນໍາໄປສ້ອມແປງ ແລະບັນດາເມືອງຕ່າງໆແມ່ນໄດ້ເປີດການນໍາໃຊ້ໄດ້ແລ້ວ 100%.

------------------

ຂ່າວ: ໂພທິຣາຊ

• 19/09/2019