ກະສິກຳເລັ່ງຟື້ນຟູການຜະລິດຢູ່ 6 ແຂວງ ພ້ອມກຳນົດການແກ້ໄຂເປັນ 4 ເຂດ

  ຜົນຂອງພາຍຸທີ່ພັດຜ່ານເຂົ້າລາວໃນໄລຍະທ້າຍເດືອນສິງຫາ ຫາ ຕົ້ນເດືອນກັນຍາຜ່ານມານີ້, ຂະແໜງກະສິກຳ ແລະປ່າໄມ້ກໍແມ່ນຂະແໜງໜຶ່ງທີ່ໄດ້ຮັບຜົນກະທົບໜັກໜ່ວງໂດຍສະເພາະເນື້ອທີ່ການປູກເຂົ້າ, ພືດ ແລະ ສັດລ້ຽງທຸກປະເພດລ້ວນໄດ້ຮັບຄວາມເສຍຫາຍ, ຊຶ່ງເນື້ອທີ່ເສຍຫາຍເບື້ອງຕົ້ນມີປະມານ 1,6 ແສນເຮັກຕາ, ຂະນະທີ່ການແກ້ໄຂເບື້ອງຕົ້ນກະຊວງກະສິກຳໄດ້ເລັ່ງໃສ່ການຟື້ນຟູໂດຍກຳນົດການແກ້ໄຂເປັນ 4 ເຂດ.

  ທ່ານ ສຸລາພອນ ອິນທະວົງ ຮອງຫົວໜ້າກົມປູກຝັງກະຊວງກະສິກຳ ແລະປ່າໄມ້ ໃຫ້ສຳພາດວ່າ: ຕາມການເກັບກຳມາຮອດວັນທີ 16 ກັນຍາ 2019 ໃນບັນດາ 6 ແຂວງພາກກາງ ແລະພາກ ໃຕ້ຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະອັດ ຕະປືເຫັນວ່າ ເນື້ອທີ່ການຜະລິດເບື້ອງຕົ້ນທີ່ເສຍ ຫາຍ 1,6 ແສນເຮັກຕາ, ມີ 1,5 ພັນບ້ານ, 1,3 ແສນຄອບຄົວຖືກກະທົບ, ດັ່ງນັ້ນເພື່ອເລັ່ງໃສ່ການຟື້ນຟູ ແລະແກ້ໄຂໃຫ້ທັນກັບສະພາບການ, ລັດຖະບານກໍຄືກະຊວງໄດ້ມີມາດຕະການແກ້ໄຂເບື້ອງຕົ້ນໂດຍໄດ້ອອກແຈ້ງການມອບໃຫ້ພະແນກກະສິກຳ ແລະປ່າໄມ້ສະເພາະ 6 ແຂວງ ສົມທົບກຳລັງຄົນ, ກຳລັງການຜະລິດຕ່າງໆ

ເພື່ອກຽມ ພ້ອມໂດຍແບ່ງອອກເປັນ 4 ເຂດຄື: ສຳລັບເຂດເນື້ອທີ່ ທີ່ຍັງບໍ່ໄດ້ຖືກຖ້ວມ ແມ່ນໃຫ້ເອົາໃຈໃສ່ເຝົ້າລະວັງສັດຕູພືດຈຳພວກບົ້ງຝູງເຂົ້າ, ບົ້ງຮຳໃບ, ດ້ວງກໍ, ພະຍາດໃບໄມ້ ແລະແມງແຄງເຂົ້າທີ່ຈະເຂົ້າມາທຳລາຍຜົນຜະລິດ; ສ່ວນເຂດທີສອງເປັນເຂດທີ່ຖ້ວມແຕ່ຍັງບໍ່ຕາຍ (ຖ້ວມໄລຍະ 5-21 ວັນ) ແມ່ນສາມາດບູລະນະຮັກສາໂດຍໃຫ້ສົ່ງວິຊາການລົງສົມທົບກັບປະ ຊາຊົນເອົາໃຈໃສ່ສໍາຫຼວດຕົ້ນເຂົ້າຂາດ ຝຸ່ນ ໃຫ້ໃສ່ຝຸ່ນຄືນ; ເຂດພື້ນທີ່ທີສາມ ເປັນເຂດນໍ້າຖ້ວມຂັງແຕ່ສາມາດລະບາຍໄດ້ແມ່ນໃຫ້ເລັ່ງລະບາຍນໍ້າອອກ, ພ້ອມໃຫ້ເຝົ້າລະວັງ 5 ສັດຕູພືດຄືກັບພື້ນທີ່ທຳອິດ, ຫາກໃບເຂົ້າຍັງຂຽວແມ່ນໃຫ້ຮັກສາລະດັບນໍ້າ; ເຂດທີສີ່ເຂດທີ່ເສຍຫາຍ 100% ແມ່ນຈະເລັ່ງໃສ່ເກັບກຳຂໍ້ມູນພື້ນທີ່ເສຍຫາຍ, ປະຈຸບັນຍັງບໍ່ສາມາດສັງລວມໄດ້ເທື່ອ ແລະ ຖ້າຫາກຮູ້ລະອຽດແລ້ວກໍຈະສຸມໃສ່ປູກພືດທົດແທນ ຫຼື ເຮັດນາຕ່າວສຳລັບພື້ນທີ່ທີ່ເໝາະສົມ, ສະ ເພາະແນວພັນເຂົ້າ ແລະພືດທີ່ຈະສະໜອງໃຫ້ກັບບັນດາແຂວງທີ່ໄດ້ຮັບຜົນກະທົບແມ່ນມີພຽງພໍແລ້ວ.

  ສຳລັບການຜະລິດລະດູແລ້ງປີນີ້ແມ່ນຈະເລັ່ງໃຫ້ໄວຂຶ້ນກວ່າປີຜ່ານມາກໍຄືທ້າຍເດືອນຕຸລາທີ່ຈະມາເຖິງນີ້ແມ່ນຈະໃຫ້ທົ່ວປະເທດເລີ່ມທຳການຜະລິດລະດູແລ້ງໂດຍເລີ່ມໄຖຄາດຕົກກ້າເພື່ອເປັນການທົດແທນຜົນຜະລິດທີ່ເສຍໄປໃນຊ່ວງການຜະລິດລະດູຝົນສຳລັບພື້ນທີ່ທີ່ມີຄວາມເໝາະສົມ ແລະ ມີລະບົບຊົນລະປະທານໄປຮອດໄປເຖິງ, ສ່ວນເຂດທີ່ບໍ່ສາມາດຜະລິດເຂົ້າໄດ້ແມ່ນຈະເລັ່ງໃຫ້ປູກພືດທີ່ມີຕະຫຼາດຮອງຮັບ, ພ້ອມນັ້ນຍັງເປັນພືດໄລຍະສັ້ນຕົ້ນຕໍແມ່ນພືດຕະກຸນຖົ່ວເຊັ່ນ: ຖົ່ວດິນ, ຖົ່ວເຫຼືອງ, ຖົ່ວຂຽວ, ສາລີຫວານ, ສາລີແຂງ ແລະອື່ນໆທີ່ຕະຫຼາດຕ້ອງການຫຼາຍ.

  ທ່ານຮອງຫົວໜ້າກົມປູກຝັງຍັງໃຫ້ຮູ້ອີກວ່າ: ສະເພາະຜົນກະທົບທີ່ລວມພວມປະເຊີນໃນປະຈຸບັນ ກໍຄື 6 ແຂວງພາກກາງ ແລະພາກໃຕ້ຂອງລາວນີ້, ແນ່ນອນວ່າຜົນກະທົບດັ່ງກ່າວອາດສົ່ງຜົນເຮັດໃຫ້ຄາດໝາຍຂອງການຜະລິດໃນປີນີ້ບໍ່ສາມາດບັນລຸໄດ້ຕາມແຜນການ, ຈາກການກະທົບຄັ້ງນີ້ຈະເຮັດໃຫ້ການຜະລິດເສຍຫາຍປະມານ 40%, ແຕ່ໂດຍລວມແລ້ວເຫັນວ່າລາວເຮົາຍັງບໍ່ເຖິງຂັ້ນຂາດແຄນເຂົ້າເທື່ອ, ເນື່ອງຈາກບັນດາແຂວງພາກກາງຕອນເໜືອ ແລະ ພາກເໜືອຂອງລາວຍັງມີເຂົ້າແຮຢູ່ ຈຶ່ງເຮັດໃຫ້ມາຮອດປະຈຸບັນລາວບໍ່ທັນໄດ້ຊື້ເຂົ້າຈາກຕ່າງປະເທດ.

----------------

ໜັງສືພິມເສດຖະກິດ-ສັງຄົມ

แชร์