ລົດຖີບ ລາຍການໄບຟໍເຮີ ວຽງຈັນ 2019 ກຽມຄັດເລືອກທີມຊາດຮ່ວມຊີເກມ

     ການແຂ່ງຂັນກີລາລົດຖີບລາຍການໄບຟໍເຮີ ວຽງຈັນ 2019 ຊີງແຊ໋ມຫຼາຍລາຍການຈະເປີດສາກຂຶ້ນໃນຕົ້ນເດືອນມີນາທີ່ຈະມາເຖິງນີ້ເພື່ອເປັນການຢຸດຄວາມຮຸນແຮງຕໍ່ແມ່ຍິງ (Bike For Her) ແລະຄັດເລືອກນັກກີລາລົດຖີບທີ່ມີພອນສະຫວັນດີເດັ່ນຕິດທີມຊາດເພື່ອກຽມສົ່ງເຂົ້າຮ່ວມແຂ່ງຂັນງານມະຫາກຳກີລາຊີເກມຄັ້ງທີ 30 ທີ່ປະເທດຟິລິບປິນຮັບກຽດເປັນເຈົ້າພາບຈະຈັດຂຶ້ນໃນທ້າຍປີນີ້.

   ອີງຕາມຂໍ້ມູນຈາກເຟສບຸກໄບຟໍເຮີ ວຽງຈັນ 2019 ແຈ້ງໃຫ້ຮູ້ວ່າ:  ເພື່ອເປັນການສືບຕໍ່ສົ່ງເສີມພັດທະນານັກກີລາລົດຖີບທີ່ມີພອນສະຫວັນດີເດັ່ນຕິດທີມຊາດເພື່ອກຽມສົ່ງເຂົ້າຮ່ວມແຂ່ງຂັນງານມະຫາກຳກີລາຊີເກມຄັ້ງທີ 30 ທີ່ປະເທດຟິລິບປິນຮັບກຽດເປັນເຈົ້າພາບຈະຈັດຂຶ້ນໃນທ້າຍປີນີ້ ແລະ ເປັນການກຸສົນເພື່ອຢຸດຄວາມຮຸນແຮງຕໍ່ແມ່ຍິງ ແລະອີກດ້ານໜຶ່ງກໍ່ຍັງເປັນການສົ່ງເສີມການອອກກຳລັງກາຍເພື່ອສຸຂະພາບ ແລະມິດຕະພາບແລກປ່ຽນບົດຮຽນໃຫ້ບັນດາສະໂມສອນຕ່າງໆ.ດັ່ງນັ້ນ,ໃນວັນທີ 10 ມີນາທີ່ຈະມາເຖິງນີ້ສະຫະພັນລົດຖີບແຫ່ງຊາດລາວຮ່ວມມືກັບວາລະສານຂວັນໃຈເພື່ອການກຸສົນຈະຈັດການແຂ່ງຂັນລົດຖີບຊີງແຊ໋ມຫຼາຍລາຍການໂດຍຈະນຳໃຊ້ຖະໜົນອ້ອມຂ້າງນະຄອນຫຼວງວຽງຈັນ ບາງເສັ້ນທາງເປັນການຊີງໄຊຊີງຄວາມເປັນ 1 ທັງປະເພດຍິງ ແລະປະເພດຊາຍຂອງແຕ່ລະລາຍການ, ໃນນີ້ສຳລັບນັກກີລາທີ່ສາມາດຕິດອັນດັບທີ 1, ທີ 2 ແລະທີ 3 ຈະໄດ້ຮັບຂັນແຊ໋ມ, ລາງວັນເງິນສົດ, ເສື້ອສັນຍາ ລັກຂອງນັກປຣັ່ນມືອາຊີບ ແລະ ຫຼຽນລາງວັນມອບໃຫ້.

  ລາຍການນີ້ມີການຊີງໄຊກັນທັງໝົດ 12 ລາຍການ, ໃນນັ້ນ 11 ລາຍການແມ່ນການແຂ່ງຂັນແບບມືອາຊີບ ແລະນັກກີລາຈະໄດ້ເສຍຄ່າສະມັກຜູ້ໜຶ່ງ 2 ແສນກີບປະເພດລົດກວກໄລຍະທາງ 90 ກິໂລ ແມັດມີ 3 ລາຍການຄື: ຮຸ່ນທົ່ວໄປ, ຮຸ່ນອາຍຸ 30-39 ປີ ແລະຮຸ່ນອາຍຸ 40 ປີ ປະເພດລົດເທັນເທີນຍິງໄລຍະທາງ 90 ກິໂລແມັດ ມີ 2 ລາຍການຄື: ຮຸ່ນອາຍຸບໍ່ເກີນ 35 ປີລົງມາ ແລະຮຸ່ນອາຍຸ 35 ປີ ຂຶ້ນໄປ, ປະເພດລົດກວກໄລຍະທາງ 90 ກິໂລຍິງມີ 2 ລາຍການຄື: ຮຸ່ນອາຍຸບໍ່ເກີນ 35 ປີລົງມາ ແລະຮຸ່ນອາຍຸ 35 ປີ ຂຶ້ນໄປ ແລະປະເພດລົດເທັນເທີນໄລຍະທາງ 90 ແມັດຊາຍມີ 4 ລາຍການປະກອບມີຮຸ່ນທົ່ວໄປ, ຮຸ່ນອາຍຸ 30-39 ປີ ແລະຮຸ່ນອາຍຸ 40-49 ປີ, ຮຸ່ນ 50 ປີ ທົ່ວໄປທັງ 4 ປະເພດດັ່ງກ່າວນັກກີລາຈະແຂ່ງຂັນຈາກຈຸດເສັ້ນໄຊໃນຕົວເມືອງນະ ຄອນຫຼວງວຽງຈັນ ມຸ້ງໜ້າໄປທີ່ເມືອງສັງທອງ ບ້ານປາກຕອນແລ້ວໂຄ້ງກັບມາຈຸດເດີມຜູ້ໃດມາຮອດເສັ້ນໄຊກ່ອນຜູ້ນັ້ນຈະໄດ້ຊະນະເລີດອັນດັບທີ 1 ໄປຄອງສ່ວນລາຍການທີ 12 ແມ່ນການແຂ່ງຂັນຄາລະວານຖີບລົດລາຍການນີ້ນັກກີລາຈະໄດ້ເສຍຄ່າສະໝັກຜູ້ໜຶ່ງ 120.000 ກີບຈະແຂ່ງຂັນພາຍໃນຕົວເມືອງໃນໄລຍະທາງ 13 ກິໂລແມັດຊຶ່ງຈະມີລາງວັນທີ່ລະລຶກມອບໃຫ້.     

แชร์