3 ພາກສ່ວນ ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ

ໃນຕອນແລງຂອງວັນທີ 17 ກັນຍາ 2019 ທີ່ສຳນັກງານນາຍົກລັດຖະມົນຕີ (ສນຍ), ທ່ານ ທອງລຸນ ສີສຸລິດ, ນາຍົກລັດຖະມົນຕີໄດ້ຕາງໜ້າລັດຖະບານຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມຈາກເຂດເສດຖະກິດພິເສດສາມຫຼ່ຽມຄຳ 3.000.000.000 ກີບ, ກ່າວມອບໂດຍທ່ານ ຈ້າວ ເຫວີຍ, ປະທານສະພາບໍລິຫານເຂດ ;

ທະນາຄານ ICBC 180.000 ໂດລາ, ກ່າວມອບໂດຍທ່ານ ຊຸ່ນ ເຟີງເລ (MR. Sun Fenglei), ຜູ້ອຳນວຍການທະນາຄານ ICBC ສາຂານະຄອນຫຼວງວຽງ ຈັນ; ບໍລິສັດ ໄຟຟ້ານໍ້າເທີນ 2 ຈຳນວນ 1.000.000.000 ກີບ, ກ່າວມອບໂດຍທ່ານ ໂຟລ້ອງ ເປໂລ້ (MR. Florent Perrot), ຮອງອຳນວຍການ ບໍລິສັດ ໄຟຟ້ານໍ້າເທີນ 2, ຊຶ່ງມີພະນັກງານທີ່ກ່ຽວຂ້ອງຂອງຫ້ອງວ່າການສຳນັກງານນາຍົກລັດຖະມົນຕີ,ກະຊວງແຮງງານ ແລະສະຫວັດດີການສັງຄົມ ແລະ ພາກສ່ວນທີ່ນຳເງິນມາມອບເຂົ້າຮ່ວມ.

 ໃນໂອກາດນີ້, ທ່ານ ນາຍົກລັດຖະມົນຕີ ໄດ້ແຈ້ງສະພາບຜົນກະທົບຈາກໄພນໍ້າຖ້ວມໃນປີນີ້ແມ່ນໜັກໜ່ວງ ແລະກວມເອົາພື້ນທີ່ກວ້າງຂວາງ, ສ້າງຄວາມເສຍຫາຍຕໍ່ຊີວິດ ແລະ ຊັບສິນ ຂອງປະຊາຊົນ ເປັນຈຳນວນຫຼວງຫຼາຍ, ຊຶ່ງລັດຖະບານ ກໍ່ຄືບັນດາຂະແໜງການ, ທ້ອງຖິ່ນ ແລະ ພາກສ່ວນຕ່າງໆໃນທົ່ວສັງຄົມໄດ້ສຸມໃສ່ໃຫ້ການຊ່ວຍເຫຼືອແກ່ປະຊາຊົນຜູ້ປະສົບໄພນໍ້າຖ້ວມ. ພ້ອມກັນນັ້ນທ່ານນາຍົກລັດຖະມົນຕີກໍ່ໄດ້ສະແດງຄວາມຂອບໃຈຕໍ່ພາກສ່ວນທີ່ໄດ້ນຳເອົາເງິນມາມອບເພື່ອຊ່ວຍເຫຼືອຜູ້ປະ

ສົບໄພນໍ້າຖ້ວມໃນຄັ້ງນີ້, ຊຶ່ງຈະຊ່ວຍປະກອບສ່ວນເຮັດໃຫ້ປະຊາຊົນມີກຳລັງໃຈ, ແກ້ໄຂຜົນກະທົບ ແລະຟື້ນຟູຊີວິດການເປັນຢູ່ຂອງປະຊາຊົນທີ່ປະສົບໄພນໍ້າຖ້ວມໃຫ້ກັບຄືນສູ່ສະພາບປົກກະຕິໂດຍໄວ. ລັດຖະບານຈະນຳເອົາເງິນຈຳນວນດັ່ງກ່າວມອບໃຫ້ກະຊວງແຮງງານ ແລະ ສະຫວັດດີການສັງຄົມເພື່ອນຳໄປຊ່ວຍເຫຼືອບັນເທົາທຸກແກ່ຜູ້ປະສົບໄພນໍ້າຖ້ວມຢູ່ທ້ອງຖິ່ນຕ່າງໆ.

--------------

ຂຽນໂດຍ: ຫສນຍ

ພາບ ແລະຂ່າວຈາກ: ນສພ ເສດຖະກິດ-ສັງຄົມ

แชร์