ສສຊ ມອບເຄື່ອງບັນເທົາທຸກໃຫ້ເມືອງໂຂງ

 ເມື່ອວັນທີ 11 ກັນຍາ 2019 ທ່ານ ສົມໄຊ ສີຫາຈັກ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 15 ແຂວງຈຳປາສັກ, ໄດ້ສົມທົບກັບທ່ານນາງ ຄຳພູ ລິດທິສັກ ແລະທ່ານ ພູວັນ ສີສຸພົນ ສະມາຊິກສະພາປະຊາຊົນ ແຂວງຈຳປາສັກປະຈຳ ເຂດເລືອກຕັ້ງເມືອງໂຂງ ແລະພາກສ່ວນທີ່ກ່ຽວຂ້ອງໄດ້ນຳເອົາເຄື່ອງອຸປະໂພກ ແລະບໍລິໂພກເປັນ ຕົ້ນ: ເຂົ້າສານ, ເຄື່ອງນຸ່ງຫົ່ມ, ນ້ຳດື່ມ ແລະ ອາຫານແຫ້ງຈຳນວນໜຶ່ງໄປມອບໃຫ້ກັບປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ວັດບ້ານຫ້ວຍໄຮທີ່ຂຶ້ນກັບກຸ່ມນາຝັ່ງ ແລ້ວນຳໄປແຈກຢາຍຕໍ່ໄປ.

 ທ່ານ ນາງ ຄຳພູ ລິດທິສັກ ລາຍງານໃຫ້ຮູ້ວ່າ: ເມືອງໂຂງມີ ຈຳນວນບ້ານທັງໝົດ 114 ບ້ານ, ໃນນີ້ມີບ້ານທີ່ໄດ້ຮັບຜົນກະທົບຈຳນວນ 99 ບ້ານ, ມີ 4.386 ຄອບ ຄົວ, ມີປະຊາຊົນໄດ້ຮັບຄວາມ ເດືອດຮ້ອນ 21.059 ຄົນ, ຍິງ 11.375 ຄົນ, ມີເນື້ອທີ່ທຳການຜະລິດຖືກຖ້ວມ 3.568 ກວ່າເຮັກຕາ, ທາງດ້ານວຽກງານການສຶກສາມີໂຮງຮຽນຖືກນ້ຳຖ້ວມບໍ່ສາມາດເປີດຮຽນໄດ້ມີ 40 ແຫ່ງ, ເສັ້ນທາງຖືກຖ້ວມມີ 12 ເສັ້ນ, ໃນນັ້ນເປ່ເພເສຍຫາຍໜັກບໍ່ສາມາດສັນຈອນໄດ້ມີ 1 ເສັ້ນ (ຈຸດທາງ ເຂົ້າບ້ານນາຝັ່ງ) ແລະ ໃນຈຳ  ນວນ 99 ບ້ານທີ່ໄດ້ຮັບ ຜົນ ກະທົບ ນັ້ນ ມີບ້ານທີ່ໄດ້ຮັບຜົນກະ ທົບໜັກຈຳນວນ 6 ບ້ານຄື: ບ້ານ ຫາງສັນ, ທ່າໂພເໜືອ, ບຸ່ນນ້ອຍ, ນາລານ, ຫ້ວຍໄຮ ແລະບ້ານລົມ ພັດ ລວມມີທັງໝົດ 457 ຄອບຄົວ, ປະຊາຊົນ 2.403 ຄົນ, ຍິງ 1.245 ຄົນ, ຊຶ່ງປະຊາຊົນທັງໝົດແມ່ນໄດ້ຮັບການອົບພະຍົກໄປສະຖານທີ່ປອດໄພ; ປະຈຸບັນນີ້ ນ້ຳຂອງມີລະດັບຫຼຸດລົງພໍສົມຄວນສະນັ້ນມີບາງຄອບຄົວກໍ່ຄ່ອຍທະຍອຍເຂົ້າມາເຮືອນຂອງຕົນເພື່ອທຳການອະນາໄມ ແລະຂົນວັດຖຸສິ່ງຂອງເຄື່ອງໃຊ້ຈຳເປັນເຂົ້າມາເຮືອນຂອງຕົນ.

  ທ່ານ ສົມໄຊ ສີຫາຈັກ ໃຫ້ຮູ້ວ່າ: ເຄື່ອງທີ່ນຳມາມອບໃນຄັ້ງນີ້ປະກອບມີເຄື່ອງນຸ່ງຫົ່ມ, ນ້ຳດື່ມ, ເຂົ້າສານ ແລະອາຫານແຫ້ງເພື່ອເປັນການບັນເທົາທຸກໃຫ້ກັບພໍ່ແມ່ປະຊາຊົນບັນດາເຜົ່າທີ່ໄດ້ຮັບຜົນກະທົບຈາກໄພນ້ຳຖ້ວມຊຶ່ງເຄື່ອງດັ່ງກ່າວສ່ວນໃຫຍ່ແມ່ນໄດ້ມາຈາກການລະດົມນັກທຸລະກິດ,ພໍ່ຄ້າຊາວຂາຍ, ລວມໄປເຖິງພໍ່ແມ່ປະຊາ ຊົນບັນດາເຜົ່າທີ່ເຫັນໄດ້ເຖິງຄວາມເດືອດຮ້ອນເຖິງແມ່ນວ່າເຈົ້າຂອງເຄື່ອງເຫຼົ່ານັ້ນຈະບໍ່ໄດ້ລົງມອບດ້ວຍຕົນເອງ ແຕ່ພວກເຂົາກໍ່ມີຈິດໃຈອັນດີງາມມອບເຄື່ອງຈຳນວນດັ່ງກ່າວໂດຍຜ່ານ ສສຊ ແລະ ສສຂ ຕາງໜ້າລົງມາມອບສູ່ມືປະຊາຊົນໃຫ້ໄດ້ຢ່າງທົ່ວເຖິງ.

---------------

ຂຽນໂດຍ: ພຸດທະສິນ ວົງວິໄລທອງ

แชร์