ທະນາຄານພັດທະນາລາວ ສາຂາຄຳມ່ວນ ຕັ້ງເປົ້າລະດົມເງິນຝາກໃຫ້ໄດ້ 354 ຕື້ກີບ

  ທ່ານ ປາດຖະໜາ ແກ້ວບຸນໄຊ ຮັກສາການຫົວໜ້າທະນາຄານພັດທະນາລາວສາຂາແຂວງ ຄໍາມ່ວນໃຫ້ຮູ້ວ່າ: ສໍາລັບແຜນ ການສູ້ຊົນໃນປີ 2019 ດ້ານວຽກງານສິນເຊື່ອທາງທະນາຄານໄດ້ວາງເປົ້າໝາຍໄວ້ 50 ຕື້ກີບ ໂດຍເລັ່ງໃສ່ທຸລະກິດຂະໜາດນ້ອຍ ແລະກາງ (SME) ພ້ອມທັງສົ່ງເສີມການຜະລິດເປັນສິນຄ້າ, ຊຶ່ງໄດ້ສະ ໜອງແຫຼ່ງທຶນໃຫ້ແກ່ 8 ຂະແໜງການເສດຖະກິດຄື: ອຸດສາຫະກໍາ, ການຄ້າ, ການບໍລິການ, ກໍ່ສ້າງ, ຂົນສົ່ງ, ກະສິກໍາ, ຫັດຖະກໍາ ແລະອື່ນໆ ແຕ່ການສະໜອງສິນເຊື່ອແມ່ນຢູ່ບົນພື້ນ ຖານຂໍ້ມູນທີ່ຊັດເຈນ ລັກສະນະ ຮ່ວມລົງທຶນໝາຍຄວາມວ່າຜູ້ ປະກອບການຕ້ອງມີທຶນແລ້ວ 60% ສ່ວນທີ່ເຫຼືອແມ່ນທະນາຄານສະໜອງສິນເຊື່ອໃຫ້ 40%, ສ່ວນວ່າເງິນຝາກທາງທະນາຄານຕັ້ງເປົ້າໝາຍໄວ້ໝົດປີໃຫ້ໄດ້ 354 ຕື້ກີບໃນນັ້ນປະກອບມີເງິນຝາກກະແສລາຍວັນ, ຝາກປະຢັດ, ຝາກປະຈໍາ.

  ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ 2019 ວົງເງິນໃນການປະຕິບັດສິນເຊື່ອແມ່ນສາມາດຈັດຕັ້ງປະຕິບັດໄດ້50% ຂອງແຜນການປີ ສັງເກດເຫັນໄດ້ ວ່ານັກທຸລະກິດຈໍານວນໜຶ່ງຍັງມີ ຄວາມລະມັດລະວັງກ່ຽວກັບການ ນໍາໃຊ້ທຶນຢູ່ໂດຍການນໍາໃຊ້ທຶນ ຂອງຕົນເອງໄປກ່ອນເພື່ອລໍຖ້າ ການຂະຫຍາຍຕົວຂອງເສດຖະກິດ ແລະອີກສ່ວນໜຶ່ງແມ່ນມີເງື່ອນໄຂ ບໍ່ທັນພຽງພໍໃນການກູ້ຢືມ, ດ້ານ ແຫຼ່ງທຶນ ຫຼື ດ້ານເງິນຝາກໃນໄລ ຍະ 6 ເດືອນຕົ້ນປີ 2019 ນີ້ ທາງ ທະນາຄານແມ່ນສາມາດລະດົມເງິນຝາກໄດ້ 100% ແຕ່ວ່າເປົ້າ ໝາຍສິນເຊື່ອນັ້ນສ່ວນຫຼາຍແມ່ນເລັ່ງໃສ່ສິນເຊື່ອທຸລະກິດຂະໜາດນ້ອງ-ຂະໜາດກາງ ແລະສົ່ງເສີມການຜະລິດເປັນສິນຄ້າ, ສໍາລັບ ການກູ້ຢືມແມ່ນແບ່ງອອກເປັນ 3 ໄລຍະຄື: ໄລຍະສັ້ນ, ໄລຍະກາງ ແລະໄລຍະຍາວ ຊຶ່ງໄລຍະສັ້ນແມ່ນ ເປັນທຶນໝູນວຽນແຕ່ 1 ປີລົງມາ, ໄລຍະກາງແມ່ນ 1-3 ປີ ແລະໄລຍະຍາວແມ່ນ 3 ປີຂຶ້ນໄປ.

 ໃນການໃຫ້ສິນເຊື່ອແມ່ນບໍ່ໄດ້ຈໍາແນກປະເພດທຸລະກິດ, ຕໍ່ກັບການກໍານົດວົງເງິນ, ກໍານົດເວລາ ແລະອັດຕາດອກເບ້ຍບໍ່ວ່າຈະກູ້ໄປໃຊ້ໃນຂະແໜງການເສດຖະກິດໃດກໍ່ແລ້ວແຕ່ຈະຂຶ້ນກັບຂະແໜງຂອງທຸລະກິດ, ຈະຂຶ້ນກັບຂໍ້ມູນໂຄງການຕົວຈິງ, ຂຶ້ນກັບການວິເຄາະສາມາດຊຳລະທັງຕົ້ນທຶນ ແລະດອກເບ້ຍ,ນອກຈາກນີ້ແລ້ວທະນາຄານ ພັດທະນາລາວ ສາຂາຄໍາມ່ວນກໍ່ຍັງມີຫຼາກຫຼາຍຜະລິດຕະພັນອອກຮັບໃຊ້ສັງຄົມເຊັ່ນ: ຜະລິດຕະພັນ mobile banking, unipay ສໍາ ລັບຊໍາລະຄ່າສິນຄ້າ, ຊໍາລະຄ່ານໍ້າ ປະປາ, ຄ່າໄຟຟ້າ, ໂອນເງິນ, ຊື້ບັດ ຕື່ມເງິນຕ່າງໆຢູ່ໂທລະສັບມືຖືຂອງ ທ່ານດ້ວຍຄວາມວ່ອງໄວ ພ້ອມ ກັນນັ້ນຍັງມີການບໍລິການບັດ ATM, ຕູ້ເອທີເອັມສໍາລັບຝາກ-ຖອນເງິນຕ່າງໆ ຫຼື ຊໍາລະຜ່ານຕູ້ເອທີເອັມດ້ວຍຄວາມສະດວກສະບາຍ ແລະສາມາດນໍາໃຊ້ຫຼາຍປະ ເທດທົ່ວໂລກ, ບັດເອທີເອັມທະນາຄານພັດທະນາລາວຍັງສາມາດໃຊ້ຮ່ວມກັບຕູ້ເອທີເອັມຂອງທະນາຄານອື່ນໄດ້ອີກ, ຮັບບໍລິການໂອນເງິນຕາທັງພາຍໃນ ແລະ ຕ່າງປະເທດໂດຍຜ່ານລະບົບ WESTERNUNION ມີຄວາມສະດວກ, ວ່ອງໄວ, ຊັດເຈນ, ຮັບບໍລິການຝາກເງິນ, ອອກໃບຢັ້ງຢືນຖານະການເງິນ, ບໍລິການສິນເຊື່ອ, ອອກໜັງສືສິນເຊື່ອຕ່າງໆ ແລະຮັບບໍລິການເປັນຕົວແທນຂາຍປະກັນໄພຂອງບໍລິສັດລ້ານຊ້າງປະກັນໄພນໍາອີກ.

 ທ່ານ  ປາດຖະໜາ ແກ້ວບຸນໄຊ ກ່າວຕື່ມວ່າ: ຜ່ານການເຄື່ອນໄຫວເຮັດທຸລະກິດຂອງທະນາຄານໃນໄລຍະ 6 ເດືອນຜ່ານມາກໍ່ເຫັນວ່າມີທັງຂໍ້ສະດວກ ແລະຂໍ້ຫຍຸ້ງ ຍາກຫຼາຍຢ່າງເປັນຕົ້ນຂໍ້ສະດວກທາງຄະນະພັກຜູ້ອໍານວຍການສໍານັກງານໃຫຍ່ກໍ່ໄດ້ໃຫ້ອໍານວຍຄວາມສະດວກໃນການເຄື່ອນໄຫວພາຍໃຕ້ຂໍ້ກຳນົດກົດລະບຽບ,ຄໍາແນະນຳຕ່າງໆທີ່ໄດ້ກຳນົດໄວ້ ແລະໄດ້ ມີອໍານາດການປົກຄອງທ້ອງຖິ່ນ ໄດ້ໃຫ້ຄວາມຊ່ວຍເຫຼືອແນະນໍາເພື່ອຄວາມສະດວກໃນການເຄື່ອນໄຫວ, ບັນດາພະແນກການອ້ອມຂ້າງໃຫ້ຄວາມຮ່ວມມືໃນການແກ້ໄຂຂໍ້ຂັດແຍ້ງຕ່າງໆໄດ້ເປັນຢ່າງດີ ແລະອ້າຍເອື້ອຍນ້ອງພະນັກງານທັງໝົດພາຍໃນທະນາຄານໄດ້ພ້ອມໃຈກັນໂດຍອີງໃສ່ວິຊາສະເພາະຂອງໃຜລາວຈິ່ງເຮັດໃຫ້ ວຽກງານທະນາຄານສາມາດດໍາ ເນີນໄປໄດ້ຕາມລະດັບຄາດໝາຍ ທີ່ວາງໄວ້, ຄຽງຄູ່ກັບຂໍ້ສະດວກ ທາງທະນາຄານກໍ່ຍັງມີຂໍ້ຫຍຸ້ງຍາກທີ່ຍັງຕ້ອງໄດ້ສືບຕໍ່ແກ້ໄຂ ຊຶ່ງໃນປະຈຸບັນອີງໃສ່ເສດຖະກິດ ໂດຍລວມການດໍາເນີນວິຊາສະ ເພາະແມ່ນຍັງບໍ່ທັນໄດ້ຕາມແຜນ ການເປັນຕົ້ນວຽກງານສິນເຊື່ອ ແມ່ນບໍ່ໄດ້ຕາມແຜນທີ່ກໍານົດໄວ້ ໂດຍສະເພາະແມ່ນການຂະຫຍາຍ ສິນເຊື່ອ ແລະການເກັບໜີ້ສິນຄືນ ນັກທຸລະກິດຈໍານວນໜຶ່ງຍັງບໍ່ກ້າຕັດສິນໃຈ (ຍັງລັງເລຢູ່) ກັບເສດ ຖະກິດໃນຍຸກປະຈຸບັນ, ນັກທຸລະກິດ ຈໍານວນໜຶ່ງກໍ່ຢຸດກິດຈະການຍ້ອນດໍາເນີນຕໍ່ໄປບໍ່ໄດ້, ບາງບໍລິສັດເຖິງ ວ່າຈະດໍາເນີນຕໍ່ໄປແຕ່ກໍ່ພໍໄດ້ແຕ່ ປະຄອງຕົວເອງເຮັດໃຫ້ວຽກງານ ສິນເຊື່ອບໍ່ສາມາດຂະຫຍາຍໄດ້ ແລະຜູ້ທີ່ທະນາຄານໃຫ້ທຶນໄປ ແລ້ວກໍ່ບໍ່ສາມາດສົ່ງທຶນຄືນໃຫ້ ທະນາຄານໄດ້, ບາງບໍລິສັດແມ່ນ ສົ່ງຜົນກໍ່ທະນາຄານຢ່າງໃຫຍ່ ຫຼວງ, ບາງບໍລິສັດຊໍ້າບໍ່ໝໍາຍັງບໍ່ຍອມຮັບການແກ້ໄຂດ້ວຍຄວາມຈິງໃຈ.  

  ດ້ານວຽກງານການຄຸ້ມຄອງການນໍາໃຊ້ເງິນກີບ ແລະເງິນຕາຕ່າງປະເທດທາງທະນາຄານກໍ່ໄດ້ ມີການຈັດຕັ້ງປະຕິບັດ, ມີການຄຸ້ມຄອງເງິນກີບ ແລະກໍ່ໄດ້ເປັນສ່ວນ ໜຶ່ງທີ່ໄດ້ຮ່ວມກັບທະນາຄານແຫ່ງ ສປປ ລາວ ພາກກາງແຂວງສະ ຫວັນນະເຂດຊຶ່ງໃນແຕ່ລະປີກໍ່ໄດ້ ມີການປະຊຸມຢູ່ພາຍໃນແຂວງ  (ຫ້ອງວ່າການປົກຄອງແຂວງ) ກ່ຽວກັບການນໍາໃຊ້ເງິນກີບ ແລະຕິດປ້າຍລາຄາສິນຄ້າເປັນເງິນກີບ, ພ້ອມກັນນັ້ນກໍ່ມີໜ່ວຍສະເພາະ ກິດຂອງທະນາຄານກາງສົມທົບ ກັບທະນາຄານພັດທະນາລາວ ສາຂາຄໍາມ່ວນລົງກວດກາຮ້ານຄ້າ ຕ່າງໆເພື່ອຕິດປ້າຍລາຄາເປັນເງິນກີບເປັນຕົ້ນແມ່ນຢູ່ໃນງານບຸນ ນະມັດສະການພະທາດເມືອງ ເກົ່າທີ່ຈັດຂຶ້ນໃນແຕ່ລະປີ ແລະ ໄດ້ຕັ້ງຈຸດບໍລິການແລກປ່ຽນເງິນບາດຢູ່ທີ່ດ່ານທ່າເຮືອ (ບ້ານດ່ານປາກເຊບັ້ງໄຟ) ເມືອງໜອງບົກ ຊຶ່ງໃນແຕ່ລະປີກໍ່ໄດ້ມີການໂຄສະນາປະຊາສໍາພັນດ້ວຍການຕ່າງໆ.

 ສໍາລັບທິດທາງ 6 ເດືອນທ້າຍປີ 2019 ນີ້ ທາງທະນາຄານກໍ່ໄດ້ວາງຕົວເລກຄາດໝາຍສູ້ຊົນໄວ້ເປັນຕົ້ນຍອດສິນເຊື່ອຈະໃຫ້ໄດ້ 90% ຂອງແຜນປີ, ສໍາລັບເງິນຝາກຈະໃຫ້ບັນລຸ 100% ຂອງແຜນການປີ, ຈະໄດ້ນໍາໃຊ້ຜະລິດຕະພັນທີ່ມີຢູ່ຊຶ່ງຕິດພັນກັບການດໍາລົງຊີວິດປະຈຸບັນຜູ້ຊົມໃຊ້ຍັງບໍ່ທັນຮັບຮູ້ຢ່າງທົ່ວເຖິງ ແລະ ຈໍານວນໜຶ່ງຍັງບໍ່ທັນໄດ້ເຂົ້າແຫຼ່ງຂໍ້ມູນດັ່ງກ່າວ, ກ່ຽວກັບການຂະຫຍາຍໜ່ວຍບໍລິການທາງສາຂາແມ່ນໄດ້ມີແຜນຈະຂະຫຍາຍຢູ່ແຕ່ຕ້ອງໄດ້ຂໍອະນຸຍາດຈາກສໍານັກງານໃຫຍ່ກ່ອນ ແລະຈະໄດ້ຂະຫຍາຍຕູ້ເອທີເອັມໄປໄວ້ຢູ່ເມືອງຫີນບູນຕື່ມອີກ.

-------------

ໂດຍ: ແດງສະຫວັດ ແສນພານິດ

ພາບ ແລະຂ່າວຈາກ: ນສພ ເສດຖະກິດ-ສັງຄົມ

แชร์