ກອງແຊງ ຕັ້ງເປົ້າຍອດຂາຍສິນຄ້າ 50ເປີເຊັນ ໃນງານວາງສະແດງຜະລິດຕະພັນໄມ້ລາວ

ກອງແຊງແກະສະຫຼັກໄມ້ສືມືລາວຕັ້ງເປົ້າຍອດຂາຍສິນຄ້າໃນງານວາງສະແດງຜະລິດຕະພັນໄມ້ລາວຄັ້ງທີ 5 ປະຈຳປີ 2019 ໄວ້ຢ່າງຕໍ່າ 50% ຂອງຈຳນວນສິນຄ້າທັງໝົດທີ່ນຳເຂົ້າຮ່ວມງານຂະນະທີ່ 5-6 ວັນຜ່ານມາແມ່ນໃກ້ຈະເຖິງແຜນແລ້ວໂດຍພໍ່ແມ່ປະຊາຊົນທີ່ທ່ຽວຊົມງານໃຫ້ຄວາມສົນໃຈຂອງໂຮງ ງານເປັນພິເສດຍ້ອນຄວາມງາມຂອງສິນບວກໃສ່ລາຄາກໍສົມເຫັດສົມຜົນ.

  ທ່ານ ກອງແຊງ ລາດຊະມູນ ເຈົ້າຂອງຮ້ານກອງແຊງແກະສະຫຼັກໄມ້ສີມືລາວຊຶ່ງມີສຳນັກງານຕັ້ງຢູ່ ບ້ານຫ້ວຍຫົງ ນະຄອນຫຼວງວຽງຈັນ ໄດ້ເປີດເຜີຍໃຫ້ຮູ້ວ່າ: ກອງແຊງແກະສະຫຼັກໄມ້ສືມືລາວແມ່ນອີກໜື່ງຫົວໜ່ວຍທຸລະກິດທີ່ສ້າງຕັ້ງຂຶ້ນມາໃນປີ 2009 ເພື່ອເປັນສ່ວນໜຶ່ງໃນການສ້າງມູນຄ່າເພີ່ມໃຫ້ກັບໄມ້ເສດ, ປູດໄມ້, ສົ້ນໄມ້ທີ່ບໍ່ໄດ້ໃຊ້ແລ້ວໃຫ້ກັບກາຍມາເປັນຜະລິດຕະພັນໄມ້ແກະສະຫຼັກລວດລາຍຕ່າງໆສວຍງາມ ແລະມີລາຄາສູງທີ່ຕະຫຼາດທັງພາຍໃນ ແລະຕ່າງປະເທດມີຄວາມຕ້ອງການພ້ອມດຽວກັນນັ້ນຍັງສາມາດສ້າງວຽກເຮັດງານທຳໃຫ້ກັບພໍ່ແມ່ປະຊາຊົນຫຼາຍສິນຄົນນຳອີກ.

  ແນວໃດກໍດີສະເພາະໃນງານວາງສະແດງຜະລິດຕະພັນໄມ້ລາວຄັ້ງທີ 5 ນີ້ກອງແຊງແກະສະຫຼັກໄມ້ສືມືລາວໄດ້ຕັ້ງເປົ້າຍອດຂາຍສິນຄ້າຕະຫຼອດງານໄວ້ຢ່າງ ຕໍ່າ 50% ຂອງຈຳນວນສິນຄ້າທັງໝົດທີ່ນຳເຂົ້າຮ່ວມງານ 30 ກວ່າລາຍການມູນຄ່າ 200 ລ້ານກວ່າກີບ ໂດຍໃນໄລຍະ 5-6 ວັນຜ່ານມານັບແຕ່ວັນທີ 12 ມັງກອນ ຕົວເລກການຂາຍແມ່ນໃກ້ຈະເຖິງແຜນແລ້ວໂດຍພໍ່ແມ່ປະຊາຊົນທີ່ທ່ຽວຊົມງານໃຫ້ຄວາມສົນໃຈຂອງໂຮງງານເປັນພິເພດຍ້ອນຄວາມງາມຂອງສິນບວກໃສ່ລາຄາກໍສົມເຫັດສົມຜົນແຕ່ທັງນີ້ບັນຍາກາດການທ່ຽວຊົມ ແລະຊື້ສິນຄ້າພາຍໃນງານກໍມີຄວາມຄຶກຄື້ນກວ່າຫຼາຍໆຄັ້ງຜ່ານມາທ່ານ ກອງ ແຊງ ລາດຊະມູນ ກ່າວ.

  ແນວໃດກໍດີອີງຕາມຂໍ້ມູນຈາກຄະນະຮັບຜິດຊອບຈັດງານວາງສະແດງຄັ້ງນີ້ເປີດເຜີຍໃຫ້ຮູ້ວ່າ: ງານດັ່ງກ່າວໄດ້ຈັດຂຶ້ນໃນລະຫວ່າງວັນທີ 12-20 ມັງກອນ 2019 ທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ ທັງນີ້ກໍເພື່ອສົ່ງເສີມການຜະລິດເຄື່ອງເຟີນິເຈີໄມ້ລາວທັງເປັນການໂຄສະນາເຜີຍ ແຜ່ໃຫ້ສັງຄົມໄດ້ຮັບຮູ້ຜະລິດຕະພັນເພີນິເຈີໄມ້ລາວຫຼາຍຂຶ້ນໃຫ້ຜູ້ຜະລິດສາມາດເຂົ້າເຖິງຕະຫຼາດຈຳໜ່າຍສິນຄ້າໄດ້ທັງພາຍໃນ ແລະ ຕ່າງປະເທດກ້າວເຂົ້າໄປສູ່ການສ້າງຕາໜ່າງວາງສະແດງ-ຂາຍສິນຄ້າເພີນິເຈີກັບພາກພື້ນ ແລະສາກົນໄດ້ໃນອະນາຄົດ.

 ໃນງານຈະໄດ້ພົບກັບສິນຄ້າສວຍງາມຈາກ 74 ຫົວໜ່ວຍທຸລະກິດທີ່ມາຈາກຕ່າງແຂວງ 16 ຫົວໜ່ວຍ, 5 ຫົວໜ່ວຍປະເທດໄທສ່ວນທີ່ເຫຼືອແມ່ນມາຈາກນະຄອນຫຼວງວຽງຈັນ ໂດຍລວມມີມູນຄ່າສິນຄ້າທັງໝົດ 20 ຕື້ກີບ ໃນນີ້ຈະໄດ້ຂາຍປະມານ 70% ຕົກເປັນເງີນ 14 ຕື້ກີບ ຈາກຜູ້ຄົນທີ່ຄາດວ່າຈະມາທ່ຽວຊົມງານທັງໝົດ 2 ແສນກວ່າຄົນນອກຈາກນັ້ນພາຍໃນງານຍັງຈະມີຫຼາກຫຼາຍກິດຈະກຳທີ່ໜ້າສົນໃຈເປັນຕົ້ນແມ່ນງານຈົກສະຫຼາກຊິງລາງວັນ, ງານສະ ແດງສິລະປະດົນຕີຈາກນັກຮ້ອງຄົນດັງພາຍໃນ ແລະ ຕ່າງປະເທດໃນແຕ່ລະຄ່ຳຄືນ ແລະ ອື່ນໆອີກທີ່ຈະສາມາດສ້າງຄວາມເບີກບານມ່ວນຊື່ນໄດ້ຕະຫຼອດ ງານ.

 

แชร์