4 ພາກສ່ວນຮ່ວມສົມທົບທຶນຜູ້ປະສົບໄພນໍ້າຖ້ວມ

 ວັນທີ 13 ກັນຍາ 2019, ທີ່ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ມີ 4 ພາກສ່ວນປະກອບດ້ວຍລັດວິສາຫະກິດນໍ້າມັນເຊື້ອໄຟລາວ, ສະມາຄົມນໍ້າມັນເຊື້ອໄຟ ແລະອາຍແກັດລາວ, ຮ້ານເສີມສວຍຊາຍນິງສະຕາຣ໌ ແລະກະຊວງຊັບພະຍາກອນທຳມະຊາດ ແລະສິ່ງແວດລ້ອມໄດ້ຮ່ວມກັນສົມທົບເງິນ ແລະເຄື່ອງມູນຄ່າ 310 ລ້ານກ່ວາກີບ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມຢູ່ 6 ແຂວງພາກກາງ ແລະພາກໃຕ້.

 ຕາງໜ້າລັດຖະບານຮັບໂດຍທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງ ຮສສ ທັງເປັນຮອງປະທານຄະນະປ້ອງກັນ ແລະຄຸ້ມຄອງໄພພິບັດແຫ່ງຊາດ, ຕາງ ໜ້າລັດວິສາຫະກິດນໍ້າມັນເຊື້ອໄຟລາວ, ສະມາຄົມນໍ້າມັນເຊື້ອໄຟ ແລະອາຍແກັດລາວມອບແມ່ນທ່ານ ອະນຸສິນ ພົນເສນາ ຮອງອຳນວຍການ, ຜູ້ປະຈຳການລັດວິສາ ຫະກິດນໍ້າມັນເຊື້ອໄຟລາວ,ທ່ານນາງ ແສງດວງດາວ ສິດພະໄຊ ເຈົ້າຂອງຮ້ານເສີມສວຍຊາຍນິງສະຕາຣ໌ ບິວຕີ້ ແລະທ່ານນາງ ບົວຄຳ ສຸລິວັນ ຮັກສາການຫົວໜ້າຫ້ອງການກະຊວງຊັບພະຍາກອນທຳມະຊາດແລະສິ່ງແວດລ້ອມ.

ສຳລັບເຄື່ອງຊ່ວຍເຫຼືອທີ່ນຳມາມອບໃນຄັ້ງນີ້ປະກອບມີເງິນສົດຈາກລັດວິສາຫະກິດນໍ້າມັນເຊື້ອໄຟລາວມູນຄ່າ 170 ລ້ານ, ສະມາຄົມນໍ້າມັນເຊື້ອໄຟ ແລະອາຍແກັດລາວລວມມີເງິນສົດ 42,5 ລ້ານກີບ ແລະ ເຄື່ອງບໍລິໂພກ 3,5 ລ້ານກີບ, ຮ້ານເສີມສວຍຊາຍນິງສະຕາຣ໌ ມູນຄ່າ 60 ລ້ານກີບ, ສ່ວນກະຊວງຊັບພະຍາກອນທຳມະຊາດ ແລະສິ່ງແວດລ້ອມປະກອບມີເງິນສົດ 2 ລ້ານກີບ ແລະເຄື່ອງບໍລິໂພກມູນຄ່າ 32,81 ລ້ານກີບ ເພື່ອມອບໃຫ້ກະຊວງ ຮສສ ນຳໄປມອບໃຫ້ກັບຜູ້ປະສົບໄພນໍ້າຖ້ວມໃນ 6 ແຂວງພາກກາງ ແລະພາກໃຕ້.

--------------

ນສພ ເສດຖະກິດ-ສັງຄົມ

• 16/09/2019