85% ແລ້ວເຂື່ອນນໍ້າອູ 1 ທ້າຍປີໜ້າຈະສຳເລັດ

  ໂຄງການກໍ່ສ້າງເຂື່ອນນໍ້າອູ 1 ເປັນໜຶ່ງໃນໂຄງການເຂື່ອນໃນແມ່ນໍ້າອູ 7 ເຂື່ອນ, ມີກໍາລັງການຜະລິດໄຟຟ້າ 180 ເມກາວັດ, ສໍາປະທານສ້າງ ແລະ ພັດທະນາ ໂດຍບໍລິສັດຊາຍໂນຮາຍໂດຣຂອງຈີນເປັນເວລາ 29 ປີພາຍຫຼັງທີ່ລົງມືທີ່ກໍ່ສ້າງມາແຕ່ປີ 2016 ຮອດ ເວລານີ້ສຳເລັດ85%.

  ທ່ານ ຫົວນານ ຊາງ ຫົວໜ້າໂຄງ ການກໍ່ສ້າງເຂື່ອນໄຟຟ້ານໍ້າອູ 1 ກ່າວວ່າ:  ເຂື່ອນນໍ້າອູທີ່ສ້າງສໍາເລັດໄປໃນເຟສ 1 ນັ້ນກໍມີນໍ້າອູ 2, 5, 6 ສໍາລັບເຂື່ອນໃນເຟສທີ່ສອງທີ່ກໍາລັງສ້າງຢູ່ນີ້ກໍມີນໍ້າອູ 1, 3, 4, ແລະ 7 ສະເພາະເຂື່ອນນໍ້າອູ 1 ນີ້ຫ່າງຈາກຫຼວງພະບາງ ປະມານ 45 ກິໂລແມັດ, ຕັ້ງຢູ່ແຄມທາງເລກ 13 ເໜືອ, ເມືອງປາກອູ ແຂວງຫຼວງພະບາງ, ນັບແຕ່ລົງມືກໍ່ສ້າງໃນເດືອນເມສາ2016  ມາ ຮອດປະຈຸບັນໜ້າວຽກໂດຍລວມແມ່ນ ສໍາເລັດ 85% ແລ້ວ, ສ່ວນວຽກເທເບຕົງສໍາເລັດ 95% ຊຶ່ງການກໍ່ສ້າງໄດ້ແບ່ງອອກເປັນ 2 ໄລຍະ, ໄລຍະທີ 1 ແມ່ນການກະກຽມກໍ່ສ້າງຕ້ານເຈື່ອນ ແລະປະຕູປ່ອຍນໍ້າຈໍານວນ 6 ຊ່ອງ ແລະໄລຍະ 2 ແມ່ນກໍ່ສ້າງເຮືອນຈັກປັ່ນໄຟ ແລະປະຕູປ່ອຍນໍ້າເພີ່ມອີກ 5 ຊ່ອງ, ລວມທັງໝົດມີ 11 ຊ່ອງ ປ່ອຍນໍ້າ.

  ເຂື່ອນນໍ້າອູ 1 ໄດ້ຈັດພິທີອ່ວຍນໍ້າໜ້າເຂື່ອນໃນເດືອນຕຸລາ 2017 ແລະໃນເດືອນມິຖຸນາ 2020 ຈະສາມາດຜະລິດກະແສໄຟຟ້າ ແລະຮອດເດືອນຕຸລາ 2020 ແມ່ນໃຫ້ສໍາເລັດສົມບູນແບບ, ສ່ວນກະແສໄຟຟ້າແມ່ນຈະໄດ້ສົ່ງເຂົ້າສະຖານີໄຟຟ້າປາກມອງ ເມືອງນໍ້າບາກ ແລະສະຖານີໄຟຟ້າເມືອງຊຽງເງິນ.

  ທ່ານຫົວໜ້າໂຄງການຍັງກ່າວໃຫ້ຮູ້ຕື່ມວ່າ: ໂດຍລວມແລ້ວການກໍ່ສ້າງເຂື່ອນນໍ້າອູ 1 ແມ່ນຄືບໜ້າໄປກ່ອນເຂື່ອນນໍ້າອູ 3, 4, 7 ປະມານ 5% ຊຶ່ງທັງ 3 ເຂື່ອນນີ້ໜ້າວຽກໂດຍລວມແມ່ນສໍາເລັດໄປ 80% ແລ້ວ.

  ທ່ານກ່າວຕື່ມວ່າ: ນອກຈາກສ້າງເຂື່ອນແລ້ວຍັງໄດ້ກໍ່ສ້າງຍົກລະດັບເສັ້ນທາງເລກ 13 ເໜືອໜ້າເຂື່ອນຈຸດທີ່ນໍ້າຈະຖ້ວມໃຫ້ສູງຂຶ້ນລວມໄລຍະທາງ 5,2 ກິໂລ ແມັດ ຊຶ່ງຈະໃຫ້ສໍາເລັດໃນທ້າຍເດືອນໜ້ານີ້ພ້ອມນີ້ການຍົກຍ້າຍປະຊາຊົນເຂດທີ່ນໍ້າຈະຖ້ວມໄປຢູ່ບ້ານຈັດສັນໃໝ່ແມ່ນສໍາເລັດ 100% ແລະຍັງໄດ້ຊ່ວຍເຫຼືອເຮັດຕ້ານເຈື່ອນມູນຄ່າ 2 ຕື້ກວ່າກີບ ໃຫ້ບ້ານທີ່ຢູ່ກ້ອງເຂື່ອນຕື່ມອີກ.

  ສໍາລັບເຂື່ອນໄຟຟ້ານໍ້າອູ 1 ຫຼັງຈາກກໍ່ສ້າງສໍາເລັດແລ້ວທາງໜ່ວຍງານອອກແບບຈະພັດທະນາໃຫ້ເປັນແຫຼ່ງທ່ອງທ່ຽວທາງໜ້າເຂື່ອນ, ທ່ຽວຊົມທັດສະນີຍະພາບ ໜ້າເຂື່ອນລວມເຖິງສວນສາທາລະນະຂອງເຂື່ອນໄຟຟ້າຕື່ມອີກຊຶ່ງຈະເຮັດໃຫ້ເມືອງປາກອູ ແຂວງຫຼວງພະບາງ ມີໂສມໜ້າໃໝ່ທາງດ້ານການທ່ອງທ່ຽວຂອງເມືອງ, ເປັນການສ້າງລາຍຮັບໃຫ້ປະຊາຊົນທີ່ມີສ່ວນຮ່ວມທາງດ້ານການທ່ອງທ່ຽວຈາກເຂື່ອນໄຟຟ້ານໍ້າອູ1.

---------------

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์