ສວນພຶກສາຄຶກຄື້ນ ດຶງດູດນັກທ່ອງທ່ຽວໄດ້ 4 ພັນຄົນຕໍ່ເດືອນ

 ສວນພຶກສາເປັນອີກສະຖານທີ່ທ່ອງທ່ຽວທີ່ຕັ້ງຢູ່ບໍ່ໄກຈາກຕົວເມືອງໃຫຍ່ນະຄອນຫຼວງວຽງຈັນ ປະຈຸບັນກຳລັງໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະຕ່າງປະເທດເນື່ອງຈາກພາຍໃນສວນດັ່ງກ່າວໄດ້ມີກິດຈະກຳຫຼາກຫຼາຍໄວ້ຄອຍບໍລິການຜູ້ທີ່ເຂົ້າມາທ່ຽວຊົມເປັນຕົ້ນຂີ່ສະລິງ, ຂີ່ມ້າ, ຂີ່ກວຽນ ແລະ ກິດຈະກຳອື່ນໆ ໂດຍສະເລ່ຍມີນັກທ່ອງທ່ຽວເຂົ້າມາທ່ຽວຊົມສວນພຶກສາປະມານ 4 ພັນຄົນຕໍ່ເດືອນ.

ທ່ານ ພູວົງ ພະມີສິດ ເຈົ້າຂອງສວນພຶກສາໃຫ້ສຳພາດວ່າ: ປະຈຸບັນສວນພຶດສາແມ່ນໄດ້ສຳເລັດການພັດທະນາໃນຫຼາຍດ້ານພາຍຫຼັງທີ່ໄດ້ລົງທຶນພັດທະນາໂດຍສະ ເພາະພື້ນຖານໂຄງລ່າງພາຍໃນສວນ ແລະ ອື່ນໆ ພ້ອມທັງການສ້າງກິດຈະກຳຕ່າງໆເປັນຕົ້ນ ແມ່ນສະລິງ, ລົດອີທີວີ, ລົດຖີບ, ລົດໄຟຟ້າ, ຂີ່ມ້າ, ຂີ່ກວຽນ ແລະອື່ນໆ ໂດຍອັນຫຼັກໆແມ່ນມີບ້ານຊົນເຜົ່າ, ພິພິທະພັນຊົນເຜົ່າໂດຍເວົ້າເລື່ອງວັດທະນະທຳຂອງ 50 ຊົນເຜົ່າ ແລະມີຂໍ້ມູນຂອງແຕ່ລະຊົນເຜົ່າທັງພາສາລາວ ແລະ ພາສາອັງກິດສະນັ້ນເປັນບ່ອນເຮັດໃຫ້ນັກທ່ອງທ່ຽວມາທ່ຽວມາຫຼິ້ນແລ້ວມາຮຽນຮູ້ເລື່ອງວັດທະນະທຳລາວ ແລະ ມີອາຫານປອດສານພິດໄວ້ຄອຍບໍລິການນັກທ່ອງທ່ຽວ.

ນອກນັ້ນສວນພຶກສາຍັງມີການສະແດງສີລະປະທຸກໆວັນເສົາ-ອາທິດຂອງບັນດາເຜົ່າເພື່ອໃຫ້ນັກທ່ອງທ່ຽວໄດ້ຊົມ, ປະຈຸບັນສວນພຶກສາກຳລັງເປັນທີ່ນິຍົມຂອງບັນ ດານັກທ່ອງທ່ຽວທັງພາຍໃນ ແລະຕ່າງປະເທດສະເລ່ຍນັກທ່ອງທ່ຽວເຂົ້າມາທ່ຽວຊົມປະມານ 4 ພັນຄົນຕໍ່ ເດືອນນອກນັ້ນຍັງມີນັກຮຽນ-ນັກສຶກສາທີ່ມາທັດສະນະສຶກສາຮຽນຮູ້ເລື່ອງກະສິກຳ, ການປູກຜັກປອດສານພິດ, ການເຮັດປຸ໋ຍຊີວະພາບແລະອື່ນໆ.

 ທ່ານ ພູວົງ ພະມີສິດ ກ່າວຕື່ມວ່າ: ສວນພຶກສາແມ່ນຕັ້ງຢູ່ເມືອງນາຊາຍທອງນະຄອນຫຼວງວຽງຈັນ ຊຶ່ງບໍ່ໄກຈາກຕົວເມືອງມີເສັ້ນທາງໄປ-ມາທີ່ສະດວກສະບາຍ ແລະພາຍໃນສວນຍັງຫຼາກຫຼາຍການບໍລິການໄວ້ບໍລິການທຸກທ່ານ, ໃນເດືອນພະຈິກນີ້ທາງສວນພຶກສາຈະຈັດງານບຸນກິນຈຽງຂໍເຊີນຊວນທຸກທ່ານເຂົ້າມາຮ່ວມງານນຳກັນພິເສດສຳລັບຜູ້ທີ່ນຸ່ງເຄື່ອງຊົນເຜົ່າເຂົ້າມາພາຍໃນງານແມ່ນຈະບໍ່ໄດ້ເສຍຄ່າຜ່ານປະຕູ ແລະ ທ່ຽວຊົມສວນບໍ່ໄດ້ເສຍຄ່າ.

--------------

ນສພ ເສດຖະກິດ-ສັງຄົມ

• 16/09/2019