ກຽມວາງສະແດງອຸດສາຫະກຳເຕັກໂນໂລຊີ ລາວ-ຈີນ

  ເມື່ອວັນທີ 13 ກັນຍາ ຜ່ານມາ, ກະຊວງວິທະຍາສາດ ແລະເຕັກໂນໂລຊີ (ກວຕ) ຈັດພິທີຖະແຫຼງຂ່າວກ່ຽວກັບງານວາງສະແດງວິທະຍາສາດ ແລະ ເຕັກໂນໂລຊີ ການຮ່ວມມືພັດທະນາອຸດສາຫະກຳເຕັກໂນໂລຊີລະດັບສູງລາວ-ຈີນ ຄັ້ງທີ I ປີ 2019 ຊຶ່ງຈະຈັດຂຶ້ນລະຫວ່າງວັນທີ 11-16 ຕຸລາ 2019 ທີ່ນະຄອນຫຼວງວຽງ ຈັນ ພາຍໃຕ້ຫົວຂໍ້ “ ເພີ່ມທະວີການນໍາໃຊ້ເຕັກໂນໂລຊີທັນສະໄໝເພື່ອບັນລຸເປົ້າໝາຍການຫັນເປັນອຸດສາຫະກໍາ ແລະທັນສະໄໝ”.

 ທ່ານ ບໍ່ວຽງຄຳ ວົງດາລາ ລັດຖະມົນຕີ ກວຕ ກ່າວວ່າ: ງານດັ່ງກ່າວຈະຈັດຂຶ້ນໂດຍການຮ່ວມມືລະຫວ່າງ ກວຕ ແລະ ຫ້ອງການຜູ້ຕາງໜ້າສະພາສົ່ງເສີມການຄ້າສາກົນ ສປ ຈີນ ຂະແໜງອຸດສາຫະກຳການກໍ່ສ້າງປະຈຳລາວ, ບໍລິສັດທີ່ປຶກສາການລົງທຶນ ແລະກໍ່ສ້າງເຂື່ອນໄຟຟ້າຈຳກັດຜູ້ດຽວ (IHC) ແລະບໍລິສັດພັດທະນາວິ ທະຍາສາດເຕັກນິກປັກກິ່ງເຈີ່ນຕີ, ຜູ້ປະກອບການທຸລະກິດ, ບັນດາບໍລິສັດ ແລະຫ້າງຮ້ານຕ່າງໆ ຈາກພາຍໃນ ແລະຈາກຕ່າງປະເທດ, ຊຶ່ງເປັນກອງປະຊຸມຮ່ວມມືກ່ຽວກັບການພັດທະນາເຂດເຕັກໂນໂລຊີຄັ້ງທໍາອິດຢູ່ ສປປລາວ.

  ຈຸດປະສົງກໍເພື່ອຜັນຂະຫຍາຍຈັດຕັ້ງປະຕິບັດ 6 ແຜນງານຂອງຍຸດທະສາດວ່າດ້ວຍການພັດທະນາວຽກງານວິທະຍາສາດ ແລະເຕັກໂນໂລຊີເຂົ້າໃນຈຸດສຸມບູລິມະສິດຂອງເປົ້າໝາຍແຜນພັດທະນາຂອງລັດຖະບານເປັນຕົ້ນການຫັນເປັນອຸດສາຫະກຳ ແລະທັນສະໄໝ ແລະແກ້ໄຂຄວາມທຸກຍາກໃຫ້ປະກົດຜົນເປັນຈິງ; ເພື່ອສົ່ງ ເສີມຖ່າຍທອດ ແລະການນໍາໃຊ້ຜົນສໍາເລັດຂອງການຄົ້ນຄວ້າ ແລະພັດທະນາ, ເຕັກໂນໂລຊີທີ່ກ້າວໜ້າ ແລະທັນສະໄໝໃນຍຸກອຸດສາຫະກໍາ 4.0 ເຂົ້າຮັບໃຊ້ໂດຍກົງຢູ່ຮາກຖານການຜະລິດ ແລະການບໍລິການເພື່ອຍົກສະມັດຕະພາບ ແລະຄຸນນະພາບຂອງຜະລິດຕະພັນເພື່ອເປັນສິນຄ້າ.

ງານດັ່ງກ່າວແມ່ນຈະຈັດຂຶ້ນລະຫວ່າງວັນທີ 11-16 ຕຸລາ 2019 ຢູ່ຫໍປະຊຸມແຫ່ງຊາດພາຍໃຕ້ຫົວຂໍ້ “ເພີ່ມທະວີການນໍາໃຊ້ເຕັກໂນໂລຊີທັນສະໄໝເພື່ອບັນລຸເປົ້າ ໝາຍການຫັນເປັນອຸດສາຫະກໍາ ແລະທັນສະໄໝ”, ພາຍໃນງານຈະມີການວາງສະແດງຜົນງານການຄົ້ນຄວ້າຜະລິດຕະພັນເຕັກໂນໂລຊີ, ການເລີ່ມກິດຈະການນະວັດຕະກໍາໃໝ່ຈາກບັນດາມະຫາວິທະຍາໄລ, ສະຖາບັນການຄົ້ນຄວ້າ, ບັນດາກະຊວງ, ຂະແໜງການພາຍໃນ ແລະຕ່າງປະເທດປະມານ 100 ກວ່າຮ້ານ ຊຶ່ງຈະມີເຕັກໂນໂລຊີທີ່ທັນສະໄໝໃນຍຸກອຸດສາຫະກໍາ 4.0, ເປັນຕົ້ນເຕັກໂນໂລຊີ ຊີວະພາບ, ເຕັກໂນໂລຊີຂໍ້ມູນຂ່າວສານກໍ່ຄືການນຳໃຊ້ເຕັກໂນໂລຊີດິຈິຕອລ Big data, Internetofthing (IOT) ແລະປັນຍາປະດິດ (AI), ພ້ອມນີ້ຍັງຈະມີກອງປະຊຸມວຽກງານວິທະຍາສາດ ແລະເຕັກໂນໂລຊີ ທົ່ວປະເທດຄັ້ງທີ III, ກອງປະ ຊຸມສຳມະນາລະດັບຊາດກ່ຽວກັບການພັດທະນາວິທະຍາດ ແລະເຕັກໂນໂລຊີໃນຍຸກອຸດສາຫະກຳ 4.0 ແລະກິດຈະກໍາອື່ນໆ ອີກດ້ວຍ.

--------------

ນສພ ເສດຖະກິດ-ສັງຄົມ

แชร์