ປະທານ ຄຄຊ ເນັ້ນໃຫ້ບໍລິສັດເຂົ້າຈົດທະບຽນຕາມແຜນ

  ກອງປະຊຸມຄະນະກໍາມະການຄຸ້ມຄອງຫຼັກຊັບ (ຄຄຊ) ຄັ້ງທີ III ປະຈໍາປີ 2019 ໄດ້ສຳເລັດລົງໃນວັນທີ 13 ກັນຍາ 2019 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານ ຄຄຊ; ພ້ອມນີ້, ຍັງມີ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ຮອງປະທານ-ຜູ້ປະຈຳການ, ບັນດາຄະນະກຳມະການ ຄຄຊ ແລະພາກສ່ວນກ່ຽວຂ້ອງເຂົ້າຮ່ວມ.

 ກອງປະຊຸມຄັ້ງນີ້ໄດ້ມີການປຶກສາຫາລືບາງໜ້າວຽກສຳຄັນເປັນຕົ້ນໄດ້ມີການລາຍງານຜົນການຈັດຕັ້ງປະຕິບັດມະຕິກອງປະຊຸມ ຄຄຊຄັ້ງທີ II ປີ 2019; ຮັບຮອງເອົາຮ່າງນິຕິກຳໃຕ້ກົດໝາຍວ່າດ້ວຍຫຼັກຊັບສ້າງໃໝ່ຈຳນວນ 2 ສະບັບ ໂດຍມີຮ່າງຂໍ້ຕົກລົງວ່າດ້ວຍການສ້າງຕັ້ງແລະການເຄື່ອນໄຫວຂອງບໍລິສັດບໍລິຫານກອງທຶນ ເພື່ອການລົງທຶນ ແລະ ຮ່າງຂໍ້ຕົກລົງວ່າດ້ວຍກອງທຶນຮ່ວມພ້ອມດຽວກັນນັ້ນ, ຍັງໄດ້ສະເໜີໃຫ້ມີການປັບປຸງເງື່ອນໄຂການຈົດທະບຽນຮຸ້ນຢູ່ຕະຫຼາດຫຼັກຊັບລາວ; ລາຍງານສະພາບການຊື້-ຂາຍຮຸ້ນ; ຜົນການດຳເນີນງານ ປະຈຳ 6 ເດືອນຕົ້ນປີ 2019 ຂອງບໍລິສັດຈົດທະບຽນ 1 ແຫ່ງ ແລະວິທີແກ້ໄຂ; ແຜນປັບປຸງ ແລະພັດ ທະນາຕະຫຼາດຫຼັກຊັບລາວ.

  ທ່ານຮອງນາຍົກລັດຖະມົນຕີ, ປະທານ ຄຄຊ ໄດ້ເນັ້ນວ່າ: ໃນຂະນະນີ້ທຸກພາກສ່ວນເສດຖະກິດກໍໄດ້ຂຸ້ນຂ້ຽວແກ້ໄຂຄວາມຫຍຸ້ງຍາກທາງດ້ານເສດຖະກິດໂດຍສະ ເພາະຄວາມຫຍຸ້ງຍາກທາງດ້ານງົບປະມານແນໃສ່ເຮັດໃຫ້ມີງົບປະມານພຽງພໍກັບຄວາມຈຳເປັນໃຊ້ຈ່າຍ ແລະພັດທະນາເສດຖະກິດສຳລັບຂົງເຂດວຽກງານຕະຫຼາດທຶນໄດ້ສຸມໃສ່ປະຕິບັດໜ້າທີ່ວຽກງານທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງພໍສົມຄວນແຕ່ເນື່ອງຈາກວ່າມີຫຼາຍເງື່ອນໄຂບໍ່ທັນເອື້ອອຳນວຍແທ້ຈຶ່ງເຮັດໃຫ້ບາງວຽກຍັງບໍ່ທັນເປັນໄປຕາມແຜນການໂດຍສະເພາະການກະກຽມບໍລິສັດເຂົ້າຈົດທະບຽນຍັງຊັກຊ້າ, ຜົນການດຳເນີນງານຂອງບໍລິສັດຈົດທະບຽນຍັງມີລັກສະນະບໍ່ທັນຄືບໜ້າເທົ່າທີ່ຄວນ ແລະການຊື້-ຂາຍໃນຕະຫຼາດຍັງບໍ່ທັນຟົດຟື້ນ. ດັ່ງນັ້ນ, ຈຶ່ງຮຽກຮ້ອງມາຍັງຜູ້ແທນກອງປະຊຸມໂດຍສະເພາະສຳນັກງານ ຄຄຊ ທີ່ເປັນກົງຈັກເສ ນາທິການຈົ່ງໄດ້ພ້ອມກັນຈັດຕັ້ງຜັນຂະຫຍາຍຜົນຂອງກອງປະຊຸມຄັ້ງນີ້ໃຫ້ບັນລຸຜົນ ແລະສາມາດດຳເນີນງານດີຂຶ້ນກວ່າເກົ່າ.

---------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັວສືພິມເສດຖະກິດ-ສັງຄົມ

แชร์