ສາລະວັນສ້າງສະຖານີຂົນສົ່ງໂດຍສານຫຼັງໃໝ່

 ແຂວງສາລະວັນ ໄດ້ອະນຸມັດໃຫ້ບໍລິສັດບຸນນົງບໍລິການຂົນສົ່ງໂດຍສານສ່ວນບຸກຄົນດຳເນີນໂຄງການກໍ່ສ້າງສະຖານີຂົນສົ່ງໂດຍສານແລະຕໍ່ເຕີມອາຄານຫຼັງເກົ່າໂດຍໃນວັນທີ 13 ກັນຍາຜ່ານມາ, ຢູ່ພະແນກແຜນການ ແລະການລົງທຶນແຂວງສາລະວັນໄດ້ມີພິທີເຊັນສັນຍາສຳປະທານດິນເພື່ອດຳເນີນໂຄງການ, ໂດຍໃຫ້ກຽດເຂົ້າ ຮ່ວມຂອງ ທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນຜູ້ຊີ້ນຳວຽກງານເສດຖະກິດແຂວງ, ມີບັນດາທ່ານຄະນະກຳມະການຄຸ້ມຄອງການລົງທຶນຂັ້ນແຂວງ, ປະທານບໍລິສັດ ແລະພະແນກການທີ່ກ່ຽວຂ້ອງເຂົ້າຮ່ວມ. 

 ທ່ານ ບຸນນົງ ສຸວິມົນ ປະທານບໍລິສັດບຸນນົງບໍລິການຂົນສົ່ງໂດຍສານສ່ວນບຸກຄົນໄດ້ລາຍງານໃຫ້ຮູ້ວ່າ: ໂຄງການດັ່ງກ່າວແມ່ນຕັ້ງຢູ່ບ້ານຫຼັກສອງເມືອງ ແລະແຂວງສາລະວັນ ໄດ້ສຳປະທານເນື້ອທີ່ດິນທັງໝົດ 1,5 ເຮັກຕາ ຕາມຂອບເຂດເກົ່າຂອງສະຖານີຂົນສົ່ງໂດຍສານແຂວງເປັນການລົງທຶນຂອງເອກະຊົນພາຍໃນ 100% ແລະມີໄລຍະເວລາສຳປະທານ 30 ປີ (ນັບແຕ່ປີ 2019–2049), ໄດ້ກຳນົດແຜນດຳເນີນງານໂຄງການອອກເປັນ 2 ໄລຍະຄື: ໄລຍະການກໍ່ສ້າງປັບປຸງ, ຕໍ່ເຕີມອາຄານບໍ່ໃຫ້ກາຍປີ 2020 ນັບແຕ່ມື້ເຊັນສັນຍາເປັນຕົ້ນໄປ ແລະມີ 4 ໜ້າວຽກໃຫຍ່ຄື: ສ້ອມແປງຫ້ອງສະຖານີ, ອາຄານ ປ່ອຍລົດ-ບ່ອນລົງລົດ, ປູເບຕົງພາຍໃນ

ເດີ່ນ, ສ້ອມແປງຮົ້ວອ້ອມ ແລະປະດັບປະດາສະຖານທີ່, ໄລຍະທີ 2 ແມ່ນໃຫ້ບໍລິການເປັນປົກກະຕິ 29 ປີ ຊຶ່ງມີມູນຄ່າການລົງທຶນທັງໝົດ 8 ຕື້ກີບ ສຳລັບກິດຈະການພັດທະນາໂຄງລ່າງເຊັ່ນ: ສະຖານີຈອດລົດຜູ້ໂດຍສານ,ຕະຫຼາດແມ່ນໄດ້ເສຍຄ່າເຊົ່າ-ສຳປະທານດິນຈຳນວນ 5 ພັນໂດລາຕໍ່ເຮັກຕາຕໍ່ປີ ຫຼືໄດ້ເສຍພັນທະ 7,5  ພັນໂດລາຕໍ່ປີນອກນັ້ນ, ທາງບໍລິສັດແມ່ນມີງົບປະມານພຽງພໍທີ່ຈະດຳເນີດການກໍ່ສ້າງຕາມມູນຄ່າການຄິດໄລ່ຂອງພະແນກ ຍທຂ ແຂວງ ແລະ ມີຄວາມພ້ອມທາງດ້ານກຳລັງແຮງງານ, ວິຊາການ ແລະເຄື່ອງມືເຕັກນິກຕ່າງໆກະກຽມດຳເນີນການກໍ່ສ້າງໃນໄວໆນີ້.

-------------

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์