ບຸນຊ່ວງເຮືອປະຈຳປີ ທີ່ເມືອງປາກອູ ມີເຮືອເຂົ້າແຂ່ງຂັນ 17 ລຳ

  ບຸນຊ່ວງເຮືອຢູ່ວັງຄົກລິ່ນ ເມືອງປາກອູ ໄດ້ຈັດຂຶ້ນໃນວັນທີ 13 ກັນຍາ 2019 ມີການນຳ ຂອງເມືອງປາກອູ, ເມືອງອ້ອມ ຂ້າງ, ແຂກຮັບເຊີນ ແລະມວນຊົນ ເຂົ້າຮ່ວມ.

 ທ່ານ ແກ່ນຄຳ ຄຳພັນ ຮອງເຈົ້າເມືອງປາກອູ ໄດ້ກ່າວເປີດການ ແຂ່ງຂັນວ່າ: ເປັນປະຈຳທຸກປີເມື່ອເຖິງມື້ບຸນຫໍ່ເຂົ້າສະຫຼາກປະຊາຊົນຊາວເມືອງປາກອູ ໄດ້ຈັດ ງານບຸນຊ່ວງເຮືອອັນເປັນປະເພນີສືບທອດກັນມາແຕ່ຊຸມປີ 1990 ສະເພາະປີນີ້ ອົງການປົກຄອງ ເມືອງປາກອູ ໄດ້ກະກຽມຄວາມພ້ອມຫຼາຍດ້ານທັງໄດ້ປຸກລະດົມເຮືອຊ່ວງຈາກບັນດາບ້ານພາຍ ໃນເມືອງ, ຕ່າງເມືອງ ແລະຫົວ ໜ່ວຍທຸລະກິດຢູ່ໃນແຂວງຫຼວງພະ ບາງ ເຂົ້າຮ່ວມແຂ່ງຂັນເພື່ອໃຫ້ບຸນປີນີ້ມີຄວາມເບີກບານມ່ວນຊື່ນ.

ການຊ່ວງເຮືອທີ່ວັງຄົກລີ່ນ ເມືອງປາກອູ ໃນປີນີ້ມີເຮືອຊ່ວງ ເຂົ້າແຂ່ງຂັນທັງໜົດ 17 ລໍາ ແບ່ງອອກເປັນ 2 ປະເພດຄື: ປະເພດ ເຮືອກາບ ຫຼື ເຮືປະເພນີມີ 12 ລຳ ບັນຈຸສີພາຍບໍ່ໃຫ້ເກີນ 25 ຄົນ, ສໍາຮອງ 7 ຄົນ ແລະປະເພດເຮືອ ສູດ ຫຼື ເຮືອກີລາມີ 5 ລໍາ ບັນຈຸ ສີພາຍບໍ່ໃຫ້ເກີນ 30 ຄົນ, ສໍາຮອງ 7 ຄົນ, ແຂ່ງຂັນໃນຮູບແບບເສຍສອງຄັ້ງແລ້ວຈະບໍ່ຈັດອັນດັບທີ, ສ່ວນເຮືອທີ່ເສຍ 1 ຄັ້ງ ມີສິດເຂົ້າ ຊິງເຖິງຮອບຊິງຊະນະເລີດ.

----------

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 16/09/2019