ລາວ-ກຳປູເຈຍ ຍົກລະດັບການພົວພັນ ຂື້ນເປັນຄູ່ຮ່ວມຍຸດທະສາດຮອບດ້ານ ແລະໜັ້ນຄົງຍາວນານ

  ໂດຍຕອບສະໜອງຕາມຄຳເຊີນຂອງສົມເດັດອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີແຫ່ງຣາຊະອານາຈັກກໍາປູເຈຍ, ພະນະທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະຜູ້ແທນ ສປປ ລາວ ເດີນທາງໄປຢ້ຽມຢາມຣາຊະອານາຈັກກຳປູເຈຍຢ່າງເປັນທາງການໃນລະຫວ່າງວັນທີ 12-13 ກັນ ຍາ 2019 ເພື່ອຮັດແໜ້ນສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອທີ່ມີມາແຕ່ດົນນານ ແລະ ເສີມຂະຫຍາຍການຮ່ວມມືລະຫວ່າງລາວ ແລະ ກຳປູ ເຈຍ.

  ໃນວັນທີ 12 ກັນຍາ ພະນະທ່ານ ທອງລຸນ ສີສຸລິດ ແລະຄະນະຜູ້ແທນຂັ້ນສູງຂອງລາວໄດ້ເດີນທາງເຖິງນະຄອນຫຼວງພະນົມເປັນຊຶ່ງໄດ້ມີພິທີຕ້ອນຮັບຢ່າງເປັນທາງການ ແລະສົມກຽດ ໂດຍ ສົມເດັດ ເຕໂຈ ຮຸນ ແຊນ ທີ່ຫໍສັນຕິພາບຫຼັງຈາກສຳເລັດພິທີຕ້ອນຮັບຢ່າງເປັນທາງການ, ສົມເດັດ ຮຸນ ແຊນ, ພ້ອມ ດ້ວຍການນຳຂັ້ນສູງຂອງກຳປູເຈຍໄດ້ດຳເນີນການພົບປະສອງຝ່າຍກັບພະນະທ່ານ ທອງລຸນ ສີສຸລິດ ແລະຄະນະຜູ້ແທນຂັ້ນສູງຂອງ ສປປ ລາວ.

  ໃນການພົບປະສອງຝ່າຍໄດ້ຮ່ວມກັນທົບທວນຄືນການຈັດຕັ້ງປະຕິບັດບັນດາເອກະສານຮ່ວມມືສອງຝ່າຍກໍ່ຄືການຕົກລົງຂອງການນຳຂັ້ນສູງສອງປະເທດໃນທຸກໆດ້ານຕະຫຼອດໄລຍະຜ່ານມາ ແລະວາງແຜນການຮ່ວມມືໃນຕໍ່ໜ້າ, ເປັນຕົ້ນແມ່ນການຮ່ວມມືດ້ານການເມືອງ, ການຕ່າງປະເທດ, ປ້ອງກັນຊາດ-ປ້ອງກັນຄວາມສະ ຫງົບ,ການຮ່ວມມືດ້ານຊາຍແດນ;ການຮ່ວມມືດ້ານເສດຖະກິດ, ການຄ້າ, ການລົງທຶນ, ໂຍທາທິການ ແລະຂົນສົ່ງ, ພະລັງງານ, ກະສິກຳ ແລະການປະມົງ, ການຮ່ວມມືດ້ານສັງຄົມ-ວັດທະນະທຳ, ສຶກສາ ແລະກີລາ, ແຮງງານ ແລະສະຫວັດດີການສັງຄົມ, ວັດທະນະທຳ ແລະທ່ອງທ່ຽວ, ສາທາລະນະສຸກຕະຫຼອດຮອດການພົວພັນຮ່ວມມືໃນລະດັບທ້ອງຖິ່ນ, ແຂວງແຮກສ່ຽວກໍ່ຄືການຮ່ວມມືໃນກອບພາກພື້ນແລະອານຸພາກພື້ນ.

  ສອງຝ່າຍໄດ້ແລກປ່ຽນຄໍາຄິດຄໍາເຫັນແບບກົງໄປກົງມາ, ຈິງໃຈ ແລະເປັນເອກະພາບກັນສູງໂດຍສອງນາຍົກລັດຖະມົນຕີໄດ້ຊີ້ນຳບັນດາຂະແໜງການທີ່ກ່ຽວຂ້ອງ ຈົ່ງເອົາໃຈໃສ່ຮ່ວມກັນຈັດຕັ້ງປະຕິບັດບັນດາຂໍ້ຕົກລົງທີ່ສອງຝ່າຍໄດ້ມີຮ່ວມກັນກໍ່ຄືການຕົກລົງຂັ້ນສູງຂອງການນຳສອງປະເທດໃຫ້ປາກົດຜົນເປັນຈິງ, ແກ້ໄຂບັນຫາການກຳນົດຊາຍແດນທີ່ຍັງຄົງຄ້າງໃຫ້ສຳເລັດຢ່າງສົມບູນໂດຍໄວ ແລະສືບຕໍ່ຮັກສາກົນໄກການພົບປະ ແລະປະສານງານກັນໃນແຕ່ລະລະດັບເພື່ອຊຸກຍູ້ໃຫ້ການຮ່ວມມືໃນແຕ່ລະດ້ານໄດ້ຮັບການຈັດຕັ້ງປະຕິບັດຢ່າງມີປະສິດຕິພາບ.

  ໃນໂອກາດຢ້ຽມຢາມຄັ້ງນີ້, ສອງນາຍົກລັດຖະມົນຕີໄດ້ຮ່ວມລົງນາມ ແລະເປັນສັກຂີພິຍານໃນການລົງນາມເອກະສານຮ່ວມມືສອງຝ່າຍຈຳນວນ 6 ສະບັບຄື: ຖະ ແຫຼງການຮ່ວມລະຫວ່າງ ນາຍົກລັດຖະມົນຕີ ແຫ່ງ ສປປ ລາວ ກັບນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍ; ສັນຍາວ່າດ້ວຍການຮ່ວມມືຂະແໜງພະ ລັງງານໄຟຟ້າ (ປັບປຸງປ່ຽນ ແທນສະບັບທີ່ໄດ້ລົງນາມໃນປີ 1999); ສັນຍາຊື້ຂາຍສະໜອງໄຟຟ້າ 500 ເມ ກາວັດ ແບບລະບົບສູ່ລະບົບ ລະຫວ່າງລັດວິສາຫະກິດໄຟຟ້າລາວ ແລະລັດວິສາຫະກິດໄຟຟ້າກຳປູເຈຍ; ສັນຍາຊື້ຂາຍໄຟຟ້າໂຄງການໄຟຟ້າຖ່ານຫີນກະລຶມເພື່ອຂາຍໄຟຟ້າໃຫ້ກັບລັດວິສາຫະກິດໄຟຟ້າກຳປູເຈຍ; ສັນຍາຊື້ຂາຍໄຟຟ້າໂຄງການໄຟຟ້າຖ່ານຫີນລະມານເພື່ອຂາຍໄຟຟ້າໃຫ້ກັບລັດວິສາຫະກິດໄຟຟ້າກຳປູເຈຍ ແລະບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານແຮງງານ.

 ຕໍ່ຈາກນັ້ນສອງນາຍົກລັດຖະມົນຕີໄດ້ຖະແຫຼງຂ່າວຮ່ວມຊຶ່ງທັງສອງຝ່າຍໄດ້ຢືນຢັນຄືນເຖິງຄວາມມຸ່ງໝັ້ນໃນການສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາ ມສາມັກຄີຊ່ວຍເຫຼືອເຊິ່ງກັນ ແລະ ກັນຖານບ້ານໃກ້ເຮືອນຄຽງບ້ານພີ່ເມືອງນ້ອງບ້ານແກ່ວເມືອງດອງທີ່ເປັນມູນເຊື້ອອັນດີງາມມາແຕ່ດົນນານລະຫວ່າງສອງປະເທດກໍຄືສອງລັດຖະບານໃຫ້ນັບມື້ແໜ້ນແຟ້ນຍິ່ງໆຂຶ້ນບົນພື້ນຖານເຄົາລົບອະທິປະໄຕ, ຄວາມສະເໝີພາບ, ຕ່າງຝ່າຍຕ່າງມີຜົນປະໂຫຍດຮ່ວມກັນ.

ພິເສດໃນໂອກາດການຢ້ຽມຢາມຄັ້ງນີ້ສອງຝ່າຍຍັງໄດ້ຕົກລົງຍົກລະດັບການພົວພັນສອງຝ່າຍລະຫວ່າງ ສປປ ລາວ ແລະຣາຊະອານາຈັກກໍາປູເຈຍຂຶ້ນເປັນຄູ່ຮ່ວມຍຸດ ທະສາດຮອບດ້ານ ແລະໝັ້ນຄົງຍາວນານ; ສອງຝ່າຍເຫັນດີໃຫ້ບັນດາກະຊວງແລະຂະແໜງການກ່ຽວຂ້ອງສືບຕໍ່ຈັດຕັ້ງປະຕິບັດຕາມເນື້ອໃນສັນຍາ, ຂໍ້ຕົກລົງຕ່າງໆທີ່ສອງຝ່າຍໄດ້ເຊັນກັນກໍ່ຄືການຕົກລົງຂອງການນຳຂັ້ນສູງສອງປະເທດໃຫ້ນັບມື້ແຕກດອກອອກຜົນຫຼາຍຂຶ້ນໂດຍຜ່ານກົນໄກການຮ່ວມມືສອງຝ່າຍຄື: ຄະນະກໍາມະການຮ່ວມມືວ່າດ້ວຍການຮ່ວມມືສອງຝ່າຍລາວ-ກໍາປູເຈຍ (JC) ກໍ່ຄືກົນໄກຮ່ວມມືອື່ນໆ.

  ສອງຝ່າຍໄດ້ເປັນເອກະພາບກັນ ແລະຢືນຢັນວ່າບໍລິເວນແກ້ງຕໍມໍຄອຍ-ຫ້ວຍຕະເງົາເປັນບໍລິເວນຄົງຄ້າງທີ່ຍັງບໍ່ທັນໄດ້ຮັບການແກ້ໄຂ, ດັ່ງນັ້ນຈຶ່ງໄດ້ເຫັນດີເປັນເອກ ະພາບກັນວ່າໄລຍະທີ່ກຳລັງສືບຕໍ່ແກ້ໄຂນີ້ແມ່ນ: 1. ບໍ່ໃຫ້ມີກຳລັງ ທະຫານຢູ່ໃນບໍລິເວນນີ້, 2. ບໍ່ໃຫ້ມີປະຊາຊົນອາໄສຢູ່ ຫຼື ດໍາເນີນກິດຈະກໍາໃດໆຢູ່ບໍລິເວນດັ່ງກ່າວ ແລະ 3. ໃຫ້ມີການກວດກາຮ່ວມກັນທັງທາງບົກ, ທາງນໍ້າ ແລະທາງອາກາດໂດຍການກວດກາຮ່ວມສອງຝ່າຍແມ່ນສາມາດກວດກາໂດຍການໃຊ້ກຳລັງຄົນ ຫຼື ການໃຊ້ເຮືອບິນບໍ່ມີຄົນຂັບ (Drone).

  ສອງຝ່າຍເຫັນດີໃຫ້ຮັກສາສະຖານະພາບເດີມບໍລິເວນຊາຍແດນທີ່ຍັງຄົງຄ້າງໂດຍປາສະຈາກສິ່ງປຸກສ້າງຕ່າງໆທີ່ພາໃຫ້ມີການປ່ຽນແປງສະພາບບໍລິເວນດັ່ງກ່າວຈົນກວ່າສອງຝ່າຍຈະສຳເລັດການສຳຫຼວດ ແລະປັກຫຼັກໝາຍຊາຍແດນໃຫ້ສຳເລັດ; ສອງຝ່າຍເຫັນດີຕົກລົງກັນຮ່າງສົນທິສັນຍາວ່າດ້ວຍການກຳນົດເສັ້ນຊາຍແດນລະ ຫວ່າງ ສປປ ລາວ ກັບຣາຊະອານາຈັກກຳປູເຈຍໃນບໍລິເວນທີ່ທັງສອງຝ່າຍໄດ້ສໍາຫຼວດ ແລະ ໄດ້ຕົກລົງເອກະພາບກັນແລ້ວໃນ 86% ຂອງແລວເຂດຊາຍແດນລະ ຫວ່າງສອງປະເທດເພື່ອດໍາເນີນການປັກຫຼັກໝາຍຊາຍແດນໃຫ້ສຳເລັດໂດຍໄວ.

 ພາຍຫຼັງສຳເລັດສົນທິສັນຍາແລ້ວສອງຝ່າຍເປັນເອກະພາບກັນຈະດຳເນີນການປັກຫຼັກໝາຍຖີ່ ແລະຍົກລະດັບຫຼັກໝາຍຊາຍແດນທີ່ມີຢູ່ແລ້ວນັ້ນໃຫ້ໄດ້ມາດຕະຖາ ນ ແລະມີຄວາມແຂງແກ່ນຕື່ມສໍາລັບບໍລິເວນຊາຍແດນທີ່ຄົງຄ້າງມິດຕະພາບທັງສອງຝ່າຍເຫັນດີຈະສືບຕໍ່ປຶກສາຫາລືເພື່ອຊອກຊ່ອງທາງແກ້ໄຂຮ່ວມກັນຕໍ່ໄປໃຫ້ສໍາເລັດໂດຍສົມບູນ.

-----------------

ໜັງສືພິມເສດຖະກິດ-ສັງຄົມ

• 13/09/2019