ມັນຕົ້ນກາຍເປັນສິນຄ້າຕົວໃໝ່ທີ່ສ້າງລາຍຮັບ ແກ່ແຂວງເຊກອງ

  ທ່ານ ພັນສອນ ແສນສົ່ງເສີມ ຫົວໜ້າພະແນກອຸດສາຫະກຳ ແລະການຄ້າແຂວງໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2019 ພວກເຮົາໄດ້ເອົາໃຈໃສ່ຊຸກຍູ້ສົ່ງເສີມວຽກງານວິສາຫະກິດຂະໜາດນ້ອຍ-ກາງ ແລະ ສົ່ງເສີມການຄ້າເປັນຕົ້ນໄດ້ລົງເກັບກຳຂໍ້ມູນການຜະລິດລະດູຝົນຂອງຜູ້ຜະລິດຊາວກະສິກອນໃນນັ້ນແມ່ນການຜະ ລິດມັນຕົ້ນກາຍເປັນສິນຄ້າທີ່ເປັນທ່າແຮງໜຶ່ງຂອງແຂວງເພື່ອຮັບປະກັນສະຖຽນລະພາບທາງດ້ານລາຄາ ແລະຕະຫຼາດເພື່ອເປັນການກະຕຸກຊຸກຍູ້ສົ່ງເສີມໃຫ້ມີທ່າກ້າວຂະຫຍາຍຕົວ ແລະຍືນຍົງເພາະວ່າແຂວງພວກເຮົາມີໂຮງງານຮອງຮັບເກັບຊື້ມັນຕົ້ນແລ້ວຈຳນວນ 1 ແຫ່ງ.

  ສະເພາະຕົ້ນປີ 2019 ໄດ້ສົ່ງອອກມັນຕົ້ນແຫ້ງຈຳນວນ 6.607 ໂຕນ, ຄິດເປັນມູນຄ່າ 9,64 ແສນໂດລາ, ມັນຕົ້ນດິບຈຳນວນ2,1 ພັນໂຕນ ມີມູນຄ່າ 1,14 ແສນໂດລາ, ຊຶ່ງຖືວ່າເປັນພືດເສດຖະກິດຕົວໃໝ່ທີ່ສ້າງລາຍຮັບໃຫ້ແກ່ ແຂວງເຊກອງ ກໍຄືສ້າງລາຍໄດ້ໃຫ້ແກ່ປະຊາຊົນບັນດາເຜົ່າຊາວແຂວງເຊກອງ.

  ທ່ານ ພັນສອນ ແສນສົ່ງເສີມ ໃຫ້ຮູ້ຕື່ມວ່າ: ທົ່ວແຂວງແມ່ນໄດ້ມີສິນຄ້າໂອດັອບແລ້ວຈຳນວນ 3 ລາຍການທີ່ເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດຄື: ຜະລິດຕະພັນເຫຼົ້າໝາກໄມ້ຂອງ ເມືອງທ່າແຕງ; ຜະລິດຕະພັນກາເຟຜົງ, ກາເຟຊົງຂອງ ເມືອງດາກຈຶງ ແລະຜະລິດຕະພັນຫັດຖະກຳຕໍ່າແຜ່ນແພຍ້ອມສີທຳມະ ຊາດຂອງກຸ່ມຫັດຖະກຳ ເມືອງລະມາມ. ພ້ອມທັງໄດ້ຊຸກຍູ້ ແລະນຳພາຫົວໜ່ວຍທຸລະກິດເຂົ້າຮ່ວມວາງສະແດງສິນຄ້າຢູ່ນະຄອນຫຼວງ ແລະຕ່າງແຂວງຕ່າງໆມີທັງ ໝົດ 4 ຄັ້ງ, ມີມູນຄ່າ 144,6 ລ້ານກີບ.

------------

ຂຽນໂດຍ: ພຸດທະສອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์