ສຳມະນາການລົງບັນຊີແກ່ຫົວໜ່ວຍທຸລະກິດລາວ

 ວັນທີ 10-12 ກັນຍາ 2019 ທີ່ນະຄອນຫຼວງວຽງຈັນ ສະພາການຄ້າ ແລະອຸດສາຫະກໍາແຫ່ງຊາດລາວ (ສຄອຊ) ຮ່ວມກັບສະພາການຄ້າຄາວາຊະກິ,ສະຖາບັນຄົ້ນຄວ້ານະໂຍບາຍກະຊວງການເງິນປະເທດຍີ່ປຸ່ນໄດ້ຈັດສໍາມະນາກ່ຽວກັບການລົງບັນຊີໃຫ້ແກ່ຫົວໜ່ວຍທຸລະກິດເພື່ອສາມາດຕອບສະໜອງຂໍ້ມູນພື້ນຖານໃນການເຂົ້າຫາແຫຼ່ງທຶນພາຍໃຕ້ຫົວຂໍ້ “ຫຼັກສູດການບັນທຶກຈົດກ່າຍບັນຊີລະດັບກາງ”.

  ສຳມະນາຄັ້ງນີ້ໂດຍເປັນປະທານຂອງທ່ານ ອຸເດດ ສຸວັນນະວົງ, ປະທານ ສຄອຊ, ທ່ານ Osamitsu YAMADA ປະທານສະພາການຄ້າຄາວາຊະກິປະເທດຍີ່ປຸ່ນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ອຸເດດ ສຸວັນນະວົງ ກ່າວວ່າ: ການບັນທຶກ-ຈົດກ່າຍບັນຊີມີຄວາມສໍາຄັນ ແລະຈໍາເປັນຫຼາຍສໍາລັບຜູ້ປະກອບກິດຈະການໃນການຄຸ້ມຄອງບໍລິຫານທຸລະກິດໃຫ້ໄປຕາມເປົ້າໝາຍທີ່ວາງໄວ, ສາມາດກໍານົດຄວາມສ່ຽງຂອງທຸລະກິດ, ຮູ້ສະຖານະທາງດ້ານການເງິນຂອງບໍລິສັດ, ກໍານົດແຜນຍຸດທະສາດ ແລະທິດທາງໃນການຂັບເຂື່ອນທຸລະກິດໄດ້ ແລະເພື່ອເປັນການຍົກຄວາມຮູ້, ຄວາມສາມາດຂອງຜູ້ປະກອບກິດຈະການ ແລະນັກບັນຊີຂອງລາວໃນການບັນທຶກ-ຈົດ ກ່າຍບັນຊີຊຶ່ງຈະນໍາຄວາມກ້າວໜ້າມາສູ່ທຸລະກິດ, ມີຄວາມໝັ້ນຄົງທາງດ້ານການເງິນ ແລະຄວາມພ້ອມໃນການແຂ່ງຂັນເພື່ອກ້າວເຂົ້າສູ່ລະບົບການຄຸ້ມຄອງບັນຊີ-ການເງິນໃນອະນາຄົດ.

 ຕະຫຼອດໄລຍະ 3 ປີຜ່ານມາສູນບໍລິການວິສາຫະກິດຂະໜາດນ້ອຍ ແລະກາງສະພາການຄ້າ ແລະອຸດສາຫະກໍາແຫ່ງຊາດລາວໄດ້ຈັດຕັ້ງປະຕິບັດກອງປະຊຸມສໍາມະນາຫົວຂໍ້ດັ່ງກ່າວທີ່ນະຄອນຫຼວງວຽງຈັນ 5 ຄັ້ງ, ແຂວງຫຼວງພະບາງ 1 ຄັ້ງ, ແຂວງສະຫວັນນະເຂດ 1 ຄັ້ງ ແລະແຂວງຈໍາປາສັກ 1 ຄັ້ງ ມີຜູ້ເຂົ້າຮ່ວມທັງໝົດ 514 ຄົນ.

---------

ຂຽນໂດຍ: ວົງມະນີ 

แชร์