ເອັສທີ ທຸ້ມທຶນສູ່ເອັສເອັມອີຫຼາຍກວ່າ 32 ຕື້ກີບ

  ໃນວັນທີ 11 ກັນຍາ 2019  ທ່ານ ຈິຣັດຊະຍຸດ ອໍາຍົງ ຜູ້ອໍານວຍການໃຫຍ່ທະນາຄານ ເອັສທີ ຈໍາກັດ (STB) ໄດ້ໃຫ້ສໍາພາດກ່ຽວກັບຈຸດພົ້ນເດັ່ນໃນການດໍາເນີນທຸລະກໍາທາງການເງິນຂອງທະນາຄານໂດຍໃນຜ່ານມາໄດ້ມີການພັດທະນາລະບົບ Core Banking ໃໝ່ໃຫ້ມີຄວາມສະດວກໃນຊ່ອງທາງການຊໍາລະສະສາງທາງການເງິນເຊັ່ນວ່າ: ລະບົບ Mobile Banking, Tax payment, Load tax ແລະລະບົບ AML- KYC ທີ່ກໍາລັງເຂົ້າມາ.

ທ່ານຜູ້ອໍານວຍການໃຫຍ່ທະນາຄານເອັສທີ ຈໍາກັດ ເນັ້ນວ່າ: ການປ່ອຍສິນເຊື່ອໃນຂົງເຂດທຸລະກິດນ້ອຍ-ກາງ (SME) ໄດ້ມີການເຕີບໃຫຍ່ຂະຫຍາຍຕົວເຊິ່ງຍອດລວມທັງໝົດທີ່ປ່ອຍມີຈໍານວນ 32,6 ຕື້ກີບ ໂດຍປ່ອຍສິນເຊື່ອເຂົ້າໃນຂະແໜງການຄ້າສູງກວ່າໝູ່ກວມ 59%, ບໍລິການ 28%, ອຸດສາຫະກໍາ 7%, ກະສິກໍາ 4% ແລະຂະແໜງຫັດຖະກໍາ 3% ກ່ຽວກັບຜະລິດຕະພັນໃໝ່ຂອງທະນາຄານ ເອັສທີຈໍາກັດ ປະກອບມີເງິນຝາກອອມຊັບອີຊີ, ເງິນຝາກເພີ່ມຊັບຮັບດອກ ສູງ, ເງິນຝາກເພື່ອຄອບຄົວ ແລະເງິນຝາກປະຢັດເພື່ອບໍານານ; ໃນຂະນະດຽວກັນນັ້ນກໍ່ມີຜະລິດຕະພັນສິນເຊື່ອປະກອບມີ: Corporate, Commercial-SME, Retail.

  ໃນຜ່ານມາ, ບັນດາລູກຄ້າມີຄວາມເພິ່ງພໍໃຈຕໍ່ການເຂົ້າໃຊ້ບໍລິການຂອງທະນາຄານຊຶ່ງເຄື່ອງວັດລະດັບຄວາມເພິ່ງພໍໃຈຂອງລູກຄ້າໂດຍນໍາໃຊ້ເຕັກໂນໂລຊີເຂົ້າມາຊ່ວຍແລະມີຜົນຕອບຮັບທີ່ດີຈາກລູກຄ້າທີ່ເຂົ້າມາໃຊ້ບໍລິການໃນນີ້ການບໍລິການດີ, ຈຸດໃຫ້ບໍລິການຫຼາຍຈຸດເພື່ອເອື້ອອໍານວຍຄວາມສະດວກໃຫ້ແກ່ລູກຄ້າ ແລະ ມີການພັດ ທະນາທະນາຄານຢ່າງບໍ່ຢຸດຢັ້ງເພື່ອຕອບສະໜອງການໃຫ້ບໍລິການລູກຄ້າຢ່າງວ່ອງໄວທັນໃຈ, ສະແດງອອກດ້ານສະຖານທີ່ ແລະ ຈຸດໃຫ້ບໍລິການມີຄວາມສະດວກສະ ບາຍເພາະທະນາຄານເປີດບໍລິການແຕ່ວັນຈັນ-ວັນອາທິດ ແລະ ມີຫຼາຍໜ່ວຍບໍລິການທີ່ເປັນຈຸດລູກຄ້າເພິ່ງພໍໃຈຫຼາຍຍ້ອນບໍ່ມີເວລາມາໃຊ້ບໍລິການໃນວັນລັດຖະການ ແຕ່ກໍ່ສາມາດໃຊ້ບໍລິການໃນວັນພັກໄດ້ຕາມປົກກະຕິ ແລະ ໃນຕົ້ນປີ 2019 ທະນາຄານໄດ້ຫັນມາໃຊ້ລະບົບ Flexcube ທີ່ເປັນຈຸດດີຫຼາຍຢ່າງໃຫ້ແກ່ທະນາຄານ ເຮັດໃຫ້ລະບົບການນໍາໃຊ້ເຕັກໂນໂລຊີທັນສະໄໝຂຶ້ນ, ການບໍລິການວ່ອງໄວ ແລະຍັງເປັນຈຸດດີອັນໜຶ່ງທີ່ເຮັດໃຫ້ທະນາຄານໄດ້ຄົ້ນຄິດ-ອອກແບບຜະລິດຕະພັນໃໝ່ໆອອກມາເພື່ອໃຫ້ລູກຄ້າມີຫຼາຍທາງເລືອກໃນການຊົມໃຊ້ຜະລິດຕະພັນຂອງທະນາຄານອີກດ້ວຍ.

ສໍາລັບການຊ່ວຍເຫຼືອສັງຄົມນັ້ນ, ທ່ານຜູ້ອໍານວຍການໃຫຍ່ໄດ້ແຈ້ງເຖິງການປະຕິບັດນະໂຍບາຍຕໍ່ສັງຄົມຊຶ່ງເປັນວຽກງານສໍາຄັນທີ່ທະນາຄານເອັສທີ ຈໍາກັດໄດ້ເອົາໃຈໃສ່ໃນຫຼາຍປີຜ່ານມາຊຶ່ງໄດ້ປະກອບສ່ວນຊ່ວຍເຫຼືອສັງຄົມ4.000 ລ້ານກວ່າກີບ ສ່ວນໃຫຍ່ໄດ້ປະກອບສ່ວນເຂົ້າໃນຂົງເຂດການສຶກສາ-ກີລາ, ສາທາລະນະສຸກ, ຊ່ວຍ ເຫຼືອໄພໜາວ, ໄພນໍ້າຖ້ວມເຫຼົ່ານີ້ເປັນຕົ້ນໃນນີ້ໄດ້ປະກອບສ່ວນກໍ່ສ້າງອາຄານສໍານັກງານ ອພສ 200 ລ້ານກີບ, ຊ່ວຍເຫຼືອຜູ້ປະສົບໄພນໍ້າຖ້ວມຢູ່ເມືອງສະໜາມໄຊ ແຂວງອັດຕະປື ໃນປີຜ່ານມາ 1,12 ຕື້ກີບ ແລະໃນວັນທີ 10 ກັນຍາ 2019 ທ່ານ ສີທັດ ໄຊສຸລິວົງ ປະທານກຸ່ມບໍລິສັດ ເອັສທີ ກໍ່ໄດ້ນໍາເງິນ 2,5 ຕື້ກີບ ມອບໃຫ້ແກ່ລັດຖະບານໂດຍແມ່ນ ທ່ານ ທອງລຸນ ສີສຸລິດ ນາຍົກລັດຖະມົນຕີເປັນຜູ້ຕາງໜ້າຮັບເພື່ອຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມທີ່ກໍາລັງຮັບຜົນກະທົບໜັກໃນຫຼາຍແຂວງຂອງປະເທດໂດຍສະເພາະແຂວງສະຫວັນນະເຂດ, ຄໍາມ່ວນ ແລະ 4 ແຂວງພາກໃຕ້.

-------------

ຂຽນໂດຍ: ຣັດສະໝີ ດວງສັດຈະ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์