8 ບ້ານ ເມືອງຊຽງຮ່ອນ ໄດ້ຮັບເງິນຊົດເຊີຍຈາກໂຄງການສ້າງສະຖານີໄຟຟ້າ

  ພິທີມອບເງິນຄ່າຊົດເຊີຍໂຄງການກໍ່ສ້າງສະຖານີໄຟຟ້າ 115 ກິໂລໂວນ ຫົງສາ-ຊຽງຮ່ອນ ແຂວງໄຊຍະບູລີ ຈັດຂຶ້ນວັນທີ 9 ກັນຍາ ໂດຍເປັນປະທານຂອງທ່ານ ກົງທອງ ສິດທິໄຊ ຮອງເຈົ້າເມືອງໆຊຽງຮ່ອນ ພ້ອມດ້ວຍຄະນະກຳມະການຂັ້ນເມືອງຕາງໜ້າບໍລິສັດໄຟຟ້າລາວ ອຳນາດການປົກຄອງບ້ານ ແລະປະຊາຊົນຜູ້ຖືກຜົນກະທົບຈຳນວນ 8 ບ້ານເຂົ້າຮ່ວມ.

  ໃນ 8 ບ້ານ ທີ່ຖືກຜົນກະທົບຄື: ບ້ານ ຊ້າງ, ລາວສະໂນ, ຄໍ້າ, ຂິ່ງ, ດອນໄຊ, ຫ້ວຍຢວກ, ມົກສະຕຸ ແລະບ້ານຫ້ວຍສະເຄັ່ງ ມີ 64 ຄອບຄົວທີ່ຖືກຜົນກະທົບສ່ວນຫຼາຍແມ່ນດິນສວນ, ສວນໄມ້ອຸດສາຫະກຳ, ສວນພືດລົ້ມລຸກ, ດິນນາ, ສວນໄມ້ໃຫ້ໝາກ, ສວນໄມ້ປ້ອງ ແລະ ດິນປ່າເຫຼົ່າລວມມູນຄ່າຜົນກະທົບທັງໝົດ 66,46 ລ້ານກີບ.

  ໂຄງການກໍ່ສ້າງສະຖານີໄຟຟ້າ 115 ກິໂລໂວນ ຫົງສາ-ຊຽງຮ່ອນແມ່ນມີຈຸດ ປະສົງເພື່ອເຊື່ອມຕໍ່ລະບົບສາຍສົ່ງໄຟຟ້າແຮງສູງສະໜອງໃຫ້ເມືອງຊຽງຮ່ອນ ແລະເຂດໃກ້ຄຽງຍ້ອນມີການຂະຫຍາຍຕົວທາງດ້ານເສດຖະກິດ-ສັງຄົມຂອງເຂດດັ່ງກ່າວໄຟຟ້າທີ່ນຳໃຊ້ປະຈຸບັນແມ່ນນຳເຂົ້າມາຈາກປະເທດໄທຜ່ານລະບົບ 22 ກິໂລໂວນ ດັ່ງ ນັ້ນຖ້າໂຄງການນີ້ສໍາ ເລັດຈະຊ່ວຍຫຼຸດຜ່ອນການຊົມໃຊ້ໄຟຟ້າ   ຈາກຕ່າງປະເທດການສະໜອງໄຟຟ້າ ຈະໃຫ້ມີສະຖຽງລະພາບດີຂຶ້ນ ແລວສາຍ ສົ່ງ 115 ກິໂລໂວນ ຫົງສາ-ຊຽງຮ່ອນກວມເອົາ 3 ເມືອງຂອງແຂວງໄຊຍະບູລີ ຄື: ເມືອງຫົງສາ, ເງິນ ແລະ ເມືອງຊຽງຮ່ອນ ມີມູນຄ່າການກໍ່ສ້າງທັງໝົດ 129,80 ລ້ານໂດລາ ຜ່ານການກໍ່ສ້າງ ມາຮອດປະຈຸບັນສຳເລັດ  21,99 %.

-----

ຂ່າວ: ດອນ ຂຽວພະນາ    

แชร์