ທລພ ສາຂາຊຽງຂວາງເລັ່ງສະໜອງສິນເຊື່ອເອັສເອັມອີໃຫ້ໄດ້ 80%

 ທ່ານ ປະສົມເພັດ ພູນທອງຄໍາ ວ່າການຫົວໜ້າທະນາຄານພັດທະນາລາວສາຂາຊຽງຂວາງ (ທພລ.ຊຂ) ໃຫ້ສຳພາດວ່າ: ປະຈຸບັນ ທພລ.ຊຂ ມີ 6 ໜວ່ຍບໍລິການ ແລະມີຕູ້ ATM ທັງໝົດ 11 ຕູ້ ຊຶ່ງໃນ 6 ເດືອນຕົ້ນປີ 2019 ໄດ້ລະດົມແຫຼ່ງທຶນໃນຫຼາຍຮູບຫຼາຍແບບຈົນສາມາດລະດົມເງິນຝາກໄດ້ທັງໝົດ 91,4% ຂອງແຜນການປີ; ສ່ວນການນຳໃຊ້ແຫຼ່ງທຶນ, ກໍໄດ້ຄຸ້ມຄອງການປ່ອຍສິນເຊື່ອຢ່າງມີປະສິດທິຜົນຕິດພັນກັບແຜນພັດທະນາເສດຖະກິດ-ສັງຄົມຂອງແຂວງໂດຍປະຕິບັດໄດ້ແລ້ວ 93,6% ຂອງຕົວເລກແຜນການປີ ແລະ ມີລູກຄ້າເງິນກູ້ທັງໝົດ 500 ກວ່າລາຍຊຶ່ງປະຈຸບັນກໍາລັງສຸມໃສ່ເກັບໜີ້ສິນທວງຍາກ (NPL) ໂດຍສົມທົບກັບພາກສ່ວນທີ່ກ່ຽວຂ້ອງໂດຍລວມແມ່ນສາມາດຄຸ້ມຄອງໄດ້ຢູ່ໃນເກນມາດຖານຂອງ ທຫລ ວາງອອກ.

ໂດຍອີງໃສ່ດຳລັດເລກທີ 42/ນຍ, ລົງວັນທີ 20 ເມສາ 2004 ວ່າດ້ວຍການສົ່ງເສີມ ແລະພັດທະນາວິສາຫະກິດຂະໜາດນ້ອຍ-ຂະໜາດກາງ (SME)ເປົ້າໝາຍການສະໜອງສິນເຊື່ອ SME ໃນປະຈຸບັນໄດ້ຫັນເອົາຄຸນນະພາບເປັນຫຼັກ, ຫັນເຂົ້າສູ່ລະບຽບຫຼັກການຢ່າງເຂັ້ມງວດ, ວິເຄາະວິໄຈລະອຽດຖີ່ຖວ້ນ, ຜ່ານກອງປະຊຸມຄະນະກຳມະການບໍລິ ຫານສິນເຊື່ອພິຈາລະນາເປັນເອກະພາບ ຈຶ່ງອະນຸມັດສິນເຊື່ອໄດ້, ເປົ້າໝາຍຫຼັກ ກໍ່ເລັ່ງໃສ່ຜູ້ປະກອບການຜະລິດການຄ້າ ແລະການບໍລິການທີ່ມີໃບອະນຸຍາດດຳເນີນທຸລະກິດທີ່ຖືກຕ້ອງຕາມລະບຽບກົດໝາຍ ສປປ ລາວ ສຳລັັບທຶນ SME ທີ່ມີດອກເບ້ຍຕໍ່ານັ້ນໄດ້ສົມທົບກັບສະພາການຄ້າແຂວງ, ປະຊຸມປຶກ ສາຫາລືຊອກຫາວິທີທາງເພື່ອຊຸກຍູ້ສົ່ງເສີມ ແລະຍາດແຍ່ງແຫຼ່ງທຶນດັ່ງກ່າວປະຈຸບັນກໍາລັງເກັບກຳຂໍ້ມູນເພື່ອສະເໜີຂັ້ນເທິງຄົ້ນຄວ້າພິຈາລະນາໂດຍສະເພາະບັນດາສິນຄ້າໂອດັອບຂອງແຂວງເຫັນວ່າມີທ່າແຮງຫຼາຍອາດມີເງື່ອນໄຂໃນການກູ້ຢືມຮ່ວງທຶນດັ່ງກ່າວ.

 ທ່ານວ່າການຫົວໜ້າທະນາຄານ ທພລ.ຊຂ ແຈ້ງຕື່ມວ່າ: ປະຈຸບັນ ທພລ.ຊຂ ໄດ້ສະໜອງເງິນກູ້ໃຫ້ຂະແໜງການຕ່າງໆໂດຍໄດ້ສະເລ່ຍ ແລະຄິດອັດຕາສ່ວນຂອງຍອດສິນເຊື່ອທັງໝົດມີຂະ ແໜງອຸດສາຫະກຳ 4,48%; ຂະແໜງ ກະສິກຳ-ປ່າໄມ້8,93%; ຂະແໜງການ ບໍລິການ 10,76%; ຂະແໜງຂົນສົ່ງ-ໄປສະນີ 4,01%; ຂະແໜງການຄ້າ 38,99%; ຂະແໜງກໍ່ສ້າງ33,04% ແລະສະໜອງເງິນກູ້ໃຫ້ຂະແໜງປະກອບວັດຖຸເຕັກນິກ 1,90% ຂອງຍອດສິນເຊື່ອທັງ ໝົດ.

  ແຜນການໃນຕໍ່ໜ້າຍັງຈະສືບຕໍ່ປັບປຸງຂອດການບໍລິການໃຫ້ວ່ອງໄວ, ທັນສະໄໝໂດຍໄດ້ຮັບການນໍາໃຊ້ ແລະພັດທະນາເຕັກໂນໂລຊີທີ່ທັນສະໄໝ ແລະກ້າວໜ້າເພື່ອຮັບໃຊ້ສັງຄົມເຊັ່ນຕູ້ ATM ສາມາດບໍລິການໂອນເງິນ, ຖອນເງິນ ແລະອື່ນໆ ໄດ້ຕະຫຼອດ 24 ຊົ່ວໂມງ, ລະບົບ Mobile Banking (ທະນາຄານ ໃນໂທລະສັບມືຖືຂອງທ່ານ) ສາມາດໂອນເງິນ, ຊໍາລະສະສາງໃບບິນຕ່າງໆໃນນີ້ມີຄ່າສິນຄ້າ, ຄ່າອາຫານ, ຄ່າໂທລະສັບ, ຄ່ານໍ້າ, ຄ່າໄຟຟ້າ, ຕື່ມມູນຄ່າໂທ ແລະອື່ນໆ; ຊຳລະຄ່າສິນຄ້າ ແລະການບໍລິການຜ່ານເຄື່ອງຮູດ EDC ໂດຍໃຊ້ບັດ ATM ເຮັດທຸລະກຳທາງການເງິນແທນຕູ້ ATM ໄດ້, ຊຳລະຄ່າພາສີອາກອນທີ່ທັນສະໄໝ, ການໂອນເງິນດວ່ນໄປຕ່າງປະເທດໂດຍຜ່ານລະບົບ Western Union, ລະບົບ Swift ແລະໃຫ້ບໍລິການການອອກໜັງສືຄໍ້າປະກັນຕ່າງໆ ນອກຈາກນີ້ຍັງມີຫຼາຍຜະລິດ ຕະພັນນຳອີກ.

  ໃນຂະນະດຽວກັນຍັງຈະສືບຕໍ່ລະດົມແຫຼ່ງທຶນໃຫ້ພຽງພໍກັບການສະໜອງສິນເຊື່ອ, ສູ້ຊົນຂະຫຍາຍສິນເຊື່ອ ແລະ ເກັບຄືນບັນດາໜີ້ສິນທວງຍາກ (NPL) ໃຫ້ໄດ້ຕາມແຜນ, ຄຸ້ມຄອງອັດຕາສ່ວນ (NPL) ໃຫ້ຢູ່ໃນເກນມາດຖານຂອງ ທຫລ ວາງອອກພ້ອມທັງຮັບປະກັນການປ່ອຍສິນເຊື່ອດ້ວຍຄຸນນະພາບ,ຖືກຕ້ອງຕາມລະ ບຽບຫຼັກການເລັ່ງໃສ່ສະໜອງສິນເຊື່ອໃຫ້ແກ່ SME ໃຫ້ໄດ້ຕາມແຜນການຄາດໝາຍແມ່ນ 80% ຂອງຍອດສິນເຊື່ອທັງໝົດ.

--------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ    

แชร์