ການເງິນສະຫວັນນະເຂດມອບເຄື່ອງຊ່ວຍເມືອງວິລະບູລີ

  ໃນວັນທີ 7 ກັນຍາຜ່ານມານີ້, ຂະແໜງການເງິນແຂວງສະຫວັນນະເຂດນຳໂດຍທ່ານ ກົງຈັກ ໜໍ່ແກ້ວ ຫົວໜ້າພະແນກການເງິນແຂວງສະຫວັນນະເຂດໄດ້ນຳເອົາ ເຄື່ອງບໍລິໂພກ-ອຸປະໂພກທີ່ຈຳເປັນໃຫ້ແກ່ການນຳຂອງເມືອງວິລະບູລີ ເພື່ອນຳໄປແຈກຢາຍໃຫ້ພໍ່ແມ່ປະຊາຊົນພາຍໃນເມື່ອງດັ່ງກ່າວທີ່ກຳລັງປະສົບກັບໄພພິບັດນໍ້າຖ້ວມ ຊຶ່ງຕາງໜ້າຮັບໂດຍທ່ານ ແສງເພັດ ຄຳສຸວັນ ຮອງເຈົ້າເມືອງວິລະບູລີພ້ອມຄະນະ.

  ເຄື່ອງທີ່ທາງຂະແໜງການເງິນ ແຂວງສະຫວັນນະເຂດ ນຳໄປຊ່ວຍເຫຼືອຄັ້ງນີ້ປະກອບມີ: ເຂົ້າສານ 550 ກິໂລ, ນໍ້າດື່ມ 400 ແພັກ, ໝີ່ 10 ແກັດ ແລະປ໋ອງປາ 20 ແກັດ ນອກຈາກນີ້ກໍຍັງມີດ່ານສາກົນແດນສະຫວັນມອບໝີ່ໃຫ້ ອີກ 40 ແກັດ, ນໍ້າດື່ມ 50 ແພັກ; ພາສີຂົວມິດຕະພາບ II ມອບຢາ ປົວພະຍາດມູນຄ່າ 1,2 ລ້ານກີບ ພິເສດທ່ານຫົວໜ້າພະແນກການເງິນແຂວງຍັງໄດ້ມອບເງິນຊ່ວຍເຫຼືອໃຫ້ອີກຈຳນວນ 2 ລ້ານກີບ, ລວມມູນຄ່າທັງໝົດຈຳນວນ 25,2 ລ້ານກີບ.

 ທ່ານ ແສງເພັດ ຄຳສຸວັນ ໄດ້ລາຍງານວ່າ: ເມືອງວິລະບູລີ ມີບ້ານທີ່ຖືກນໍ້າຖ້ວມຈຳນວນ 6 ບ້ານ, ມີເນື້ອທີ່ນາຖືກຖ້ວມ 600 ກວ່າເຮັກຕາ ມີ 20 ບ້ານ, ເສັ້ນທາງ ຫຼາຍສາຍຖືກຕັດຂາດ, ສະເພາະແຕ່ເສັ້ນທາງຈາກບ້ານນາບໍ່ (ທາງເລກ9) ເມືອງເຊໂປນຫາເມືອງວິລະບູລີ ແມ່ນຖືກຕັດຂາດຈຳນວນ 18 ຈຸດ, ມາຮອດວັນທີ 7 ກັນ ຍາ 2019 ແມ່ນຍັງມີ 3 ຈຸດ ທີ່ຕ້ອງໄດ້ໃຊ້ເຮືອໃນການສັນຈອນສຳລັບຄວາມເສຍຫາຍແມ່ນຍັງບໍ່ທັນສາມາດປະເມີນໄດ້ເທື່ອ.

------------

ໜັງສືພິມເສດຖະກິດ-ສັງຄົມ

แชร์