ແມ່ຍິງ ກວຕ ເອົາ 4 ຄາດໝາຍ 7 ທິດທາງຈັດຕັ້ງວຽກ 5 ປີຕໍ່ໜ້າ

  ກອງປະຊຸມໃຫຍ່ຜູ້ແທນແມ່ຍິງທົ່ວກະຊວງວິທະຍາສາດ ແລະເຕັກໂນໂລຊີ (ກວຕ) ຄັ້ງທີ II ໄດ້ໄຂຂຶ້ນໃນວັນທີ 9 ກັນຍາ 2019 ທີ່ສະຖາບັນຄຸ້ມຄອງວິທະຍາສາດ ແລະເຕັກໂນໂລຊີ ໂດຍການເປັນປະທານ ຂອງສະຫາຍ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ສະຫາຍ ບໍ່ວຽງຄຳ ວົງດາລາ ລັດຖະ ມົນຕີ ກວຕ, ສະຫາຍ ນາງ ໄມຕີ ວົງຄຳຊາວ ປະທານສະຫະພັນແມ່ຍິງ ກວຕ, ມີບັນດາຄະນະພັກ-ຄະນະນຳກະຊວງ, ບັນດາແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ

  ກອງປະຊຸມຄັ້ງນີ້ ໄດ້ຮັບຮອງເອົາບັນດາເນື້ອໃນສຳຄັນຄື: ຮັບຮອງເອົາບົດລາຍງານການເມືອງຂອງຄະນະບໍລິຫານງານສະຫະພັນແມ່ຍິງກວຕ ສະໄໝທີ I; ຮັບຮອງເອົາບົດສຳຫຼວດການນຳພາຂອງຄະນະບໍລິຫານງານສະຫະພັນແມ່ຍິງ ກວຕ ສະໄໝທີ I ແລະຮັບຮອງເອົາທິດທາງແລະໜ້າທີ່ຂອງສະຫະພັນແມ່ຍິງ ກວຕ ໃນ 5 ປີຕໍ່ໜ້າແຕ່ປີ 2019-2024 ຊຶ່ງລວມມີ 4 ຄາດໝາຍສູ້ຊົນ ແລະ7 ທິດທາງລວມ; ສໍາລັບຄາດໝາຍສູ້ຊົນທີ 1) ສະມາຊິກສະຫະພັນແມ່ຍິງພາຍໃນກະຊວງມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຮັກສາໄດ້ຄຸນລັກສະ ນະທີ່ເປັນມູນເຊື້ອອັນດີງາມຂອງແມ່ຍິງ, ເຕົ້າໂຮມຄວາມສາມັກຄີພາຍ ໃນແມ່ຍິງໃຫ້ເປັນປືກແຜ່ນແໜ້ນໜາ ແລະ ສາມັກຄີພາຍນອກໃຫ້ໄດ້ດີ; 2) ປັບປຸງ ແລະ ຂະຫຍາຍການຈັດຕັ້ງສະຫະພັນແມ່ຍິງກະຊວງໃຫ້ມີຄວາມໜັກແໜ້ນເຂັ້ມແຂງ; ຂະຫຍາຍສະມາຊິກສະຫະພັນແມ່ຍິງໃຫ້ໄດ້ 100%, ຝຶກຝົນຕົນເອງໃຫ້ໄດ້ເຂົ້າເປັນສະມາຊິກພັກໃຫ້ໄດ້ 55% ຂອງຈໍານວນ ສະມາຊິກສະຫະພັນແມ່ຍິງພາຍໃນກະຊວງ; 3) ປຸກລະດົມສະມາຊິກ ສະຫະພັນແມ່ຍິງເຂົ້າຮ່ວມຂະບວນການແຂ່ງຂັນ 3 ດີ ທີ່ຕິດພັນກັບຂະ ບວນການແຂ່ງຂັນຮັກຊາດ ແລະພັດທະນາ ໃຫ້ເປັນຂະບວນການຟົດຟື້ນ ແລະມີປະສິດທິຜົນ, ສູ້ຊົນໃຫ້ສະມາຊິກສະຫະພັນແມ່ຍິງກາຍເປັນບຸກຄົນ 3 ດີ ໃຫ້ໄດ້ເຖິງ 90% ແລະໜ່ວຍ 3 ດີ ໃຫ້ໄດ້100%; 4) ການປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ ແລະເດັກນ້ອຍ,ສົ່ງເສີມຄວາມກ້າວໜ້າຂອງແມ່ຍິງ ແລະຄວາມສະເໝີພາບຍິງ-ຊາຍໃຫ້ໄດ້ຮັບການຈັດຕັ້ງປະຕິບັດຢ່າງກວ້າງຂວາງ; ຊຸກຍູ້ແມ່ຍິງໃຫ້ໄດ້ຮັບການບັນຈຸຊັບຊ້ອນເຂົ້າໃນຕຳແໜ່ງນຳພາ-ຄຸ້ມຄອງໃຫ້ມີຈຳນວນເພີ່ມຂຶ້ນ.

ສ່ວນທິດທາງລວມ 1) ແມ່ນເພີ່ມທະວີຄວາມສາມັກຄີເປັນປຶກແຜ່ນ, ສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VIII ແລະມະຕິກອງປະຊຸມໃຫຍ່ຜູ້ແທນແມ່ຍິງ ກວຕ ຄັ້ງທີ II ໃຫ້ປາກົດຜົນເປັນຈິງ; 2) ສືບຕໍ່ປັບປຸງການຈັດຕັ້ງຂອງສະຫະພັນແມ່ ຍິງໃຫ້ມີຄວາມໜັກແໜ້ນເຂັ້ມແຂງ, ປັບປຸງແບບແຜນວິທີການນຳພາຂອງຄະນະສະຫະພັນແມ່ຍິງກະຊວງ ແລະຄະນະໜ່ວຍ; 3) ກໍ່ສ້າງ, ບຳລຸງສະມາຊິກສະຫະພັນແມ່ຍິງໃຫ້ມີຄຸນທາດການເມືອງ, ຄຸນສົມ ບັດສິນທຳປະ ຕິວັດ, ມີຄວາມຮູ້, ຄວາມສາມາດຕອບສະໜອງຄວາມຮຽກຮ້ອງຕ້ອງ ການຂອງໜ້າທີ່ການເມືອງ; 4) ສົ່ງເສີມການປົກປ້ອງສິດຜົນປະໂຫຍດ ອັນຊອບທໍາຂອງແມ່ຍິງ ແລະເດັກນ້ອຍ, ຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ຄອບຄົວ ແລະສັງຄົມ; 5) ປະຕິບັດຄຳ ຂວັນຂໍ້ແຂ່ງຂັນ 3 ດີ ຂອງສະຫະ ພັນແມ່ຍິງຕິດພັນກັບຂະບວນການ ແຂ່ງຂັນຮັກຊາດ ແລະພັດທະນາ; 6) ຜັນຂະຫຍາຍແຜນພັດທະນາເສດ ຖະກິດ-ສັງຄົມແຫ່ງຊາດ 5 ປີ ຄັ້ງທີ IX  ເຂົ້າໃນການປະຕິບັດແຜນພັດທະນາແມ່ຍິງ 5 ປີ (2021-2025); 7) ຊຸກຍູ້,ຕິດຕາມ, ກວດກາປະເມີນຜົນການເຄື່ອນໄຫວວຽກງານຮອບດ້ານຂອງສະຫະພັນແມ່ຍິງ ກວຕ.

  ກອງປະຊຸມໃຫຍ່ຄັ້ງນີ້ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງ ກວຕ ຊຸດໃໝ່ ຊຶ່ງມີຜູ້ລົງສະໝັກ 15 ສະຫາຍ ເລືອກ ເອົາ 11 ສະຫາຍ, ຜົນການເລືອກຕັ້ງເອົາສະຫາຍນາງ ແກ້ວໄພວັນ ດວງສະຫວັນ ເປັນປະທານຄະນະບໍລິຫານງານສະຫະພັນແມ່ຍິງ ກວຕ, ສະຫາຍນາງ ໂສດາ ລາຊະສິມມາເປັນຮອ ງ, ສະຫາຍ ນາງ ນິສິດ ຄໍາມູນເຮືອງ ເປັນຮອງທັງເປັນປະທານກວດກາຂອງຄະນະບໍລິຫານງານສະຫະພັນແມ່ຍິງ ກວຕ ແລະເອົາ 8 ສະຫາຍເປັນຄະນະ.

-----------

ໂດຍ: ນໍ້າເໝີຍ

แชร์