ວິທີປູກ ແລະຮັກສາໝາກຖົ່ວໃຫ້ໄດ້ຜົນຜະລິດສູງ

 ຖົ່ວເປັນພືດຈັດຢູ່ໃນຕະກູນພືດສີຂຽວ, ເປັນເຄືອ, ສາມາດນໍາໄປປະກອບອາຫານໄດ້ຫຼາຍຊະນິດເຊັ່ນ: ຂົ້ວ, ແກງ, ລວກຈໍ້າແຈ່ວ, ຕໍາສົ້ມ... ນອກຈາກຈະເປັນພືດຜັກທີ່ມີຄຸນຄ່າທາງອາຫານແລ້ວການປູກຖົ່ວຍັງຊ່ວຍປັບປຸງສະພາບຂອງດິນໃຫ້ດີຂຶ້ນອີກດ້ວຍ, ເພາະຮາກຂອງໝາກຖົ່ວສາມາດເກັບໄນໂຕຣເຈນຈາກອາກາດໄວ້ໃນດິນ.

  ແຫຼ່ງຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ຖົ່ວເປັນພືດທີ່ປູກງ່າຍ, ໃຫຍ່ໄວ ແລະ ປູກໄດ້ຕະຫຼອດປີໃນດິນເກືອບທຸກຊະນິດ, ແຕ່ປູກໄດ້ດີໃນດິນຮ່ວນປົນຊາຍ,ລະບາຍນໍ້າໄດ້ດີ, ມີຄວາມເປັນກົດດ່າງຂອງດິນຢູ່ລະຫວ່າງ 5,5-6, ຕ້ອງການແສງແດດຕະຫຼອດມື້, ມັກອາກາດຮ້ອນປານກາງ, ຖ້າອາກາດໜາວເກີນໄປຈະເຮັດໃຫ້ຖົ່ວຢຸດສະງັກການຈະເລີນເຕີບໂຕຈະໃຫ້ໄດ້ຜົນຜະລິດນ້ອຍ, ຝັກບໍ່ງາມ, ການປູກຖົ່ວໃຫ້ຖືກລະດູການຈະຊ່ວຍໃຫ້ໄດ້ຮັບຜົນຜະລິດດີໃນໄລ ຍະຕົ້ນລະດູຝົນໂດຍເລີ່ມແຕ່ເດືອນພຶດສະພາຮອດເດືອນກໍລະກົດ, ອຸນຫະພູມທີ່ເໝາະສົມສໍາລັບການຈະເລີນເຕີບໂຕຢູ່ໃນລະຫວ່າງ 15-30 ອົງສາ. 

  ສໍາລັບວິທີການປູກຕ້ອງມີການກະກຽມດິນຍົກຮ່ອງໜານໃຫ້ກວ້າງປະມານ 1-1,20 ແມັດ, ສ່ວນຄວາມຍາວແລ້ວແຕ່ສະພາບໜານ, ຕາກດິນໄວ້ 7-10 ມື້ ເພື່ອທໍາລາຍໄຂ່ແມງໄມ້ ແລະສັດຕູພືດບາງຊະນິດແລ້ວໄຖຄາດ, ໃສ່ຝຸ່ນຄອກ ຫຼືຝຸ່ນບົ່ມເພື່ອປັບສະພາບໂຄງສ້າງຂອງດິນ;ຈາກນັ້ນເຮັດຂຸມປູກໃຫ້ຂຸດຂຸມເລິກປະມານ 2 ນິ້ວ, ການປູກຕ້ອງກະໄລຍະຫ່າງຕົ້ນ 50 ຊັງຕີແມັດ, ຮອງພື້ນຂຸມດ້ວຍປຸ໋ຍເຄມີອົງຄະທາດກາບົວທິບສູດ 2 ໃນອັດຕາ 1 ບ່ວງຊາຕໍ່ຂຸມຄົນໃຫ້ເຂົ້າກັບດິນແລ້ວຢອດເມັດຖົ່ວລົງໄປຂຸມລະ 2-3 ເມັດຕາມດ້ວຍ ຝຸ່ນຄອກໜານພຽງເລັກນ້ອຍຈາກນັ້ນໃຫ້ເອົາຫຍ້າແຫ້ງ ຫຼື ເຟືອງແຫ້ງປົກທັບ ແລະຫົດນໍ້າທັນທີ, ຫຼັງຈາກປູກໄປແລ້ວ 7-15 ມື້ ເລີ່ມມີໃບ 2-3 ໃບ ໃຫ້ເລືອກເອົາຕົ້ນທີ່ສົມບູນໄວ້ 2 ຕົ້ນຕໍ່ຂຸມ.

  ສ່ວນການຮັກສາຖົ່ວເປັນພືດທີ່ຕ້ອງການນໍ້າຢ່າງສະໝໍ່າສະເໝີ, ການໃຫ້ນໍ້າໃນໄລຍະອາທິດທຳອິດຫຼັງຢອດເມັດຖົ່ວຄວນຫົດນໍ້າທຸກມື້ຢ່າໃຫ້ດິນແຫ້ງ, ແຕ່ຢ່າໃຫ້ຫຼາຍເກີນໄປເພາະຈະເຮັດໃຫ້ເມັດເນົ່າໄດ້, ໄລຍະ ການຈະເລີນເຕີບໂຕ ແລະເລີ່ມອອກດອກຢ່າໃຫ້ຂາດນໍ້າເປັນອັນຂາດເພາະຈະເຮັດໃຫ້ດອກຮ່ວງ ແລະບໍ່ເປັນໝາກ ຫຼື ໝາກອາດຈະບໍ່ສົມບູນ, ຄວນໃຫ້ນໍ້າມື້ລະ 2 ເທື່ອໃນຕອນເຊົ້າແລງ; ການໃສ່ຝຸ່ນຫຼັງໃສ່ຝຸ່ນຮອງພື້ນຂະ ນະກຽມໜານປູກ ແລະໃສ່ອີກເມື່ອຖົ່ວມີອາຍຸ ໄດ້ 15-20 ມື້ ໂດຍໃຊ້ປຸ໋ຍເຄມີອົງຄະທາດສູດ 2 ໃນອັດຕາ ສ່ວນ 1 ບ່ວງຊາຕໍ່ຂຸມ ແລະສຸດທ້າຍແມ່ນໃຫ້ໃສ່ເມື່ອເລີ່ມເກັບຜົນຜະລິດຖົ່ວຄັ້ງທໍາອິດອາຍຸປະມານ 45-50 ມື້, ໂດຍໃຫ້ໃສ່ຝຸ່ນຄອກ ຫຼື ຝຸ່ນບົ່ມຢ່າງສະໝໍ່າສະເໝີ ແລະຄວນພວນດິນກໍາຈັດສັດຕູພືດທຸກເທື່ອເມື່ອມີການໃສ່ຝຸ່ນ.

  ນອກນີ້ຖົ່ວຍັງເປັນພືດທີ່ຕ້ອງອາໄສຄ້າງເພື່ອປະຄອງລໍາຕົ້ນ,ດັ່ງນັ້ນຄວນເຮັດໄມ້ຄ້າງໃຫ້ເພື່ອຈະໄດ້ຜົນຜະລິດທີ່ດີ ແລະມີຄຸນນະພາບສູງໂດຍໃຊ້ໄມ້ໄຜ່ຍາວ 2-2,5 ແມັດ ການປັກຄ້າງອາດຈະປັກແບບເອົາປາຍເນີ້ງເຂົ້າຫາກັນ ຫຼືປັກແບບຊື່ໆແຕ່ລະຕົ້ນກໍ່ໄດ້, ຫຼັງປັກຄ້າງສໍາເລັດແລ້ວໃຫ້ຈັບເອົາເຄືອຖົ່ວພັນຮອບໄມ້ຄ້າງ; ສ່ວນການເກັບກ່ຽວຫຼັງປູກແລ້ວປະມານ 50-60 ມື້ສາມາດເກັບກ່ຽວໄດ້,ແຕ່ໃຫ້ເລືອກເກັບສະເພາະໝາກທີ່ຂະໜາດພໍດີບໍ່ອ່ອນເກີນໄປຄວນເລືອກເກັບໃນເວລາເຊົ້າ ຫຼື ແລງໆເພື່ອບໍ່ໃຫ້ຖົ່ວຫ່ຽວ, ການເກັບໃຫ້ຫ່າງກັນ 2-3 ມື້ຕໍ່ຄັ້ງ.

---------

ໜັງສືພິມເສດຖະກິດ-ສັງຄົມ

แชร์