ບ້ານ 3 ສ້າງ ຍອດງື່ມຮັບຜົນປະໂຫຍດສູງຈາກແຫຼ່ງທຶນ ທນບ

 ບ້ານຍອດງື່ມ ເມືອງແປກ ແຂວງຊຽງຂວາງ ເປັນບ້ານ 3 ສ້າງ ແລະສ້າງເປັນຕົວເມືອງນ້ອຍຢູ່ຊົນນະບົດຊຶ່ງອີກບ້ານໜຶ່ງທີ່ຮັບການພັດທະນາ ແລະມີບາດກ້າວຫັນປ່ຽນໃໝ່ດີຂຶ້ນກວ່າເກົ່າໂດຍສະເພາະປະຊາຊົນບ້ານດັ່ງກ່າວມີມູນເຊື້ອດຸໝັ່ນຂະຫຍັນພຽນໃນການອອກແຮງງານ, ສ່ວນໃຫຍ່ຖືເອົາການເຮັດນາເປັນອາຊີບຕົ້ນຕໍ, ເອົາການລ້ຽງສັດ ແລະ ຫັດຖະກຳເປັນອາຊີບສຳຮອງຊຶ່ງຜ່ານມາເພື່ອສ້າງເງື່ອນໄຂສະດວກໃຫ້ແກ່ປະຊາຊົນໃນການພັດທະນາຄອບຄົວ; ການຈັດຕັ້ງບ້ານຍອດງື່ມ, ຈຶ່ງໄດ້ນໍາສະເໜີຂໍກູ້ຢືມເງິນນຳທະນາຄານນະໂຍບາຍ (ທນບ) ເພື່ອມາລ້ຽງສັດເປັນສີນຄ້າ.

ດັ່ງທ່ານ ນາງ ກົງເດືອນ ດາລາແສນ ຮອງນາຍບ້ານຍອດງື່ມ ໄດ້ແຈ້ງໃຫ້ຮູ້ວ່າ: ໃນປີ 2013 ໄດ້ສະເໜີຂໍທຶນຈາກ ທນບ ເພື່ອມາລ້ຽງໝູແລະລ້ຽງງົວຈຳນວນ 24 ກຸ່ມ 149 ຄອບຄົວ ດ້ວຍວົງເງິນກູ້ຢືມ 2.566 ລ້ານກີບ; 2014  ໄດ້ສະເໜີຂໍທຶນຕື່ມອີກເພື່ອລ້ຽງງົວ ຈຳນວນ 8 ກຸ່ມ75 ຄອບຄົວ,ຈໍານວນເງິນກູ້ຢືມ 1.512 ລ້ານກີບ; ປີ 2015 ໄດ້ສະເໜີຂໍທຶນຕື່ມຊຶ່ງສູງກວ່າວົງເງິນກູ້ໃນປີຜ່ານມາເພື່ອມາລ້ຽງງົວຈຳນວນ13 ກຸ່ມ 130 ຄອບຄົວ ມີຈຳນວນເງິນກູ້ຢືມ 3.270 ລ້ານກີບ; ປີ 2016 ໄດ້ກູ້ເງິນມາລ້ຽງງົວມີ 10 ກຸ່ມ 109 ຄອບຄົວ ກວມເອົາ 13,09% ຂອງຄອບຄົວທັງໝົດຈຳນວນເງິນກູ້ຢືມ 1.924 ລ້ານກີບ; ປີ 2017 ໄດ້ສະ ເໜີຂໍທຶນຈາກ ທນບ ມາລ້ຽງງົວມີ 10 ກຸ່ມ 109 ຄອບຄົວ ກວມເອົາ 13,09% ຂອງຄອບຄົວທັງໝົດຈຳນວນເງິນກູ້ຢືມ 578 ລ້ານກີບ; ປີ 2018 ໄດ້ຢືມຕື່ມຈຳນວນ 3 ກຸ່ມ 23 ຄອບຄົວກວມເອົາ 13,09% ຂອງຄອບຄົວທັງໝົດຈຳນວນເງິນກູ້ຢືມ1.907 ລ້ານກີບ ແລະໃນປີ 2019 ໄດ້ສະເໜີຂໍທຶນຈາກ ທນບ ເພື່ອມາລ້ຽງງົວ ຈຳນວນ 8 ກຸ່ມ 46 ຄອບຄົວ ຈຳນວນເງິນກູ້ຢືມ 1.385 ລ້ານກີບ.

  ທ່ານຮອງນາຍບ້ານໄດ້ຢືນຢັນຕື່ມວ່າ: ການສະໜອງສີນເຊື່ອມາຮອດຕົ້ນເດືອນ 9 ປີ 2019 ບ້ານຍອດງື່ມມີຈຳນວນ 63 ກຸ່ມ, 356 ຄອບຄົວ ມີຍອດສີນເຊື່ອ ທັງໝົດ 7.958 ລ້ານກີບ ຊຶ່ງການນຳໃຊ້ເງິນກູ້ຂອງປະຊົນເຫັນວ່ານຳໃຊ້ເງິນກູ້ຖືກຕ້ອງຕາມເປົ້າໝາຍ; ການຊຳລະຕົ້ນທຶນ ແລະດອກເບ້ຍແຕ່ລະງວດແມ່ນປະຕິ ບັດໄດ້ຕາມສັນຍາທີ່ກຳນົດໄວ້,ບໍ່ມີໜີ້ກາຍສັນຍາພາຍໃນບ້ານເພາະ ທນບ ໄດ້ແຕ່ງຕັ້ງຄະນະກຳມະການຄຸ້ມຄອງສີນເຊື່ອຂັ້ນບ້ານຊີ້ນຳ ແລະອຳນາດການປົກຄອງບ້ານກໍ່ໄດ້ມີທິດຊີ້ນຳ, ລົງໃກ້ສິດຕິດແທດເຖິງແຕ່ລະຄອບຄົວໂດຍກົງຕໍ່ຜູ້ທີ່ໄດ້ຮັບເງິນກູ້ຂອງທະນາຄານເຮັດໃຫ້ເກີດມີໂຄງການພົນເດັ່ນ ແລະຄອບຄົວຕົວແບບໃນການລ້ຽງໝູ ແລະລ້ຽງງົວຈຳນວນ 6 ຄອບຄົວ.

ທ່ານຮອງນາຍບ້ານ ນາງ ກົງເດືອນ ດາລາແສນ ໄດ້ໃຫ້ຮູ້ອີກວ່າ: ກ່ອນການໄດ້ຮັບເງິນກູ້ຊີວິດການເປັນຢູ່ຂອງປະຊາຊົນພາຍໃນບ້ານຈໍານວນໜຶ່ງພົບກັບຄວາມຫຍຸ້ງ ຍາກ, ອາໄສການເຮັດໄຮ່-ເຮັດນາ ແລະໃນເວລາຫວ່າງກໍ່ຊອກຫາເຮັດວຽກຢູ່ໃນເມືອງເພື່ອສ້າງລາຍຮັບເຂົ້າຄອບຄົວພໍແຕ່ກຸ້ມກິນ,ເຮືອນກໍ່ບໍ່ທັນຖາວອນ ແລະພາຍ ຫຼັງໄດ້ຮັບເງິນກູ້ຈາກ ທນບ ສາຂາຊຽງຂວາງ ເພື່ອນຳໃຊ້ເຂົ້າໃນການລ້ຽງງົວມາເປັນໄລຍະເວລາ 7 ປີຜ່ານມາເຫັນວ່າປະຊາຊົນພາຍໃນບ້ານແມ່ນມີເຕັກນິກໃນການປູກ-ການລ້ຽງເນື່ອງຈາກທາງ ທນບ ໄດ້ຕັ້ງຄະນະກຳມະການຄຸ້ມຄອງສີນເຊື່ອຂັ້ນເມືອງ, ຂັ້ນແຂວງໂດຍສະເພາະແມ່ນຫ້ອງການກະສິກຳ-ປ່າໄມ້ລົງສອນວິທີການສັກຢາປ້ອງກັນພະຍາດ, ການປູກຫຍ້າທອມສັດຂາຍສະເລ່ຍການຂາຍງົວໃນແຕ່ລະປີແມ່ນຂາຍ 3-4 ໂຕຕໍ່ຄອບຄົວເຮັດໃຫ້ມີລາຍຮັບເພີ່ມຂຶ້ນຫຼາຍກວ່າເກົ່າເຮັດໃຫ້ຄອບຄົວພາຍໃນບ້ານມີຊີວິດການເປັນຢູ່ດີຂຶ້ນໃນເມື່ອກ່ອນເຄີຍຢູ່ເຮືອນໄມ້ ແລະ ໃນປະຈຸບັນເຫັນວ່າໄດ້ຢູ່ເຮືອນກໍ່ຈຳນວນຫຼາຍ ແລະ ມີເງິນສົ່ງໃຫ້ລູກໄດ້ຮໍ່າຮຽນຢູ່ພາຍໃນແຂວງແລະຕ່າງແຂວງ.

-------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์