ເຊີນສໍາຜັດ ຄວາມງາມ ຕາດຫີນປາຝາ

   ແຂວງວຽງຈັນເປັນອີກໜຶ່ງຈຸດໝາຍປາຍທາງດ້ານການທ່ອງທ່ຽວທີ່ມີຄວາມໂດດເດັ່ນທາງດ້ານທຳມະຊາດ,ປະຫວັດສາດ ແລະວັດທະນະທໍາເພາະອຸດົມສົມບູນໄປດ້ວຍຊັບພະຍາກອນທຳມະຊາດທີ່ຫຼາກຫຼາຍສຳຄັນຍັງມີສະຖານທີ່ຄອຍໃຫ້ນັກທ່ອງທ່ຽວໄດ້ທ່ຽວຊົມອັນເປັນທີ່ນິຍົມຂອງຜູ້ຄົນທາງພາຍໃນ ແລະຕ່າງປະເທດ ໂດຍສະເພາະແມ່ນຕາດຫີນປາຝາ.

ຕາດຫີນປາຝາເປັນສະຖານທີ່ທ່ອງທ່ຽວທຳມະຊາດທີ່ສວຍງາມແຫ່ງໜຶ່ງທີ່ບໍ່ຄວນພາດສຳລັບຜູ້ທີ່ມັກ-ຮັກທຳມະຊາດ,ຮັກການຍ່າງຊົມປ່າ,ໄດ້ສໍາຜັດກັບອາກາດບໍລິ ສຸດ,ມີນໍ້າໃສໄຫຼເຢັນດີທີ່ສໍາຄັນສາມາດລົງຫຼິ້ນນໍ້າໄດ້ສະດວກສະບາຍຕາດຫີນປາຝາ ຕັ້ງຢູ່ບ້ານນາເງິນ ເມືອງທຸລະຄົມ ແຂວງວຽງຈັນຫ່າງຈາກທາງເລກ 10 ເຂົ້າໄປ ປະມານ 8 ກິໂລແມັດ.

ຊາວບ້ານໄດ້ເລົ່າປາກຕໍ່ປາກກັນວ່າເງີບຫີນຂະໜາດໃຫຍ່ດັ່ງກ່າວເປັນຜົ້ງຄ້າຍຄືຖໍ້າ ແລະເຄີຍມີພະທຸດົງເດີນທາງມາປະຕິບັດທຳຢູ່ສະຖານທີ່ແຫ່ງນີ້,ຢູ່ດ້ານ ໜ້າຫີນປາຝາກໍຍັງມີຫີນຂະໜາດໃຫຍ່ຄ້າຍຄືງູໃຫຍ່,ຊຶ່ງທັງໝົດທີ່ວ່ານີ້ຈຶ່ງເປັນທີ່ມາ ແລະສັນຍາລັກຂອງຄຳວ່າຕາດຫີນປາຝາຖ້າທ່ານໃດທີ່ຕ້ອງການພັກຜ່ອນຢ່ອນໃຈສາມາດເດີນທາງໄປພັກຜ່ອນ ແລະຊົມທິວທັດທໍາມະຊາດ ໂດຍມີນໍ້າໃສໄຫຼເຢັນ ແລະພູຜາປ່າດົງທີ່ມີຄວາມອຸດົມສົມບູນທາງທຳມະຊາດນາໆພັນ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 12/09/2019