3 ແຂວງ 3 ປະເທດ ຮ່ວມຫາລືອຳນວຍຄວາມສະດວກຄ້າຊາຍແດນ

 ກອງປະຊຸມປຶກສາຫາລືລະຫວ່າງພາກລັດ ແລະພາກທຸລະກິດວ່າດ້ວຍການອຳນວຍຄວາມສະດວກການຄ້າຊາຍແດນລະຫວ່າງແຂວງສະຫວັນນະເຂດ ສປປ ລາວ, ແຂວງກວາງຈິ ສສ ຫວຽດນາມ ແລະແຂວງມຸກດາຫານຣາຊະອານາຈັກໄທພາຍໃຕ້ການສະໜັບສະໜູນຂອງສະຖາບັນລຸ່ມແມ່ນໍ້າຂອງໄດ້ຈັດຂຶ້ນທີ່ແຂວງສະຫວັນນະເຂດໃນວັນທີ 9 ກັນຍາ 2019 ໂດຍເຂົ້າຮ່ວມມີ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ຫງວຽນ ກວນຈິນ ຮອງປະທານຄະນະກຳມະການປະຊາຊົນແຂວງກວາງຈິ, ທ່ານ ສຸພາກອນ ມູນລະສຸວັນ ຮອງຜູ້ວ່າຣາຊະການແຂວງມຸກດາຫານ, ຕະຫຼອດເຖິງພາກສ່ວນຕ່າງໆທີ່ກ່ຽວຂ້ອງທັງ 3 ແຂວງເຂົ້າຮ່ວມ.

  ທ່ານ ທ່ອນແກ້ວ ພຸດທະໄກຍະລາດ ກ່າວວ່າ: ກອງປະຊຸມຄັ້ງນີ້ແມ່ນເພື່ອເປີດໂອກາດໃຫ້ບັນດາພະແນກການ ແລະຂະແໜງການທີ່ກ່ຽວຂ້ອງຈາກພາກລັດ ແລະທຸລະກິດ ໄດ້ມາພົບປະສົນທະນາ, ແລກປ່ຽນບົດຮຽນຮ່ວມກັນ ເພື່ອແກ້ ໄຂຂອດອຸປະສັກສິ່ງກີດຂວາງຕ່າງໆ ໃນການປະກອບທຸລະກິດໂດຍສະເພາະກໍ່ແມ່ນທຸລະກິດປະເພດສິນຄ້າກະສິກຳ ແລະການບໍລິການທີ່ຕິດພັນກັບສິນຄ້າກະສິກຳ ຊຶ່ງສິນຄ້າກະສິກຳກໍ່ແມ່ນໜຶ່ງໃນໝວດສິນຄ້າຕົ້ນຕໍ ທີ່ມີການນຳເຂົ້າ ແລະສົ່ງອອກຜ່ານທັງ 2 ດ່ານແຂວງຄູ່ ລະຫວ່າງ 3 ແຂວງ 3 ປະເທດ ນັ້ນກໍ່ຄື ດ່ານສາກົນຂົວມິດຕະພາບລາວ-ໄທ ແຫ່ງທີ II ແລະດ່ານສາກົນແດນສະຫວັນ-ລາວບາວ ເພາະສະນັ້ນ ກອງປະຊຸມໃນມື້ນີ້ກໍ່ແມ່ນອີກໜຶ່ງຂີດໝາຍສຳຄັນຂອງການຮ່ວມມືກັນລະຫວ່າງ 3 ແຂວງ 3 ປະເທດ ເພື່ອອຳນວຍຄວາມສະດວກການຄ້າຊາຍແດນໃຫ້ກັບຜູ້ປະ ກອບການ ແລະເພີ່ມປະສິດທິພາບປະສິດທິຜົນການຄຸ້ມຄອງວຽກງານການຄ້າຊາຍແດນຂອງພາກລັດເຊັ່ນດຽວກັນ.

  ກອງປະຊຸມຄັ້ງນີ້ແມ່ນຈັດຂຶ້ນເປັນຄັ້ງທີ II ທີ່ສືບເນື່ອງມາຈາກຜົນໄດ້ຮັບອັນດີຂອງກອງປະຊຸມທີ່ຜ່ານມາຊຶ່ງສະແດງອອກບ່ອນວ່າບັນດາຂໍ້ສະເໜີພາກທຸລະກິດໄດ້ຮັບການພິຈາລະນາ ແລະ ນຳໄປສູ່ການຈັດຕັ້ງປະຕິບັດໃນທາງທີ່ດີຂຶ້ນດັ່ງນັ້ນກອງປະຊຸມຄັ້ງນີ້ບໍ່ພຽງແຕ່ເປັນການສະຫຼຸບ-ລາຍງານການຈັດຕັ້ງປະຕິບັດບັນດາຂໍ້ສະ ເໜີຂອງກອງປະຊຸມໃນຄັ້ງທີ່ຜ່ານມາແຕ່ຍັງເປັນການສົນທະນາປຶກສາຫາລື ແລະຫາແນວທາງແກ້ໄຂບັນຫາ ແລະຂໍ້ສະເໜີອັນໃໝ່ເພີ່ມຕື່ມອີກ.

----------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์