ອາຫານ, ເຮືອ, ຢາ ແລະເຄື່ອງໃຊ້ຄົວເຮືອນຄືສິ່ງທີ່ຜູ້ປະສົບໄພນໍ້າຖ້ວມຕ້ອງການດ່ວນ

  ສະພາບນໍ້າຖ້ວມໃນ 6 ແຂວງພາກກາງ ແລະພາກໃຕ້, ປະຈຸບັນບາງເຂດກໍໄດ້ມີການບົກແຫ້ງແລ້ວ, ແຕ່ບາງເຂດຍັງໜັກໜ່ວງສົມຄວນເຮັດໃຫ້ການສັນຈອນຖືກຕັດຂາດ, ບໍ່ມີໄຟຟ້າ ແລະນໍ້າປະປາໃຊ້, ເຮືອນຊານຍັງຈົມຢູ່ນໍ້າຂະນະທີ່ປະຊາຊົນຈຳນວນໜຶ່ງຍັງລໍຖ້າການຊ່ວຍເຫຼືອຈາກສັງຄົມ,ຊຶ່ງສິ່ງທີ່ພວກເຂົາຕ້ອງການອັນຮີບດ່ວນທັງເປັນປັດໄຈສຳຄັນແມ່ນອາຫານ, ນໍ້າ, ເຮືອສຳລັບຍົກຍ້າຍ, ຢາປົວພະຍາດ, ເຄື່ອງໃຊ້ຄົວເຮືອນ ແລະ ເຕັ້ນສຳລັບຜູ້ອົບພະຍົບ.

 ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ປະທານຄະນະກຳມະການປ້ອງກັນແລະຄວບຄຸມໄພພິບັດແຫ່ງ ຊາດໄດ້ຖະແຫຼງຂ່າວຕໍ່ສື່ມວນຊົນໃນວັນທີ 10 ກັນຍາ, ທີ່ກະຊວງ ຮສສ ຮູ້ວ່າ: ຕໍ່ກັບສະພາບຜົນກະທົບແລະຄວາມເສຍຫາຍທີ່ເກີດຂຶ້ນຈາກເຫດການໄພນໍ້າຖ້ວມໃນຄັ້ງນີ້ ແມ່ນຮ້າຍແຮງສົມຄວນເມື່ອທຽບກັບປີຜ່ານມາ, ສ່ວນຄວາມເສຍຫາຍກວມເອົາວົງກວ້າງກວ່າ, ແຕ່ພາຍຫຼັງທີ່ເກີດເຫດອໍານາດການປົກຄອງ ແລະຄະນະກໍາມະການປ້ອງກັນ ແລະຄວບຄຸມໄພພິບັດຂັ້ນທ້ອງຖິ່ນໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫຼວດ ແລະປະຊາຊົນພາຍໃນບ້ານປະຕິບັດການຍົກຍ້າຍທັງຄົນ, ສັດ ແລະຊັບສິນອື່ນໆ ໄປບ່ອນທີ່ປອດໄພ, ຈັດສັນສະຖານທີ່ພັກເຊົາຊົ່ວຄາວ ແລະ ສະໜອງບັນເທົາທຸກສຸກເສີນຂັ້ນພື້ນຖານດ້ານເຄື່ອງອຸປະໂພກ-ບໍລິໂພກເປັນຕົ້ນອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະອື່ນໆ, ພ້ອມດຽວກັນນັ້ນກໍສືບຕໍ່ຄົ້ນຫາ ແລະຊ່ວຍເຫຼືອຜູ້ທີ່ຍັງຕິດຄ້າງຢູ່ຕາມເກາະດອນ, ຕາມຈຸດຕ່າງໆໃຫ້ອອກມາສູ່ສູນພັກຊົ່ວຄາວດ້ວຍຄວາມປອດໄພ.

 ສະເພາະການປະຕິບັດໃຫ້ການຊ່ວຍເຫຼືອຂອງຄະນະກໍາມະການປ້ອງກັນ ແລະຄວບຄຸມໄພພິບັດແຫ່ງຊາດ, ກະຊວງ ຮສສ ໃນນາມປະທານຄະນະກໍາມະການປ້ອງ ກັນ ແລະຄວບຄຸມໄພພິບັດແຫ່ງຊາດໂດຍໄດ້ຮັບການມອບໝາຍຂອງຂັ້ນເທິງກໍໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ, ພ້ອມທັງໄດ້ປະ ຕິບັດໃຫ້ການຊ່ວຍເຫຼືອບັນເທົາທຸກສຸກເສີນຕົ້ນຕໍໄດ້ສົມທົບກັບກອງທັບນໍາໃຊ້ລົດແລະຍົນເພື່ອຈັດສົ່ງພາຫະນະ, ອຸປະກອນ ແລະເຄື່ອງຊ່ວຍເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງຕົ້ນຕໍແມ່ນ ເຮືອກູ້ໄພ 39 ລໍາເພື່ອນໍາໃຊ້ເຂົ້າໃນການກູ້ໄພ ແລະຍົກຍ້າຍປະຊາຊົນພ້ອມຊັບສິນ, ເຕັ້ນນອນຄອບຄົວ 120 ຊຸດ, ນໍ້າດື່ມ 3 ພັນກວ່າແພັກ, ເຄື່ອງໃຊ້ຄົວເຮືອນ 300 ກວ່າຊຸດ ແລະເງິນຈໍານວນ 5 ຕື້ກີບ ທີ່ລັດຖະບານຈັດສັນໃຫ້ແມ່ນໄດ້ນໍາໄປຊ່ວຍເຫຼືອ ແລະມອບ ໃຫ້ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມໃນຄັ້ງນີ້, ລວມທັງໄດ້ມອບເງິນໃນບ້ວງກອງທຶນແຮນໍ້າມັນສຸກເສີນໃຫ້ແຂວງລະ 50 ລ້ານກີບ ເພື່ອນໍາໃຊ້ເຂົ້າໃນການບໍລິຫານຂົນສົ່ງເຄື່ອງຊ່ວຍເຫຼືອບັນເທົາທຸກໄປໃຫ້ຜູ້ປະສົບໄພພິບັດ, ສ່ວນຄວາມເສຍຫາຍອື່ນໆແມ່ນລໍຖ້າໃຫ້ແຂວງເກັບກຳແລະລາຍງານຢູ່.

  ທ່ານ ຄໍາແພງ ໄຊສົມແພງ ໃຫ້ຮູ້ຕື່ມວ່າ: ປະຈຸບັນ ສິ່ງທີ່ຜູ້ປະສົບໄພຈາກທັງ 6 ແຂວງຄື: ຄຳມ່ວນ, ສະຫວັນນະເຂດ, ຈຳປາສັກ, ສາລະວັນ, ອັດຕະປື ແລະ ເຊ ກອງຕ້ອງການຫຼາຍກວ່າໝູ່, ທັງເປັນປັດໄຈຮີບດ່ວນທີ່ພວມລໍຖ້າສັງຄົມຊ່ວຍເຫຼືອ, ຊຶ່ງປະຈຸບັນຢູ່ກະຊວງກໍໄດ້ເປີດຮັບບໍລິຈາກໃນນາມຂັ້ນສູນກາງ, ສ່ວນຢູ່ຂັ້ນທ້ອງ ຖິ່ນແມ່ນຫ້ອງການປົກຄອງແຂວງ, ໂດຍຜ່ານມາກໍໄດ້ມີຫຼາຍພາກສ່ວນຈາກສັງຄົມທີ່ເຂົ້າມາໃຫ້ການຊ່ວຍເຫຼືອທັງເປັນເງິນ, ເຄື່ອງອຸປະໂພກ-ບໍລິໂພກຈຳນວນໜຶ່ງ ແລະເຄື່ອງຈຳນວນດັ່ງກ່າວແມ່ນໄດ້ນໍາໄປຊ່ວຍເຫຼືອຜູ້ປະສົບໄພພິບັດແລ້ວ, ແຕ່ຖ້າເບິ່ງຕາມຄວາມຈິງ ແລະ ບາງເຂດສະພາບນໍ້າຍັງບໍ່ທັນຫຼຸດ, ບາງກຸ່ມຄົນຍັງຕິດຢູ່ຕາມເຮືອນ,ເກາະດອນ, ດັ່ງນັ້ນສິ່ງທີ່ພວກເຂົາຕ້ອງການຫຼາຍກວ່າໝູ່ຍັງແມ່ນເຂົ້າກິນ, ນໍ້າດື່ມ, ເຄື່ອງໃຊ້ຄົວເຮືອນ,ເຮືອສຳລັບຂົນຍ້າຍ ແລະຢາປົວພະຍາດ, ເຄື່ອງ ນຸ່ງຫົ່ມ, ເຄື່ອງນອນ, ເຄື່ອງໃຊ້ສ່ວນຕົວ, ເຕັ້ນນອນຄອບຄົວ, ຕະຫຼອດຮອດອຸປະກອນສຳລັບການຮຽນ-ການສອນພາຍຫຼັງນໍ້າແຫ້ງ.

  ເຖິງຢ່າງໃດກໍເພື່ອສຸມໃສ່ຮັບມືໃນຕໍ່ໜ້າຈຶ່ງຮຽກຮ້ອງໃຫ້ທຸກພາກສ່ວນຈົ່ງເປັນເຈົ້າການໃນການເຝົ້າລະວັງກຽມພ້ອມຮັບມື, ພ້ອມທັງຕິດຕາມພະຍາກອນ ແລະແຈ້ງຂ່າວເຕືອນໄພລ່ວງໜ້າ, ສ່ວນກະຊວງກໍຈະສືບຕໍ່ໃຫ້ການຊ່ວຍເຫຼືອສຸກເສີນແລະຟື້ນຟູຮີບດ່ວນ, ທັງສົ່ງທີມປະເມີນສຸກເສີນເພື່ອເຮັດການປະເມີນຄວາມເສຍ ຫາຍ ແລະຄວາມຕ້ອງການເພື່ອສ້າງແຜນຊ່ວຍເຫຼືອ ແລະຟື້ນຟູຄືນຫຼັງໄພພິບັດ, ພ້ອມທັງເລັ່ງສ້ອມແປງສິ່ງອໍານວຍຄວາມສະດວກ ແລະສະຖານທີ່ບໍລິການຕົ້ນຕໍ ເສັ້ນທາງ, ຂົວ, ໄຟຟ້າ, ນໍ້າປະປາ, ແຫຼ່ງ ນໍ້າກິນນໍ້າໃຊ້, ໂຮງຮຽນ, ໂຮງໝໍ, ສຸກ ສາລາ ແລະອື່ນໆ, ທັງນີ້ກໍເພື່ອຮັບປະກັນ ໃຫ້ຜູ້ປະສົບໄພພິບັດທີ່ອາໄສຢູ່ສູນພັກ ເຊົາໄດ້ເຂົ້າເຖິງປັດໄຈອາຫານ, ນໍ້າດື່ມ, ການຢູ່ກິນທີ່ປອດໄພ, ສຸຂະອະນາໄມ, ສຸຂະພາບ, ນອກນັ້ນຍັງສືບຕໍ່ນໍາໃຊ້ກໍາລັງແຮງຂອງກອງທັບ, ຕໍາຫຼວດ, ຊາວໜຸ່ມ, ແມ່ຍິງ, ກາແດງ, ອາສາສະໝັກອື່ນໆ ເພື່ອປະຕິບັດໃຫ້ການຊ່ວຍເຫຼືອສຸກເສີນ ແລະ ຟື້ນຟູຫຼັງໄພພິບັດ ແລະ ການຂໍນໍາໃຊ້ເຂົ້າສານໃນຂອບໂຄງການອາຊຽນບວກສາມ, ທ່ານ ຄໍາແພງ ໄຊສົມ ແພງກ່າວຕື່ມ.

--------

ຂຽນໂດຍ: ປັອກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์