6 ພາກສ່ວນ ຮ່ວມແບ່ງປັນນໍ້າໃຈສູ່ຜູ້ປະສົບໄພ

  ວັນທີ 10 ກັນຍາຜ່ານມາ, ທີ່ຫ້ອງວ່າການສຳນັກງານນາຍົກລັດຖະມົນຕີ, ກະຊວງແຮງງານ ແລະສະຫວັດດີການສັງຄົມ, ໄດ້ມີຜູ້ປະກອບການຈາກ 6 ພາກສ່ວນ ເຂົ້າມາມອບເງິນຊ່ວຍເຫຼືອຜູ້ປະສົບໄພໃນ 6 ແຂວງພາກກາງ ແລະພາກໃຕ້, ລວມມູນຄ່າ 6,52 ຕື້ກີບ, ຊຶ່ງຕາງໜ້າລັດຖະບານຮັບແມ່ນ ທ່ານ ທອງລຸນ ສີສຸລິດ ນາ ຍົກລັດຖະມົນຕີ ແລະທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.

  ສຳລັບ 6 ພາກສ່ວນທີ່ເຂົ້າມາມອບຄັ້ງນີ້ປະກອບມີ ກຸ່ມບໍລິສັດ ເອັສທີ 2,5 ຕື້ກີບ, ໂດຍການມອບຂອງ ທ່ານ ສີທັດ ໄຊສຸລິວົງ ປະທານກຸ່ມບໍລິສັດເອັສທີ, ກຸ່ມບໍລິສັດ ພົງຊັບທະວີ ຈຳກັດຜູ້ດຽວ 2 ຕື້ກີບ ໂດຍແມ່ນທ່ານ ພົງສະຫວັນ ເສນາ ພວນ ປະທານກຸ່ມບໍລິສັດເປັນຜູ້ມອບ, ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ມອບ 2 ຕື້ກີບ, ຊຶ່ງມອບໂດຍ ທ່ານ ປີຊາ ແກ້ວໄຊຍະຈັກ ປະທານກຸ່ມບໍລິສັດ, ສ່ວນອີກ 3 ບໍລິສັດທີ່ມອບຢູ່ກະຊວງ ແຮງງານ ແລະສະຫວັດດີການສັງຄົມ ມີໂຮງຮຽນຮາກ ແກ້ວ 14,18 ລ້ານກີບ, ຕາງໜ້າໂຮງຮຽນມອບແມ່ນ ທ່ານ ນາງ ສຸພາພອນ ວິຊາປຣາ ຄາວາມູຣະ ອຳ ນວຍການໂຮງຮຽນ, ບໍລິສັດຄູນທະວົງ ລາວ ກໍ່ສ້າງຄົບວົງຈອນ ຈຳກັດ ມອບ 10 ລ້ານກີບ ໂດຍແມ່ນ ທ່ານ ຄຳຄູນ ຄູນທະວົງ ປະທານບໍລິສັດເປັນຜູ້ມອບ, ນອກນັ້ນ ກໍຍັງມີມູນນິທິເຮືອນເດັກມອບ ອີກ 5 ລ້ານກີບ, ໂດຍຕາງໜ້າມອບແມ່ນ ທ່ານນາງ ສຸພາພອນ ວິຊາປຣາ ຄາວາມູຣະ ປະທານມູນນິທິ.

  ນອກຈາກນັ້ນກໍຍັງມີຫຼາຍພາກສ່ວນທີ່ໄດ້ມີການປະກອບສ່ວນ, ຊຶ່ງມາຮອດປະຈຸບັນຍັງບໍ່ທັນສາມາດເກັບກຳລາຍລະອຽດໄດ້ເທື່ອ, ແຕ່ໂດຍການປະສານສົມທົບຂອງກະຊວງແຮງງານ ແລະສະຫວັດດີການສັງຄົມ, ກໍຍັງຈະມີເຄື່ອງຊ່ວຍເຫຼືອບັນເທົາທຸກສຸກເສີນຂອງສູນປະສານງານຊ່ວຍເຫຼືອດ້ານມະນຸດສະທຳ ອາຊຽນ ຫຼື ສູນອາຮາ ທີ່ຂົນເຄື່ອງມາທາງຍົນລົງສະໜາມບິນສາກົນປາກເຊເພື່ອນຳເອົາເຄື່ອງຊ່ວຍເຫຼືອດັ່ງກ່າວຊ່ວຍຜູ້ປະສົບໄພພິບັດຢູ່ບັນດາແຂວງທີ່ຖືກຜົນກະທົບຈາກໄພນໍ້າຖ້ວມ.

------------

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์