ທ່ຽວຊົມຕາດວັງຟອງ ເມືອງປາກກະດິງ

   ຕາດວັງຟອງສະຖານທີ່ ທ່ອງທ່ຽວທີ່ເໝາະແກ່ການພາຄອບຄົວໄປພັກຜ່ອນເພື່ອຜ່ອນຄາຍໃນຍາມຮ້ອນໆແບບນີ້ ແລະສະຖານທີ່ທ່ອງທ່ຽວຍອດນິຍົມກໍໜີບໍ່ພົ້ນການຫຼິ້ນນໍ້າ,ລ່ອງເຮືອ ແລະ ແກ້ງຕາດຕ່າງໆ ຊຶ່ງມີຢ່າງຫຼວງ ຫຼາຍຢູ່ປະເທດເຮົາ, ແຕ່ພວກເຮົາຂໍແນະນໍາແຫຼ່ງທ່ອງທ່ຽວໃໝ່ທີ່ ພວມໄດ້ຮັບຄວາມນິຍົມຈາກປະຊາຊົນຊາວ ແຂວງບໍລິຄໍາໄຊ ກ່ໍຄືບັນດາແຂວງໃກ້ຄຽງນັ້ນກໍຄື: “ຕາດວັງຟອງ” ເມືອງປາກກະດິງ ແຂວງບໍລິຄໍາໄຊ ຊຶ່ງມີທຳມະ ຊາດທີ່ສວຍສົດງົດງາມ ແລະນໍ້າໃສໄຫຼເຢັນເໝາະແກ່ການເຮັດກິດຈະກຳຕ່າງໆທາງນໍ້າຄາຍຄວາມຮ້ອນໄດ້ເປັນຢ່າງດີ.

ຕາດວັງຟອງ  ເປັນນໍ້າຕົກຕາດ ທີ່ສູງຊັນ  ແລະຍາວໄປຕາມລໍານໍ້າ, ສາຍນໍ້າໃສເປັນສີຂຽວມໍລະກົດ  ໄຫຼຢູ່ເທິງພະລານຫີນທີ່ຢັງຢາຍໄປ ທົ່ວບໍລິເວນຕາດເນື່ອງຈາກການ ໄຫຼເຊາະຂອງສາຍນໍ້າມາເປັນ ເວລາດົນນານ  ຈຶ່ງເຮັດໃຫ້ສະຖານ ທີ່ແຫ່ງນີ້ສວຍງາມ ໂດຍທີ່ບໍ່ຕ້ອງ ຕົບແຕ່ງ, ບໍລິເວນຕາດຖືກອ້ອມ ຮອບໄປດ້ວຍປ່າທໍາມະຊາດທີ່ ສວຍສົດງົດງາມ, ຕົ້ນໄມ້ໃຫຍ່ຂຽວ ອຸ່ມທຸ່ມທັງສອງຟາກຝັ່ງ ແລະພືດ ພັນນາໆຊະນິດ.

ແຫຼ່ງທ່ອງທ່ຽວຕາດວັງຟອງ ແມ່ນສາຍນໍ້າກະດິງ ຊຶ່ງເປັນສາຂາຂອງແມ່ນໍ້າຂອງທີ່ຕັ້ງຢູ່ຫ່າງຈາກນະຄອນຫຼວງວຽງຈັນພຽງແຕ່ 200 ກວ່າກິໂລແມັດເທົ່ານັ້ນ ແລະຫ່າງຈາກຕົວເມືອງປາກຊັນ ແຂວງບໍລິຄໍາໄຊ ປະມານ 65 ກິໂລແມັດ ກໍຈະເຖິງເມືອງປາກກະ ດິງ ສະຖານທີ່ທ່ອງທ່ຽວດັ່ງກ່າວຈະເດີນທາງໄປທາງນໍ້າດ້ວຍການໃຊ້ເຮືອຈັກຈາກບ້ານໂພນງາມ ໃຊ້ ເວລາປະມານ 1 ຊົ່ວໂມງ (ຂັບ ເຮືອຕາມປົກກະຕິແບບໄດ້ຊົມວິວ ທິວທັດທໍາມະຊາດໄປພ້ອມ) ກໍຈະເຖິງຕາດວັງຟອງ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์