ຈັບໝົດຄອບຄົວ ເສບ ແລະຄ້າຂາຍຢາເສບຕິດ

ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະປາບປາມຢາເສບຕິດຫ້ອງຕໍາຫຼວດກອງບັນຊາການ ປກສ ແຂວງໄຊຍະບູລີໄດ້ລົງເຄື່ອນໄຫວເລີກຮື້ເປົ້າໝາຍທີ່ມີການເຄື່ອນໄຫວມົ້ວສຸມເສບ ແລະ ຄ້າຂາຍຢາເສບຕິດຢູ່ເຂດບ້ານນໍ້າລຽບເມືອງ ແລະ ແຂວງໄຊຍະບູລີ ເມື່ອຄັ້ງວັນທີ 20 ສິງຫາຜ່ານມາສາມາດກັກຕົວເປົ້າໝາຍຄ້າ-ຂາຍ ແລະແສບຢາເສບຕິດປະເພດຢາບ້າໄດ້ 4 ຄົນຄື: ທ້າວ ທອງສຸກ ອາຍຸ 53 ປີ, ນາງ ບົວບາຍ ອາຍຸ 43 ປີ ຍຶດວັດຖຸຂອງກາງຢາບ້າຈໍານວນ 100 ເມັດ, ເງິນກີບ 12,69 ລ້ານກີບ, ສາຍແຂນຄ້າຍຄືຄໍາ 1 ເສັ້ນ (ນໍ້າໜັກ 29,29 ກຣາມ), ແຫວນຄ້າຍຄືຄໍາ 2 ວົງ (ນໍ້າໜັກ 22,55 ກຣາມ), ສາຍຄໍຄ້າຍຄືຄໍາ 1 ເສັ້ນ (ພ້ອມດ້ວຍກີ້ນໍ້າໜັກ 44,70 ກຣາມ) ຕ້າງຫູຄ້າຍຄືຄໍາ 1 ຄູ່ (ນໍ້າໜັກ 3,56 ກຣາມ), ໂທລະສັບ 1 ເຄື່ອງ, ລົດຈັກ 2 ຄັນ.

  ໄລຍະຕໍ່ມາຂອງວັນດຽວກັນໄດ້ກັກ ທ້າວ ພອນສະຫວັນ ອາຍຸ 23 ປີ ຍຶດໄດ້ວັດຖຸຂອງກາງຢາບ້າ 14 ເມັດ, ໂທລະສັບ 1 ເຄື່ອງ, ລົດ ຈັກ 1 ຄັນ ແລະທ້າວ ສັນຕິ ສຸກ ໄຊຍະສຸກອາຍຸ 21 ປີ ຍຶດໄດ້ວັດຖຸຂອງກາງຢາບ້າ 31 ເມັດ ໂທລະສັບ 1 ເຄື່ອງ, ເງິນກີບ 2 ລ້ານກີບ ທັງ 4 ຄົນ ແມ່ນພໍ່ແມ່ລູກໃນຄອບຄົວດຽວກັນເປັນປະຊາ ຊົນ ບ້ານ ນໍ້າລຽບ, ເມືອງ ແລະແຂວງໄຊຍະບູລີ ມາດໍາເນີນຄະດີຕາມຂັ້ນຕອນຂອງກົດໝາຍ.

------------

ຂຽນໂດຍ: ສາຄອນ ໄຊສົມຮັກສາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์