ອັດຕະປື ເລັ່ງສ້ອມແປງໄຟຟ້າ 50 ບ້ານ ຫຼັງນໍ້າຫຼຸດລົງ

  ລະດັບນໍ້າເຊກອງຢູ່ແຂວງອັດຕະປື ໄດ້ຫຼຸດນ້ອຍລົງຕາມດຳລັບບັນດາພື້ນທີ່ບ້ານເຮືອນຂອງພໍ່ແມ່ປະຊາຊົນໄດ້ຕົກຢູ່ໃນສະພາບວິກິດຄວາມຫຍຸ້ງຍາກເພາະບາງບ້ານລະ ບົບໄຟຟ້າຖືກງົດໃຊ້ກະແສໄຟເປັນການຊົ່ວຄາວຍ້ອນຢ້ານບໍ່ປອດໄພແກ່ຜູ້ປະສົບໄພແຕ່ພາຍຫຼັງລະດັບນໍ້າໄດ້ຫຼຸດນ້ອຍລົງຕາມລຳດັບລັດວິສາຫະກິດໄຟຟ້າສາຂາແຂວງອັດຕະປືຮ່ວມກັບພະແນກພະລັງງານ ແລະບໍ່ແຮ່ກໍໄດ້ຮີບຮ້ອນສືບຕໍ່ຈັດຕັ້ງ ແລະສ້ອມແປງແກ້ໄຂລະບົບໄຟຟ້າໃຫ້ປະຊາຊົນທີ່ຕົກຢູ່ໃນສະພາບວິກິດຈາກໄພນໍ້າຖ້ວມນີ້ໃຫ້ສຳເລັດ ແລະໃຫ້ປະຊາຊົນໄດ້ຊົມໃຊ້ໄຟຟ້າຢ່າງປົກກະຕິໂດຍໄວທີ່ສຸດ.

ມາຮອດວັນທີ 9 ກັນຍາ 2019 ກໍໄດ້ສຳເລັດການສ້ອມແປງລະບົບໄຟຟ້າຢູ່ບ້ານສະແຄະຊຶ່ງປະຊາຊົນຂາດການນຳໃຊ້ໄຟຟ້າເລີ່ມແຕ່ບ້ານຖືກຜົນກະທົບຈາກໄພນໍ້າຖ້ວມເປັນຕົ້ນມາລວມທັງໝົດ 600 ກວ່າຄອບຄົວ.

  ທ່ານ ລິດສະໜາ ເທບສົມບັນດິດ ຫົວໜ້າລັດວິສາຫະກິດໄຟຟ້າລາວສາຂາ ແຂວງອັດຕະປື ໃຫ້ຮູ້ວ່າ: ທົ່ວແຂວງອັດຕະປືໃນຊ້ວງນໍ້າຖ້ວມນີ້ບ້ານໄດ້ມີຜົນກະທົບ ແລະຖືກຕັດລະບົບໄຟຟ້າໄວ້ເບື້ອງຕົ້ນແລ້ວຈຳນວນ 50 ບ້ານພາຍຫຼັງນໍ້າຫຼຸດລົງມາຮອດວັນທີ 8 ກັນຍານີ້ໄດ້ສ້ອມແປງ ແລະເປີດໃຊ້ໄຟຟ້າໄດ້ແລ້ວຈຳນວນ 37 ບ້ານ ສ່ວນຈຳນວນບ້ານທີ່ຍັງເຫຼືອຕາມຂໍ້ມູນທີ່ວ່ານັ້ນຈະໄດ້ພ້ອມກັນສືບຕໍ່ຮີບຮ້ອນຈັດຕັ້ງໃຫ້ສຳເລັດຕາມເປົ້າໝາຍໃຫ້ໄວ້ທີ່ສຸດ.  

  ທ່ານກ່າວຕື່ມວ່າ: ຈຳນວນບ້ານທີ່ຍັງຄ້າງແມ່ນຢູ່ເມືອງສະໜາມໄຊ ເຂດໜອງແຂ້, ໂພນສະອາດເພາະວ່າລໍຖ້າລະດັບນໍ້າຫຼຸດລົງ ແລະ ບ້ານອື່ນໆທີ່ສ້ອມແປງບໍ່ທັນສຳເລັດນີ້ຍ້ອນສາຍຕາຂ່າຍ 22 ກິໂລໂວນຂາດ, ຕົ້ນໄມ້ລົ້ມທັບ, ກໍໃຜ່ໄຫຼນໍ້າມາເກາະສ່ວນໜໍ້ນັບໄຟທີ່ຖືກເສຍຫາຍນັ້ນຈະສັງລວມ ແລະແຈ້ງໃຫ້ຊາບໃນພາຍຫຼັງ.

-------

ຂຽນໂດຍ: ມາລາທິບ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 10/09/2019