ໄຊຍະ ສັ່ງຍຸບເລີກໂຮງງານປຸງແຕ່ງໄມ້ທີ່ຂັດຄຳສັ່ງ 15/ນຍ 85 ແຫ່ງ

  ກອງປະຊຸມສະເພາະກິດການຄຸ້ມຄອງ ແລະດັດສົມໂຮງງານປຸງແຕ່ງໄມ້ທົ່ວແຂວງໄຊຍະບູລີໄດ້ຈັດຂຶ້ນໃນວັນທີ 6 ກັນຍາທີ່ພະແນກອຸດສາຫະກຳ ແລະ ການຄ້າແຂວງເຂົ້າຮ່ວມມີທ່ານ ສະຫວາດ ຂຸນດາວົງ ຮອງຫົວໜ້າກົມອຸດສາຫະກຳ ແລະຫັດຖະກຳ,ທ່ານ ຈັນເພັງ ພັນຖຸອາມາດ ວ່າການຫົວໜ້າພະແນກອຸດສາຫະກຳ ແລະການຄ້າແຂວງ, ມີຮອງເຈົ້າເມືອງພ້ອມດ້ວຍຫົວໜ້າຫ້ອງການການຄ້າເມືອງ 11 ເມືອງທີ່ເປັນຄະນະສະເພາະກິດເຂົ້າຮ່ວມ.

 ທ່ານ ຈັນເພັງ ພັນຖຸອາມາດ ໃຫ້ຮູ້ ວ່າ: ການຈັດຕັ້ງປະຕິບັດຄຸ້ມຄອງ ແລະດັດສົມໂຮງງານປຸງແຕ່ງໄມ້ແຂວງໄຊຍະບູລີ ໄດ້ເລີ່ມຈັດຕັ້ງປະຕິບັດມາແຕ່ປີ 2008 ເປັນຕົ້ນມາພາຍຫຼັງທີ່ທາງແຂວງກໍ່ຄືພະແນກອຸດສາຫະກຳ ແລະການຄ້າ ໄດ້ຮັບຄໍາສັ່ງຂອງນາຍົກລັດຖະມົນຕີ ສະບັບເລກທິີ 15/ນຍ ລົງວັນທີ 13 ພຶດ ສະພາ 2016 ວ່າດ້ວຍການເພີ່ມທະວີ ຄວາມເຂັ້ມງວດໃນການຄຸ້ມຄອງ ແລະກວດກາການຂຸດຄົ້ນໄມ້ ແລະທຸລະກິດ ໄມ້; ພວກເຮົາກໍໄດ້ສົມທົບກັບອຳນາດ ການປົກຄອງແຂວງ ແລະຂະແໜງການ ກ່ຽວຂ້ອງພາຍໃນແຂວງ ເພື່ອຄົ້ນຄວ້າ ປຶກສາຫາລືວິທີການຈັດຕັ້ງປະຕິບັດ ແລະຜັນຂະຫຍາຍຄໍາສັ່ງດັ່ງກ່າວ, ໂດຍໄດ້ແຕ່ງຕັ້ງພະນັກງານລົງຈັດຕັ້ງປະຕິບັດຄໍາສັ່ງເລກທີ 15/ນຍ, ສົມທົບກັບ ອໍານາດການປົກຄອງ ແລະຂະແໜງການກ່ຽວຂ້ອງເມືອງ ເພື່ອຕິດຕາມກວດກາ ແລະເກັບກໍາຂໍ້ມູນໂຮງງານປຸງແຕ່ງໄມ້.

  ການຄຸ້ມຄອງການຂຸດຄົ້ນໄມ້,ການເຄື່ອນຍ້າຍໄມ້ ແລະທຸລະກິດໄມ້ໃນທົ່ວແຂວງຜ່ານການຈັດຕັ້ງປະຕິບັດຜ່ານມາເຖິງປະຈຸບັນເຫັນວ່າໂຮງງານປຸງແຕ່ງໄມ້ທີ່ອະນຸຍາດໃຫ້ດໍາເນີນກິດຈະການທັງໝົດ 111 ແຫ່ງ, ມີໂຮງງານຂັ້ນ I ມີ 39 ແຫ່ງ, ຂັ້ນII ມີ 61 ແຫ່ງ ແລະ ຫັດຖະກໍາແບບຄອບຄົວ 11 ແຫ່ງ ໃນນີ້ແຂວງໄຊຍະບູລີ ອອກຂໍ້ຕົກລົງສັ່ງຍົກເລີກມີ 85 ແຫ່ງ, ມີໂຮງງານປຸງແຕ່ງໄມ້ຂັ້ນ I ມີ 31 ແຫ່ງ, ຂັ້ນ II ມີ 46 ແຫ່ງ ແລະຫັດຖະກໍາແບບຄອບຄົວມີ 8 ແຫ່ງ.

  ມາຮອດປະຈຸບັນໂຮງງານທີ່ໄດ້ຍຸບເລີກ ແລະຮື້ຖອນເຄື່ອງຈັກແລ້ວມີ 66 ແຫ່ງ, ໂຮງງານຂັ້ນ I ມີ 21 ແຫ່ງ, ຂັ້ນ II ມີ 38 ແຫ່ງ ແລະ ຫັດຖະກໍາແບບຄອບຄົວມີ 7 ແຫ່ງ, ຍັງບໍ່ທັນໄດ້ຍຸບເລີກ ແລະຮື້ຖອນມີ 19 ແຫ່ງ, ໂຮງງານຂັ້ນ I ມີ 10 ແຫ່ງ, ຂັ້ນ II ມີ 8 ແຫ່ງ ແລະຫັດຖະກໍາແບບຄອບຄົວມີ 1 ແຫ່ງ.

  ສ່ວນໂຮງງານທີ່ໃຫ້ສືບຕໍ່ດໍາເນີນກິດຈະການຕາມຂໍ້ຕົກລົງຂອງທ່ານເຈົ້າແຂວງເລກທີ 146/ຈຂຊຍ ລົງວັນທີ 9 ກຸມພາ2017 ມີຈໍານວນ 26 ແຫ່ງ, ໂຮງງານຂັ້ນ I ມີ 8 ແຫ່ງ, ຂັ້ນ II ມີ 15 ແຫ່ງ ແລະຫັດຖະກໍາແບບຄອບຄົວມີ 3 ແຫ່ງ.

  ທ່ານຍັງໄດ້ກ່າວຕື່ມວ່າເພື່ອສືບຕໍ່ປະຕິບັດວຽກງານຄຸ້ມຄອງ ແລະ ດັດສົມໂຮງງານອຸດສາຫະກຳປຸງແຕ່ງໄມ້ໃນຕໍ່ໜ້ານີ້ພະແນກອຸດສາຫະກໍາ ແລະ ການຄ້າຕ້ອງໄດ້ສົມທົບກັບສະເພາະກິດຂອງແຂວງອໍານາດການປົກຄອງເມືອງລົງກວດກາໂຮງງານທີ່ໃຫ້ຢຸດເຊົາແຕ່ບໍ່ຢຸດເຊົາ ແລະຮື້ຖອນເຮັດບົດບັນທຶກໃຫ້ຢຸດເຊົາ ແລະ ຮື້ຖອນຢ່າງສິ້ນເຊີງ, ໂດຍກຳນົດມາດຕະການປະຕິບັດ ແລະເວລາແນ່ນອນໃຫ້ຢຸດເຊົາ ແລະຮື້ຖອນສະເພາະໄມ້ຄ້າງສະໜາມແມ່ນຈະໄດ້ກວດກາຄືນລະອຽດເປັນແຕ່ລະໂຮງງານ ແລະກຳນົດເວລາການຜະລິດໃຫ້ຜະລິດ ໃຫ້ໝົດ ຫຼື ມີວິທີການອື່ນທີ່ເໝາະສົມໃນ ການຫຼຸດຊ່ອງວ່າງທີ່ເຫັນໄດ້ວ່າໄມ້ຄ້າງ ໃນໂຮງງານບໍ່ໝົດຈັກເທື່ອສ່ວນຊ່າງໄມ້ທີ່ຕົບແຕ່ງເຮືອນທີ່ຢູ່ເຂດຫ່າງໄກສອກ ຫຼີກຈະໄດ້ມີວິທີການຄຸ້ມຄອງໃຫ້ຖືກ ຕ້ອງຕາມເປົ້າໝາຍທີ່ໄດ້ອານຸຍາດ, ໂດຍ ການສ້າງສັນຍາໃນການດໍາເນີນທຸລະກິດເປັນລາຍລະອຽດແຕ່ລະໄລຍະໂດຍມອບໃຫ້ເມືອງຕິດຕາມກວດກາ ແລະຄຸ້ມຄອງດ້ານໂຮງງານອຸດສາຫະກຳປຸງ ແຕ່ງໄມ້ແບບຄອບຄົວທີ່ສ້າງຕັ້ງ ແລະ ດຳເນີນກິດຈະການທີ່ບໍ່ໄດ້ຮັບອານຸຍາດນັ້ນຈະໄດ້ສົມທົບກັບຂະແໜງການທີ່ ກ່ຽວຂ້ອງ ແລະອໍານາດການປົກຄອງ ເມືອງເພື່ອກວດກາເກັບຂໍ້ມູນຄືນໃຫ້ລະ ອຽດ; ພ້ອມທັງມີມາດຕະການໃຫ້ຍຸບ ເລີກ ແລະຢຸດເຊົາຢ່າງສິ້ນເຊີງສໍາລັບໂຮງງານທີ່ຢຸດເຊົາ ແລະຮື້ຖອນທັງໝົດນັ້ນແມ່ນຈະຈະໄດ້ລຶບຊື່ອອກຈາກບັນຊີຄຸ້ມຄອງທັງໝົດຢ່າງຂາດຕົວ.    

-----------

ຂຽນໂດຍ: ບຸນທີ ແສງຈັນທະລາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์