ແນະນຳປື້ມ ສືບທາວລາວມະໂຫລີ

ສໍານັກພິມ ລາວດວງເດືອນໄດ້ຈັດງານຖະແຫຼງຂ່າວແນະນໍາປຶ້ມຫົວໃໝ່ໃນວັນທີ 6 ກັນຍາຜ່ານມາ ທີ່ນະຄອນຫຼວງວຽງຈັນພາຍໃຕ້ຊື່ທີ່ວ່າ “ສືບທາວລາວມະໂຫລີ” ຊຶ່ງເປັນຜົນງານຂອງ ອາຈານ ປັນຍາ ພັນທະມິດ ນັກຄົ້ນຄວ້າ, ນັກປະພັນ, ນັກວິຈານບັນເທີງທີ່ມີຫຼາກຫຼາຍຜົນງານຜ່ານມາທີ່ສັງຄົມຍອມຮັບ, ໂດຍໃຫ້ກຽດເຂົ້າຂອງທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ, ມີບັນດາຫົວໜ້າກົມຄະນະບໍລິຫານງານສະມາຄົມນັກປະພັນລາວ, ນັກປະພັນນັກກະວີ, ຕົວແທນຮ້ານຂາຍປຶ້ມ ແລະແຂກຖືກເຊີນເຂົ້າຮ່ວມ.

  ທ່ານ ບຸນທະນອງ ຊົມໄຊຜົນ ຫົວໜ້າອໍານວຍການສໍານັກພິມລາວດວງເດືອນກ່າວວ່າ: ປຶ້ມ “ສືບທາວລາວມະໂຫລີ” ເປັນປຶ້ມຫົວໜຶ່ງທີ່ມີຄຸນຄ່າສູງທາງດ້ານປະ ຫວັດສາດ, ສິສະປະມະໂຫລີ ດົນຕີຂັບລໍາເພງລາວທີ່ຜູ້ຂຽນກໍຄືອາຈານປັນຍາພັນທະມິດໃຊ້ເວລາເກັບກໍາຂໍ້ມູນ ແລະຄົ້ນຄວ້າຫຼາຍກວ່າ 10 ປີ ຊຶ່ງເປັນເນື້ອໃນຊີ້ໃຫ້ເຫັນປະ ຫວັດຄວາມເປັນມາຂອງຊາດພັນລາວ ແລະດົນຕີມະໂຫລີລາວເຮົາຕັ້ງແຕ່ຍຸກດຶກດໍາບັນໂດຍຜ່ານກະສັດແຕ່ລະຍຸກສະໄໝຈົນເຖິງຍຸກຖືກຮຸກຮານຂອງສັກ ດີນາຕ່າງດ້າວແຕ່ດົນຕີລາວກໍຍັງຄົງພະລັງອັນເຂັ້ມແຂງມາເຖິງການປ່ຽນຖ່າຍເມື່ອລາວຕົກເປັນອາລານິຄົມຂອງຈັກກະພັດລ່າເມືອງຂຶ້ນດ້ວຍຄວາມຮັກຊາດໃນເອກະລາດສີິນລະປິນລາວ ໄດ້ຮວມກັນສ້າງສັນຜົນງານດ້ວຍນໍ້າໃຈຮັກຊາດເຮັດໃຫ້ລາວມີເພງຊາດຂອງຕົນຄັ້ງທໍາອິດກ້າວເຂົ້າສູ່ຍຸກຕໍ່ສູ້ກູ້ຊາດດົນຕີບົດເພງໄດ້ຖືກນໍາໃຊ້ໃຫ້ເປັນອາວຸດອັນແຫຼມຄົມທັງກ່າວປະນາມທັງໃຫ້ກໍາລັງໃຈທະຫານປົດປ່ອຍຈົນສາມາດຍາດໄດ້ເອກະລາດມາມື ແລະຜືນແຜ່ນດິນອັນຄົບຖ້ວນນັ້ນຈຶ່ງຖືວ່າດົນຕີເພງມີພະລັງແຮງດ້ວຍຈິດອາລົມອັນເປັນມູນມໍລະດົກຕົກທອດຜ່ານຮຸ່ນສູ່ຮຸ່ນມາເຖິງປະຈຸບັນນີ້ທີ່ຄົນຮຸ່ນໃໝ່ຄວນໄດ້ສຶກສາຮຽນຮູ້ດ້ວຍສະຕິຊາດອັນສູງສົ່ງ.

  ອາຈານ ປັນຍາ ພັນທະມິດ ກ່າວວ່າ: ປຶ້ມຫົວນີ້ໂຮມໄວ້ ຊຶ່ງຂະບວນວິວັດຂອງດົນຕີຂັບລໍາ ແລະເພງລາວກ່າວເຖິງທີ່ໄປທີ່ມາ ແລະການຂະຫຍາຍຕົວຜູ້ອ່ານຈະໄດ້ຮູ້ເຖິງຄວາມເປັນມາຂອງຊາດພັນລາວດົນຕີອັນເປັນຮາກເຫງົ້າຂອງລາວໂດຍແທ້ແລະການປະສົມປະສານຂອງດົນຕີຮ່ວມສະໄໝໃນປຶ້ມປະກອບມີທັງໝົດ 11 ບົດໃຫ ຍ່ ແລະຫຼາຍໆບົດຍ່ອຍອັດດ້ວຍບົດວິເຄາະທ້າຍເຫຼັ້ມຊຶ່ງຫວັງວ່າຈະເປັນປຶ້ມຫົວໜຶ່ງທີ່ໃຫ້ປະໂຫຍດແກ່ນັກອ່ານ, ນັກສຶກສາປັນຍາຊົນລວມເຖິງນັກສິລະປະໄວ້ເປັນບ່ອນອີງເປັນຖານຂໍ້ມູນໃນການສຶກສາຄົ້ນຄວ້າເສີມຂະຫຍາຍອີກຕໍ່ໄປໃນອະນາຄົດ.

  ສໍາລັບທ່ານໃດທີ່ຕ້ອງການປຶ້ມ “ສືບທາວລາວມະໂຫລີ” ປະຈຸບັນເລີ່ມວາງຈໍາໜ່າຍແລ້ວທີ່ຮ້ານຂາຍປຶ້ມດອກເກດ, ຮ້ານຂາຍປຶ້ມດີບຸກໂດຍມີບໍລິການຈັດສົ່ງເຖິງທີ່ທົວປະເທດ.

---------

ຂຽນໂດຍ: ກິ່ງລັດຕະນະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์