ເຊີນທ່ຽວເທສະການດອກງິ້ວບານ ຄັ້ງທີ 19 ແຂວງບໍ່ແກ້ວ

    ເທສະການດອກງິ້ວບານ ເມືອງຕົ້ນເຜີ້ງ ແຂວງບໍ່ແກ້ວ ເປັນເຫດການທີ່ມີຄວາມໝາຍສຳຄັນທາງດ້ານວັດທະນະທຳ, ຮີດຄອງປະເພນີ ແລະມູນເຊື້ອອັນດີງາມຂອງດອນຊາວດິນແດນແຫ່ງສາມຫຼ່ຽມຄຳທີ່ມີຊື່ສຽງມາແຕ່ດົນນານໂດຍໃນປີນີ້ ແຂວງບໍ່ແກ້ວ ໄດ້ຈັດຂຶ້ນເປັນຄັ້ງທີ 19 ໃນລະຫວ່າງວັນທີ 17-25  ມັງກອນ 2019 ດ້ວຍຫຼາຍກິດຈະກໍາຄືກຄື້ນມ່ວນຊື່ນ.

  ແຫຼ່ງຂໍ້ມູນຈາກແຂວງບໍ່ແກ້ວ ໃຫ້ຮູ້ວ່າ: ເທສະການດອກງິ້ວບານ ທີ່ດອນຊາວເມືອງຕົ້ນເຜີ້ງ ແຂວງບໍ່ແກ້ວ ໄດ້ຈັດຂຶ້ນໃນໄລຍະທ້າຍເດືອນມັງກອນຂອງທຸກໆປີເລີ່ມແຕ່ປີ 2000 ເປັນຕົ້ນມາໃນຂະນະທີ່ດອກງິ້ວພວມເບັ່ງບານເປັນສີແດງເປັ່ງປະກາຍຄວາມໂດດເດັ່ນໄປທົ່ວດອນ. ດອນແຫ່ງນີ້ຕັ້ງຢູ່ຈຸດໃຈກາງ ຂອງແມ່ນ້ຳຂອງມີຄວາມຍາວປະມານ 3 ກິໂລແມັດ ຊຶ່ງມີຕົ້ນງິ້ວປ່າຈຳນວນຫຼວງຫຼາຍຢັງຢາຍຢູ່ທົ່ວດອນ, ໂດຍໃນປີນີ້ໄດ້ຈັດຂຶ້ນເປັນຄັ້ງທີ 19 ທັງນີ້ກໍເພື່ອປົກປັກຮັກສາ ແລະເສີມຂະຫຍາຍຮີດຄອງປະເພນີຂອງຊາວເມືອງຕົ້ນເຜິ້ງ ກໍ່ຄືຊາວ ແຂວງບໍ່ແກ້ວ ທີ່ເຄີຍປະຕິບັດກັນມາຕະຫຼອດໄລຍະຜ່ານມາ, ພ້ອມນັ້ນຍັງເປັນການຊຸກຍູ້ສົ່ງເສີມການທ່ອງທ່ຽວ ແລະການຜະລິດສິນຄ້າຂອງປະຊາຊົນໃຫ້ເປັນຂະບວນຟົດຟື້ນນັບມື້ເພີ່ມຂຶ້ນເລື້ອຍໆຄຽງຄູ່ກັບການສ້າງຄວາມປະ ທັບໃຈ ແລະສິ່ງອໍານວຍຄວາມສະດວກໃນດ້ານ ຕ່າງໆເພື່ອດຶງດູດເອົານັກທ່ອງທ່ຽວ ພາຍໃນ ແລະຕ່າງປະເທດໃຫ້ເຂົ້າມາທ່ອງທ່ຽວແຂວງບໍ່ແກ້ວໃຫ້ນັບ ຫຼາຍຂຶ້ນ. 

  ການຈັດງານໃນເທື່ອນີ້ປະກອບມີຫຼາຍກິດຈະກຳເຊັ່ນ: ການປະກວດນາງສາວດອກງິ້ວບານ, ການສະແດງຊຸດຊົນເຜົ່າຂອງແຂວງບໍ່ແກ້ວ, ການສະແດງສິລະປະວັນນະຄະດີ, ການແຂ່ງຂັນກີລາ ແລະງານວາງສະແດງສິນຄ້າ ແລະຈໍາໜ່າຍສິນຄ້າກະສິກຳ, ຫັດຖະກຳ ແລະ ອື່ນໆ.

แชร์