ເຈໂຕຣ ແລະ4 ເຂດ ຂພສ ຮ່ວມມືດຶງດູດການລົງທຶນເຂົ້າສູ່ລາວ

 ວັນທີ 3 ກັນຍາ 2019, ທີ່ຫ້ອງການຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກການຮ່ວມມືລະຫວ່າງອົງການສົ່ງເສີມການຄ້າຍີ່ປຸ່ນ ເຈໂຕຣ (JETRO) ວຽງຈັນ

 ກັບຜູ້ພັດທະນາຂອງ 4 ເຂດເສດຖະກິດພິເສດ, ໂດຍການເຂົ້າຮ່ວມເປັນສັກຂີພິຍານຂອງທ່ານນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະການລົງທຶນ, ຜູ້ຊີ້ນຳວຽກງານເຂດເສດຖະກິດພິເສດ, ທ່ານນາງ ຢູຣິ ຊາໂຕ້ ຮອງປະທານອົງການເຈໂຕຣຍີ່ປຸ່ນ,ພ້ອມນີ້ກໍມີທ່ານທູດມາເລເຊຍປະຈຳລາວ ແລະທ່ານທູດຍີ່ປຸ່ນປະຈຳລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານນາງ ຢູຣິ ຊາໂຕ້ ກ່າວວ່າ: ເຈໂຕຣ ໄດ້ເອົາໃຈໃສ່ສົ່ງເສີມທາງດ້ານທຸລະກິດດ້ວຍການປຶກສາຫາລືກັບບໍລິສັດຍີ່ປຸ່ນຢູ່ລາວກ່ຽວກັບການຄ້າ ແລະການລົງທຶນເພື່ອສ້າງຄູ່ຄ້າຮ່ວມທຸລະກິດຢ່າງຕໍ່ເນື່ອງ, ຊຶ່ງຜ່ານການເຄື່ອນໄຫວເຫັນວ່າຫຼາຍດ້ານມີການຂະຫຍາຍຕົວໂດຍສະເພາະແມ່ນການລົງທຶນຈາກໃນປີ 2013 ການ ລົງທຶນຂອງຍີ່ປຸ່ນຢູ່ລາວມີພຽງ 83 ບໍລິສັດ, ມາຮອດປະຈຸບັນເພີ່ມຂຶ້ນເປັນ 156 ບໍລິສັດ, ດັ່ງນັ້ນການຮ່ວມມືລະຫວ່າງອົງການເຈໂຕຣໃນເທື່ອນີ້ຈະເປັນປະຕູສຳຄັນທີ່ເຮັດໃຫ້ນັກລົງທຶນຍີ່ປຸ່ນເຂົ້າມາສູ່ຕະຫຼາດລາວ ແລະຜູ້ພັດທະນາເຂດເສດຖະກິດທັງ 4 ເຂດໄດ້ຕ້ອນຮັບນັກລົງທຶນຍີ່ປຸ່ນຈະພັດທະນາ ແລະ ເພີ່ມທະວີການຮ່ວມມືໄປເລື້ອຍໆ.

ທ່ານນາງ ຄຳຈັນ ວົງແສນບຸນ ກ່າວວ່າ: ການເຊັນສັນຍາຄັ້ງນີ້ເປັນນິມິດໝາຍອັນດີທີ່ຈະຊ່ວຍດຶງດູດນັກລົງທຶນຈາກຍີ່ປຸ່ນໃຫ້ເຂົ້າມາລົງທຶນໃນເຂດເສດຖະກິດພິເສດທັງ 4 ເຂດຫຼາຍຂຶ້ນຄື: ເຂດປາກເຊ-ຍີ່ປຸ່ນ ເອັສເອັມອີ,ສະຫວັນປາກ,ເຂດພັດທະນາກວມລວມໄຊເສດຖາ ແລະເຂດນິຄົມອຸດສາຫະກຳ ແລະການຄ້າວຽງຈັນ ໂນນທອງ, ເນື່ອງ ຈາກຜ່ານມາການລົງທຶນຂອງເຂດເສດຖະກິດພິເສດທົ່ວປະເທດຈຳນວນ 12 ແຫ່ງ,ສາມາດດຶງດູດການລົງທຶນໄດ້ທັງໝົດ 597 ບໍລິສັດ, ໃນນັ້ນ46 ບໍລິສັດແມ່ນການລົງທຶນຂອງຍີ່ປຸ່ນຈັດຢູ່ໃນອັນດັບທີ 3 ຂອງການມາລົງທຶນໃນລາວ, ເມືອທຽບໃສ່ການລົງທຶນໃສ່ບັນດາປະເທດເພື່ອນບ້ານເຫັນວ່າລາວຍັງມີໂອກາດເພີ່ມຂຶ້ນ, ສະນັ້ນເຊື່ອແນວ່າການເຊັນສັນຍາຄັ້ງນີ້ຈະຊ່ວຍເຮັດໃຫ້ເຂດເສດຖະກິດພິເສດຂອງລາວສາມາດດຶງດູດການລົງທຶນຈາກຕ່າງປະເທດເພີ່ມຂຶ້ນໂດຍສະເພາະ 4 ເຂດແມ່ນມີການພັດທະນາທາງດ້ານພື້ນຖານໂຄງລ່າງເພື່ອແນໃສ່ຮອງຮັບການລົງທຶນຈາກຍີ່ປຸ່ນກໍຄືຈາກບັນດາປະເທດອື່ນໆ.

  ລົງນາມໃນສັນຍາຄັ້ງນີ້ແມ່ນທ່ານ ຄັດ ຊູອິຈິ ອິວາກາມິ ຫົວໜ້າອົງການເຈໂຕຣວຽງຈັນ ເຊັ່ນຮ່ວມກັບທ່ານ ໂທຊິຮີໂລະ ໂມຊິຊູກິ ຜູ້ອຳນວຍການເຂດເສດຖະກິດ ປາກເຊ-ຍີ່ປຸ່ນ SME, ທ່ານ ດາໂຕະດີ ໄວກ໋ອບ ປະທານບໍລິສັດສະຫວັນປາຊີຟີກ່າດີເວວໂລບເມັນຈຳກັດຈາກເຂດ, ທ່ານ ຫຼິວຫູ ປະທານບໍລິສັດຮ່ວມທຶນລາວ-ຈີນ ຈຳກັດ ແລະທ່ານ ເຈນເຊັນ ເສີນ ປະທານບໍລິສັດ ລາວ-ວີຕ້າ ດີເວວ ໂລບເມັນ ຈຳກັດ.

-------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์