ຫຼາຍທ້ອງຖິ່ນແຂວງພາກໃຕ້ຮັບຜົນກະທົບຈາກນໍ້າຖ້ວມ

 ຈາກສະພາບຝົນຕົກລິນຕິດຕໍ່ກັນຫຼາຍວັນຍ້ອນພະຍຸໂພດູບວກໃສ່ພະຍຸດີເປຼເຊິນກຳລັງພັດຜ່ານເຮັດໃຫ້ຫຼາຍພື້ນທີ່ໃນເວລານີ້ທີ່ແຂວງສະຫວັນນະເຂດ, ສາລະວັນ, ເຊກອງ, ຈຳປາສັກ ແລະອັດຕະປື ເກີດມີເຫດນໍ້າຖ້ວມເນື້ອທີ່ທຳການຜະລິດ, ຖະໜົນຫົນທາງ, ເຮືອນຊານບ້ານຊ່ອງ ແລະສັດລ້ຽງຂອງປະຊາຊົນໄດ້ຮັບຜົນກະທົບຢ່າງໜັກ.​

 ສຳລັບແຂວງສະຫວັນນະເຂດຫ້ອງການກະສິກໍາ-ປ່າໄມ້ເມືອງໄຊພູທອງ ແຈ້ງວ່າ: ມີ 8 ບ້ານ 301 ຄອບຄົວ ເນື້ອທີ່ນາ 511,2  ເຮັກຕາ ຖືກນໍ້າຖ້ວມເສຍຫາຍຫຼາຍສົມຄວນແຕ່ຍັງບ່ໍສາມາດປະເມີນຜົນໄດ້ປະກອບມີ: ບ້ານນາຄໍາ 25 ຄອບຄົວ ເນື້ອທີ່ 33,6 ເຮັກຕາ, ບ້ານພູມມະເຈດີ 10 ຄອບຄົວ ເນື້ອທີ່11,5 ເຮັກຕາ, ບ້ານຕາກແດດ 54 ຄອບຄົວ ເນື້ອທີ່ 127,6 ເຮັກຕາ, ບ້ານໂພນທາດ 32 ຄອບຄົວ ເນື້ອທີ່ 33,2 ເຮັກຕາ, ບ້ານໂພນສົ້ມໂຮງ 89  ຄອບຄົວ ເນື້ອທີ່ 195,7 ເຮັກຕາ, ບ້ານນາ ໝາກເກືອ 68 ຄອບຄົວ ເນື້ອທີ່ 88,6 ເຮັກຕາ, ບ້ານມ່ວງໄຂ່ 3 ຄອບຄົວ 3 ເຮັກຕາ ແລະບ້ານດອນຕູມ 20 ຄອບຄົວ ເນື້ອທີ່ 18 ເຮັກຕາ.

ທີ່ແຂວງສາລະວັນ ພໍ່ແມ່ປະຊາຊົນຢູ່ຕາມເຂດແຄມແມ່ນໍ້າເຊໂດນໃນເຂດເທສະບານເມືອງ ແລະແຂວງສາລະວັນ ໄດ້ຮັບຜົນກະທົບຢ່າງໜັກເຊັ່ນ: ບ້ານນາເຫຼັກ, ວັດກາງ, ໂພນບົກ, ໂພນແກ້ວ, ນາ ຍອງ, ເຕົ້າປູນ ແລະບ້ານອື່ນໆ ເນື່ອງຈາກນໍ້າໄດ້ຍື່ງຂຶ້ນຢ່າງໄວວາ ແລະ ຖ້ວມກະທັນຫັນໃນເຊົ້າວັນທີ 3 ກັນຍາ ແລະ ຝົນຍັງສືບຕໍ່ຕົກຢ່າງໜັກເຮັດໃຫ້ຫຼາຍຄອບຄົວກະກຽມມ້ຽນເຄື່ອງຂອງຕ່າງໆ ບໍ່ທັນເຊັ່ນ: ເຄື່ອງໃຊ້, ພາຫະນະ ແລະ ອື່ນໆ ນອກນັ້ນລະດັບກໍຍິ່ງເພີ່ມຂຶ້ນ ເລື້ອຍໆ.

 ບັນດາເມືອງທົ່ວແຂວງທີ່ມີຄວາມສ່ຽງຕໍ່ການເກີດນໍ້າຖ້ວມຄະນະກຳມະການປ້ອງກັນ ແລະຄວບຄຸມໄພພິບັດຂັ້ນແຂວງໄດ້ລົງຕິດຕາມຢ່າງໃກ້ຊິດ ແລະໃຫ້ການຊ່ວຍ ເຫຼືອ, ທັງດ້ານກຳລັງແຮງ ແລະເຄື່ອງອຸປະໂພກ-ບໍລິໂພກໂດຍສະເພາະແມ່ນເມືອງຄົງເຊໂດນທີ່ໄດ້ຜົນກະທົບຢ່າງໜັກໜ່ວງເນື້ອທີ່ຖືກຖ້ວມແລ້ວທັງໝົດ 6.328 ເຮັກຕາ, ມີ 60 ກວ່າບ້ານ ແລະ ມີ4.760 ຄອບຄົວ, ໜອງປາ 400 ກວ່າໜອງ ແລະເນື້ອທີ່ທຳການຜະລິດກໍ່ໄດ້ຮັບຜົນເສຍຫາຍຢ່າງໜັກ, ສ່ວນຂໍ້ມູນຄວາມເສຍຫາຍແມ່ນຈະໄດ້ເກັບກຳຢ່າງລະອຽດຕື່ມ.

 ແຂວງອັດຕະປື ເຂດທີ່ມີຄວາມສ່ຽງສູງແມ່ນເຂດເມືອງພູວົງ, ສະໜາມໄຊ ແລະ ເຂດບ້ານທີ່ລຽບຕາມລຳນໍ້າເຊກອງ, ປະລິມານນໍ້າຝົນ 24 ຊົ່ວໂມງ 55,5 ມິລິແມັດ, ລະດັບນໍ້າເຊກອງເຊົ້າວັນທີ 3 ກັນຍາ 2019 ລະດັບນໍ້າສູງຂຶ້ນ 11,95 ແມັດ ແລະອາດສູງຂຶ້ນເຖິງ 15 ແມັດ.

  ສ່ວນທີ່ຈຳປາສັກອໍານາດການປົກຄອງແຂວງໄດ້ອອກແຈ້ງເຕືອນປະຊາຊົນໃຫ້ເຝົ້າລະວັງກະກຽມປ້ອງກັນ ແລະຊ່ວຍເຫຼືອໄພນໍ້າຖ້ວມໃນທົ່ວແຂວງພາຍຫຼັງທີ່ລະດັບແມ່ນໍ້າຂອງຂຶ້ນສູງກາຍເຂດອັນຕະລາຍ 12 ແມັດ ແລະ ມີແນວໂນ້ມຈະເພີ່ມສູງຂຶ້ນອີກໃນຂະນະທີ່ປະຈຸບັນມີບ້ານເຮືອນປະຊາຊົນ ແລະ ເນື້ອທີ່ນາປີຈໍານວນຫຼາຍໃນແຕ່ລະເມືອງຖືກນໍ້າຖ້ວມແລ້ວ.

--------

ຂຽນໂດຍ: ພັນທະມິດ+ວິໄລພອນ+ມາລາທິບ+ໂພ     

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์