ອາກອນວຽງຈັນເກັບລາຍຮັບໄດ້ແລ້ວ 126 ຕື້ກວ່າກີບ

  ການເກັບລາຍຮັບເຂົ້າງົບປະມານຂອງສ່ວຍສາອາກອນແຂວງວຽງຈັນ ປີນີ້ເປັນໄປດ້ວຍບັນຍາກາດດີສົມຄວນພາກສ່ວນກ່ຽວຂ້ອງເປີດເຜີຍວ່າຮອດເວລານີ້ເກັບໄດ້ແລ້ວ 126 ຕື້ກວ່າກີບ ເທົ່າກັບ 70% ຂອງແຜນການປີ ແລະຄາດວ່າໝົດປີອາດກາຍແຜນ.

  ທ່ານ ຂັນທອງ ພະລະຄອນ ຫົວໜ້າສ່ວຍສາອາກອນແຂວງວຽງຈັນໃຫ້ສຳພາດຕໍ່ຜູ້ສື່ຂ່າວໃນວັນທີ 2 ກັນຍານີ້ວ່າ: ປີນີ້ສ່ວຍສາອາກອນແຂວງມີແຜນເກັບລາຍຮັບທັງໝົດ 188 ຕື້ກວ່າກີບ ຜ່ານການຈັດຕັ້ງປະຕິບັດແມ່ນເປັນໄປດ້ວຍບັນຍາກາດດີສົມຄວນສະແດງອອກໃນຈຳນວນເງິນ ທີ່ເກັບໄດ້ມາຮອດວັນທີ 31 ສິງຫາ 2019 ບັນລຸແລ້ວ 126 ຕື້ກວ່າກີບ ເທົ່າກັບ 70% ຂອງແຜນການປີທີ່ມີການວາງເອົາໄວ້ກ່ອນໜ້ານີ້ ແລະຄາດວ່າໝົດປີລາຍຮັບທີ່ມີການຈັດເກັບຈະໄດ້ຕາມແຜນ ແລະອາດກາຍແຜນການກໍ່ເປັນໄດ້.

ທ່ານຫົວໜ້າສ່ວຍສາອາກອນແຂວງຊີ້ໃຫ້ເຫັນອີກວ່າ: ລາຍຮັບຕົ້ນຕໍແມ່ນໄດ້ຈາກອາກອນຊົມໃຊ້ໄຟຟ້າ, ໄດ້ຈາກອາກອນຊົມໃຊ້ອາກອນມູນຄ່າເພີ່ມຂອງລາວໂທລະຄົມ, ໄດ້ຈາກບັນດາຫົວໜ່ວຍທຸລະກິດທີ່ບັນດາເມືອງ ແລະແຂວງຄຸ້ມຄອງຈຳນວນໜຶ່ງ, ລາຍຮັບຈາກພາສີທີ່ດິນ, ລາຍຮັບຈາກຄ່າທຳນຽມທາງ ແລະຄ່າທຳນຽມອະນຸຍາດຂອງພະແນກການຕ່າງໆຂັ້ນແຂວງ.

 ທ່ານກ່າວອີກວ່າ: ການເກັບລາຍຮັບຂອງແຂວງປີນີ້ມີຄວາມຄ່ອງຕົວຍ້ອນໄດ້ຮັບການຊີ້ນຳ-ນຳພາຈາກການນຳທັງສາຍຕັ້ງ ແລະສາຍຂວາງຢ່າງໃກ້ຊິດ, ອີກດ້ານໜຶ່ງກໍ່ຍ້ອນມີການນຳໃຊ້ການເກັບລາຍຮັບແບບທັນສະໄໝຜ່ານທະນາຄານ (ແທັກລິດ) ເຂົ້າມາຊ່ວຍຊຶ່ງເຮັດໃຫ້ມີຄວາມສະດວກ ແລະວ່ອງໄວຂຶ້ນ.

------

ຂຽນໂດຍ: ພູຂອງ ສີຫຼວງລາດ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

• 04/09/2019