JDB ເຊັນບົດບັນທຶກຄວາມເຂົ້າໃຈກັບທະນາຄານ Exim Thailand

  ວັນທີ 30 ສິງຫາຜ່ານມາທີ່ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງທະນາຄານຮ່ວມພັດທະນາ (JDB) ແລະ ທະນາ ຄານເພື່ອການສົ່ງອອກ ແລະນໍາເຂົ້າແຫ່ງປະເທດໄທ (Exim Thailand) ເປັນກຽດເຂົ້າຮ່ວມພິທີດັ່ງກ່າວມີ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ ທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານ JDB ຕະຫຼອດເຖິງຜູ້ບໍລິຫານລະດັບສູງຂອງທະນາຄານຮ່ວມພັດທະນາຝ່າຍທະນາຄານເພື່ອການສົ່ງອອກ ແລະນໍາເຂົ້າແຫ່ງປະເທດໄທມີທ່ານ ພິສິດ ເສຣີວິວັດທະນາ ກໍາມະການຜູ້ຈັດການທະນາຄານExim Thailand, ທ່ານ ສິດທິກອນ ດິເຣກສູນທອນ ຮອງກໍາມະການຜູ້ຈັດການ Exim Thailand ແລະພາກສ່ວນທີ່ກ່ຽວຂ້ອງເຂົ້າຮ່ວມ.

 ຈຸດປະສົງໃນຄັ້ງນີ້ກໍເພື່ອເປັນການສະໜັບສະໜູນທາງດ້ານການເງິນໃຫ້ກັບລູກຄ້າຂອງ JDB ແລະລູກຄ້າຂອງ EximThailand ໃຫ້ມີຄວາມສະດວກສະບາຍໃນການເຂົ້າເຖິງແຫຼ່ງທຶນຂອງ 2 ທະນາຄານດັ່ງກ່າວ.

  ໃນພິທີ ທ່ານ ດຣ. ວິວັດ ກິດຕິພົງ ໂກສົນ ທີ່ປຶກສາດ້ານເສດຖະກິດຂອງທະນາຄານຮ່ວມພັດທະນາໄດ້ນໍາສະເໜີພາບລວມຂອງເສດຖະກິດຂອງ ສປປ ລາວ ໃນກຸ່ມເສດຖະກິດອາຊຽນ ແລະ ທ່າແຮງຄວາມອາດສາມາດໃນການຂະຫຍາຍຕົວດ້ານເສດຖະກິດ-ສັງຄົມ ຂອງລາວ ແລະການຂະຫຍາຍຕົວຢ່າງບໍ່ຢຸດຢັ້ງຂອງ JDB ຊຶ່ງປີນີ້ກໍ່ຄົບຮອບ 30 ປີ ຈາກ 4 ໜ່ວຍບໍລິການໃນປີ 2012 ມາເປັນ 60 ໜ່ວຍບໍລິການ ໃນປີ 2019 ເພື່ອຂັບເຄື່ອນທຸລະກິດຂອງ JDB ໄດ້ມີການຂະຫຍາຍຕົວຢ່າງບໍ່ຢຸດຢັ້ງແລະໃຫ້ບຸກທະລຸເປົ້າໝາຍການປ່ອຍສິນເຊື່ອໃຫ້ໄດ້ຕາມເປົ້າໝາຍ KPI ທີ່ວາງໄວ້ເພື່ອພັດທະນາເສດຖະກິດຂອງປະເທດຊາດ ແລະ ຍົກສູງລະດັບຊີວິດການເປັນຢູ່ຂອງປະຊາຊົນບັນດາເຜົ່າ ແລະພະນັກງານລັດຖະກອນໃຫ້ດີຂຶ້ນເທື່ອລະກ້າວ.

ຈາກນັ້ນທ່ານ ສິດທິກອນ ດິເຣກສູນທອນ ກໍໄດ້ຂຶ້ນມີຄໍາເຫັນຊຶ່ງຍົກໃຫ້ເຫັນພາບລວມຂອງທະນາຄານເພື່ອການສົ່ງອອກ ແລະນໍາເຂົ້າແຫ່ງປະເທດໄທເປັນສະຖາບັນການເງິນສະເພາະກິດຂອງລັດຢູ່ພາຍໃຕ້ການຊີ້ນໍາດູແລຂອງກະຊວງການເງິນ ແລະເປັນລັດວິສາຫະກິດຊຶ່ງຢູ່ພາຍໃຕ້ການຄູ້ມຄອງຂອງທະນາຄານກາງແຫ່ງປະເທດໄທ Exim Thailand ໃຫ້ການບໍລິການທາງດ້ານການເງິນ, ການຄ້າ, ການລົງທຶນ,ການຮັບປະກັນສະເພາະຜູ້ທີ່ສົ່ງອອກ ແລະນໍາເຂົ້າຈາກຕ່າງປະເທດລວມເຖິງຜູ້ທີ່ຈະລົງທຶນໄປໃນຕ່າງປະເທດ ຫຼື ຜູ້ທີ່ລົງທຶນເຂົ້າໃນປະເທດໄທເພື່ອພັດທະນາໂຄງລ່າງພື້ນຖານ.

  ຈາກນັ້ນກໍ່ໄດ້ມີພິທີເຊັນ MOU ເພື່ອເປັນການສະໜັບສະໜູນທາງດ້ານການເງິນໃຫ້ກັບລູກຄ້າຝ່າຍທະນາຄານ JDB ລົງນາມໂດຍ ທ່ານ ວິໄລ ສີພະພອນ ແລະ ຝ່າຍທະນາຄານ Exim Thailand ລົງນາມໂດຍ ທ່ານ ພິສິດ ເສຣີວິວັດທະນາ ໂດຍການເປັນສັກຂີພິຍານໂດຍຜູ້ບໍລິຫານລະດັບສູງທັງສອງຝ່າຍ .

  ທະນາຄານຮ່ວມພັດທະນາ JDB ເປັນທະນາຄານທີ່ບໍລິການລູກຄ້າດ້ວຍມາດຕະຖານສາກົນ ISO:9001:2015, ບໍລິການດ້ວຍຄວາມສະດວກ, ວອງໄວ ຮັບ ປະກັນຄວາມປອດໄພ, ສ້າງຄວາມປະທັບໃຈໃຫ້ລູກຄ້າ ແລະລູກຄ້າກໍ່ມີຄວາມເຊື່ອໝັ້ນຕໍ່ທະນາຄານ ແລະມານໍາໃຊ້ບໍລິການນັບມື້ນັບເພີ່ມຂຶ້ນ JDB ໄດ້ມີການເຕີບໃຫຍ່ຂະຫຍາຍຕົວໄວຮອບດ້ານປະຈຸບັນກໍາລັງພັດທະນາໃຫ້ກາຍເປັນທະນາຄານທີ່ບໍລິການລູກຄ້າດ້ວຍລະບົບ Digital ຫຼື ເອີ້ນວ່າ Digital Banking ມີຜະ ລິດຕະພັນທີ່ຫຼາກຫຼາຍ, ມີລະບົບຕາໜ່າງການບໍລິການກວ້າງຂວາງ ແລະມີການເຊື່ອມໂຍງກັບສາກົນ, ທະນາຄານຮ່ວມພັດທະນາມີແຫຼ່ງທຶນພຽງພໍທີ່ຈະສະໜອງ ໃຫ້ລູກຄ້າເພື່ອສະໜັບສະໜູນທຸລະກິດຂອງລູກຄ້າໃຫ້ມີຄວາມເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ, ສົມກັບຄຳຂວັນທີ່ວ່າ “ເຕີບໃຫຍ່ໄປພ້ອມກັນ.”

---------

ຂຽນໂດຍ: ຄໍາຕົ້ນ ວໍລະຈັກ   

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์